Read Biblija - Pe Baltitko Romani čib (Romanes) 2019 Baltic Romani Bible Iáno 11 Bible Online

Iáno 11 - Biblija - Pe Baltitko Romani čib (Romanes) 2019 Baltic Romani Bible bible

Iáno 11

¹Sys nasvaló jekh manúš Lazarjo Vifanijatyr, gavestyr, kaj dživdiá Maríia péskire pheniasa Marfasa.

²Maríia, savjakiro pšal Lazarjo sys nasvaló, sys odoia-pac' džuvlý, saví makcia Ras-Devlés mirósa i vykhoscia Léskire ĥerá péskire balenca.

³Paldová pheniá bičhadé te phenén Léske: “Rajo Dévla! Ĥáda, kon isyn drógo Túke, isyn nasvaló”

⁴Kiéli Isúso šundiá pal davá, Jov phendiá: “Daja dukh isyn na ke meribén, joj isyn vaš Devléskiri sláva, sob (kaj) Čhavó Devléskiro te slavinelpe pir láte.”

⁵Marfa sys drógo Isusóske, lákiri phen i Lazarjo.

⁶Kiéli Isúso udžindiá pal Lazarjoskiri dukh, Jov zarikirdiape pe duj dyvesá pe dová-pac' štéto, kaj Jov sys.

⁷Korigedýr (pozžedýr) Jov phendiá Léskire sykliaibnytkonénge: “Javén, džása pale dre Judéia.”

⁸Sykliaibnýtka phendlé Léske: “Ravvi! Ci ĥará davá sys, syr Judy kamlé te marén barénca Tut, i Tu usajékh džása odorík?”

⁹Isúso phendiá lénge: “Ci na dešudúj mardé (štundy) isyn dro dyvés? Kon psiréla dyvesé, odová na obštavelape, pal-dová so jov dykhéla dud dalé svetoskiro;

¹⁰ne kóli jov psiréla ratý, tedy obštavelape, pal-dová so nane dud lésa.”

¹¹Jov phendiá davá, i korigedýr (pozžedýr) iščo (inké) rakiréla lénge: “Amaró drúgo (mal) Lazarjo zasutia, ne Me džáva te džangavav les.”

¹²Sykliaibnýtka Léskire rakiréna: “Rajo Dévla! Kóli jov zasutia, tedy jov vysastjola.”

¹³Isúso kamdiá te phenél dalésa, so Lazarjo myjá; ne jone dumindle, so Jov rakiréla pal čačunó soiben.”

¹⁴Tedy Isúso phendiá lénge mamúi: “Lazarjo myjá.

¹⁵I Me radynavape pal tuménde, so Me na sómas odój, sob (kaj) tumé te upatian. Ne javén, džása ke jov.”

¹⁶Tedy Fama, Saves pe javír kharéna ‘Blizniato,’ phendiá sykliaibnytkonénge: “Javén i ame merasa lésa khetané.”

¹⁷Kiéli Isúso javdiá, Jov udžindiá, so Lazarjo, ĥáda, štar dyvesá, syr jov isyn paštó muló dre koplíca.

¹⁸Vifanija sys nádur Jerusalimóstyr, pašé duj versty odothýr,

¹⁹i but manušá Judendyr javné ke Marfa i ke Maríia, sob (kaj) te štyliakiren len dro piridživiben pal léngire pšaléste.

²⁰Marfa, syr šundiá, so Isúso džála ke jone, gijá te streninel Les; a Maríia sys bešty kheré.

²¹Tedy Marfa phendiá Isusóske: “Rajo Dévla! Kóli Tu te javes adái, tedy na merelas by miro pšal;

²²Ne i kakaná, me džinóm (džináv), so Devél déla Túke saró, pal so Tu Les pomangesa.”

²³Isúso rakiréla láke: “Tyró pšal otdžidjola.”

²⁴Marfa phendiá Léske: “Me džinóm (džináv), so jov otdžidjola dro palatunó (posliednjo) dyvés.”

²⁵Isúso phendiá láke: “Me som otdžidiakiriben i džiibén; odová, kon patiála dre Mánde, kóli i meréla, usajékh otdžidjola;

²⁶I kažno, kon isyn džidó i patiála dre Mánde, na meréla nijékhvar. Ci patiása tu dro davá?”

²⁷Joj rakiréla Léske: “Adiáke, Rajo Dévla! Me patiáva, so Tu san Xristóso, Čhavó Devléskiro, savó džála dro svéto.”

²⁸I kiéli Marfa phendiá davá, joj čorahanés gijá i khardiá peskirjá pheniá Maríia, rakirí láke: “Sykliakiribnáskiro isyn adái, Jov kharéla tut.”

²⁹Kiéli joj šundiá davá, joj sýges uštyjá i gijá ke Jov.

³⁰Isúso na zagijá dro gav, ne Jov jaciápe pe dová štéto, kaj Marfa strenindia (pirilyja) Les.

