Read Biblija - Pe Baltitko Romani čib (Romanes) 2019 Baltic Romani Bible Iáno 12 Bible Online

Iáno 12 - Biblija - Pe Baltitko Romani čib (Romanes) 2019 Baltic Romani Bible bible

Iáno 12

¹Pe šov dyvesá angíl Patradí Isúso javdiá dre Vifanija, dro dová-pac' gav, kaj dživdiá Lazarjo, Saves Jov otdžidiakirdiá muléndyr.

²Jone kerdé xabén vaš Léske, i Marfa podelas xabén pe skamínd, a Lazarjo sys beštó pal skamínd khetané Isusósa.

³Maríia dro dová časo (cýro), lyjá khoró drieván drogoné mirósa žužé nardostyr, vymakhcia lésa Isusóskire ĥerá i vykostia Léskire ĥerá péskire balenca; i saró kher pherdija lačhesungeskire khandypnasa mirostyr.

⁴Tedy jekh Léskire sykliaibnytkonendyr, Juda Iskarioto, odová-pac', savó kamdiá Les te zdel, phendiá:

⁵“Sóske sys te na biknas davá miro pal trin šelá dinarii i te na rozdas bogenge?”

⁶Jov phendiá davá na pal-dová, so jov dumindia dro iló pal bogénde, ne pal-dová, so jov sys čor. Jov lydžalas pésa lové dre tyknori, savé manušá skedéna i but móly lelas odothýr vaš péske.

⁷Isúso phendiá: “Na čilaven la; joj davá rakhciá pe Miro garaibnytko dyvés;

⁸Pal-dová so bógi ŭsády (sak) javéna tuménca, ne Me na javáva ŭsády (sak) tuménca.”

⁹But Judendyr udžindlé, so Jov sys odój, i javné odorík na vaš jekhe Isusóske, ne sob (kaj) te dykhén Lazarjos, savés Jov otdžidiakirdiá muléndyr.

¹⁰Tedy rašángire barydyrá skedynépe te muliakirén i Lazarjos.

¹¹Pal-dová so pal léste but Judy javénas ke Isúso i patiandyné.

¹²Pe javír dyvés but manušá, savé javné pe svénko, syr udžindlé, so Isúso džála dro Jerusalimo,

¹³lyné pal'matyr randiá i vyginé angíl Léste i godlenas: “Asanna! Mek te javél bahtiakirdó, Savó džála vaš Devléskiro lav, Králi Izrailjoskiro!”

¹⁴Isúso, lathiá terné oslós, besciá pe léste, syr adiáke i isyn čhindló dro Svénto Čhinybén:

¹⁵“Na andyršan, Sionoskire manušále! Ake, tyró Králi tradéla ke tu, uklisté pe terné osloste.”

¹⁶Léskire sykliaibnýtka na ĥalyné davá; ne, kiéli Isúso sys slavindlo, tedy jone ripirde, so adiáke sys čhindló pal Léste dro Svénto Čhinybén, i adiáke jone kerdé Léske.

¹⁷Manušá, angíl savénde Isúso ĥazdyjá Lazarjos maĥilatyr i otdžidiakirdiá muléndyr, dophenelas pal davá;

¹⁸paldová i vyginé te streninen (te pirilen) Les manušá, syr jone šundlé, so Jov kerdiá dasavo dívo.

¹⁹Farisiéi ž rakirdé maškír péste: “Ci dykhéna tumé, so tumé san bizorjákire vari-so te kerén; saró svéto džála pal Léste.”

²⁰Maškir odolénde, savé javné pe svénko te mangénpe Devléske, sys i Griéki (Balamé);

²¹jone podginé ke Filipo, savó sys odolé štetóstyr Vifsaidatyr, so isyn dre Galiliéia, i mangné les, rakirí: “Rajo! Ame kamas te dykhas Isusós.”

²²Filipo gijá i phendiá pal davá Jendriske; i jone, Jendri i Filipo, giné dujdžiné i phendlé Isusóske pal davá.

²³Isúso otphendiá lénge: “Javdiá mardó vaš davá, sob (kaj) te slavinelpe Manušéskiro Čhavó.

²⁴Čačes, čačes Me rakiráva tuménge: kóli mareskiri ziárka, so pyjá dre phuv, na meréla, tedy joj iačélape jekh; ne kóli meréla, tedy janéla but barjakirdé (plódy).

²⁵Odová, konéske isyn na drógo péskiro džiibén, xasiakiréla les; ne konéske na drógo péskiro džiibén dro davá svéto, odová les rakhéla vaš viéčno džiibén.

²⁶Odová, savó Mánge dynarinela, mek te džal pal Mánde, i kaj Me som odój i dynári Miro javéla; i odoléske, kon Mánge javéla te dynarinél, odolés Miro Dad slavinela.

²⁷Miro Dúho (Fáno) pyjá kakaná; i so Mánge te phenáv? Dádo! Zrákh Man dalé mardestyr (štundatyr)! Ne Me vaš davá i javdjom ke davá mardó.

²⁸Dádo, proslavin Tyró lav.” I bolybnástyr rozdyjape zan: “I Me proslavindjom, i iščo (inké) Me javáva te slavinav.”

²⁹Manušá, savé sys terdé odój i šundlé zan, jekh rakirdé, so davá gromo grukindia. Ne javír rakirdé: “Davá Jangólo rakirdiá Lésa.”

³⁰Isúso phendiá pe davá: “Na vaš Mánge sys kadaja zan, joj sys vaš tuménge, manušénge;

³¹kakaná javdiá séndo kadalé svetoske; i Králi adalé svetoskiro javéla tradyno javrí;

³²Ne kiéli Me javáva ĥazdynó phuvjátyr, tedy Me láva sarén manušén ke Pe.”

³³Davá Jov rakirdiá, sob (kaj) jone te ĥaljon, savé meribnasa Jov meréla.

³⁴Manušá otphendlé Léske: “Ame udžindiam Zakonóstyr; so Xristóso na meréla nijékhvar; syr Tu rakirésa, so Čhavó Manušéskiro javéla ĥazdynó? I kon adavá isyn Manušéskiro Čhavó?”

³⁵Tedy Isúso phendiá lénge: “Sarésa pe nábut časo dud (svéto) isyn tuménca. Psirén, paka isyn dud, sob (kaj) te na čhakirel tumen kalypén (cjomnyma). Ne odová, kon psiréla dro kalypén, odová na džinéla, karik jov džála.

³⁶Ne paka dud svencynela tuménge, patián dre dud, i tumé javéna dudeskire čhavé.” Dalé lavénca Isúso gijá i nikón na džindiá, kaj Jov sys.

³⁷Xoc' Jov kerdiá adákicy but dívy angíl lénde, jone usajékh na patiandyné dre Léste,

³⁸mek te spolninélpe Isajoskire-prorokoskiro lav: “Rajo Dévla! Kon patiandyja zaniake (zviesiake), saví šundlé améndyr, i konéske otčhakirdiape Devléskiri zor?”

³⁹I paldavá jone na mogindlé te patián, so i phendiá nevéstyr Isajo:

⁴⁰“Adalé manušá jačné kororé i léngire ile jačné baruné adiáke, so jone na dykhéna péskire jakhénca i na ĥaljona godiása, i na javéna, sob (kaj) Me te vysastiakirav len.”

⁴¹Kadavá phendiá Isajo, pal-dová so jov dykhciá Isusoskiri sláva, jov davá rakirdiá pal Isusóste.

⁴²Adiáke-pac' but baré randyr upatiándyne dre Isusóste, ne jone darándyne Farisiejendyr te priĥaljon davá, sob (kaj) kodolé te na tradén len javrí Khangirjátyr;

⁴³pal-dová so manušýtko sláva sys vaš lénge drogedyr, syr sláva Devléstyr.

⁴⁴Isúso zoralés dyjá gódla i phendiá: “Odová, kon dre Mánde patiála, jov na dre Mánde patiála, ne jov patiála dre Odoléste, Kon bičhadiá Man;

⁴⁵odová, kon dykhéla Man, dykhéla i Odolés, kon bičhadiá Man.

⁴⁶Me javdjom syr dud dro svéto, sob (kaj) kažno, kon patiála dre Mánde, te na jačélpe dro kalypén (cjomnyma).

⁴⁷I kon šunéla lavá Miré i na javéla te patial, na Me javáva léske sendári, pal-dová so Me javdjom na vaš davá, sob (kaj) te sendinav svéto, a Me javdjom vaš dová, sob (kaj) te zrakhav les.

⁴⁸Odová, kon Man na priĥaljola i na kaméla te prilel Miro Lav, pe dasaveste isyn sendári: Lav, savó Me rakirdjom, jov javéla te sendinel les dro palatunó (posliednjo) dyvés.

⁴⁹Pal-dová so Me na Kokoró Péstyr rakirdjom, a Miro Dad, Kon bičhadiá Man, Jov dyjá priphenybén Mánge, so te rakiráv i syr;

⁵⁰i Me džinóm (džináv), so Léskiro priphenybén isyn viéčno džiibén. Me rakiráva dová, so Dad phendiá Mánge te rakiráv.”