³¹Judy, savé sys lása khetané dro kher i štyliakirenas la, dykhí, so Maríia sýges uštyjá i gijá javrí, giné pal láte, i jone dumindle, so joj gijá te rovel pe maĥila odój.

³²Ne Maríia, syr javdiá odorík, kaj sys Isúso, i dykhciá Les, pyjá ke Léskire ĥerá i phendiá Léske: “Rajo Dévla! Kóli Tu javesas adái, na merelas miro pšal.”

³³Kiéli Isúso dykhciá, so joj rovela i, so Judy adiáke-pac' rovena, savé javné lása, Jov Kokoró pyjá dro dúho i Jov piridživelas.

³⁴I Jov phuciá: “Kaj tumé garadé les?” Rakiréna Léske: “Rajo Dévla! Džá i dykh adarík.”

³⁵Isúso zarondia.

³⁶Judy tedy rakirdé: “Dykhén, syr jov isyn drógo Léske!”

³⁷Ne javír léndyr phendlé: “Jov kerdiá, so i kororó jaciá te dykhél, ci na moginéla jov te kerél adiáke, sob (kaj) i Lazarjo te na merél?”

³⁸Isúso, nevéstyr piridživi andrál, javdiá ke koplíca. Davá sys ĥiebár (pieščera) dre bérga, i bar sys paštó pe láte.

³⁹Isúso rakiréla: “Ukeden bar.” Phen muleskiri, Marfa, rakiréla Léske: “Rajo Dévla! Odothýr džála khan; pal-dová so, ĥáda, štar dyvesá, syr jov isyn dre koplíca.”

⁴⁰Isúso rakiréla láke: “Ci Me na rakirdjom túke, so kóli javésa te patias, dykhésa Devléskiri sláva?”

⁴¹I, ĥáda, ukedyne bar odolé štetóstyr, kaj muló sys paštó. Isúso ĥazdyjá upré jakhá i phendiá: “Dádo! Parikirava Túke, so Tu kandyjan Man;

⁴²Me džindjom, so Tu ŭsády (sak) šunesa Man; ne Me phendjom davá vaš manušénge, savé sys terdé adái, mek te patián jone, so Tu bičhadian Man.”

⁴³I kiéli Jov phendiá davá, Jov dyjá gódla zoralé zaniása: “Lazarie! Vydža javrí.”

⁴⁴I vygijá muló, ĥerá i vastá léste sys sphandle garaibnytkone thanesa, i muj léskiro sys phandlo dyhlesa. Isúso phendiá lénge: “Rosphanden les, mek jov te džal.”

⁴⁵But Judy javné ke Maríia, syr jone dykhné, so kerdiá Isúso, patiandyné dre Léste;

⁴⁶Ne vari-savé léndyr giné ke Farisiéi, i rosphendlé lénge pal dová, so kerdiá Isúso.

⁴⁷Tedy rašángire barydyrá i Farisiéi khardé skedyibén i rakirdé: “So aménge te kerás? Adavá Manúš keréla but dívy.

⁴⁸Kóli ame domekasa, sob (kaj) Jov te kerél duredýr adiáke, tedy saré upatiana dre Léste, i javéna Rimliani i xasiakirena amarí phuv i saré manušén.”

⁴⁹Jekh léndyr, vari-savó Kaiáfa, savó sys dre dová berš pérvo rašángiro barydyró, phendiá lénge: “Tumé na džinéna nisó.

⁵⁰Naúšto na ĥaljona tumé, so vaš aménge javéla fedýr, kóli jekh manúš te merél pal saré manušénde, a sob (kaj) saré manušá te na xasjon.”

⁵¹Davá jov phendiá na kokoró péstyr, ne pal-dová so jov sys pérvo rašáj pe dová berš, jov angilphendia, so Isúso meréla pal manušénde,

⁵²I na pal jekhe adalé manušénde, ne i vaš dová, sob (kaj) te skedén khetané sarén Devleskiren čhavén, savé isyn rosčhurdyne pir phuv.

⁵³I adalé dyvestyr jone jačné te duminen, syr te muliakirén Isusós.

⁵⁴I paldavá Isúso na javélas muj pe muj maškír Judénde, a Jov gijá odothýr dro fóro, savó kharéna Jefraimo, nádur pašýl čhučí phuv, i Jov jaciápe odój Péskire sykliaibnytkonénca.

⁵⁵Javélas syg Judýtko Patradí, i but manušá adalé rigátyr javné dro Jerusalimo angíl Patradí, sob (kaj) te obžužakirenpe (te občystinenpe).

⁵⁶Manušá rodyne Isusós i rakirdé maškír péste, syr jone skedynépe dre Khangirí: “Syr tumé duminéna? Naúšto Jov sarésa na javéla pe svénko?”

⁵⁷Rašángire barydyrá i Farisiéi dyné uphenybén, so kažno, kon udžinela, kaj Jov isyn, tedy mek te phenél pal davá, sob (kaj) Jone te moginen te len Les.