Read Biblija - Pe Baltitko Romani čib (Romanes) 2019 Baltic Romani Bible Iáno 13 Bible Online

Iáno 13 - Biblija - Pe Baltitko Romani čib (Romanes) 2019 Baltic Romani Bible bible

Iáno 13

¹Angíl svénko Patradí Isúso, syr džindiá, so javdiá pašyledýr mardó (štúnda) vaš Léske te mekel davá svéto i te risjol ke Dad, Léske jačné drieván dróga odolé, savé dživdé Lésa pe davá svéto, i kakaná Jov sykadiá sarí zor Péskire laskasa ke jone.

²Bel'velié, kiéli jone xanas, nálačho čhudiá myslia dro iló Judáske, Simonoskire čhavéske Iskariotoskireske te zdel Isusós.

³Isúso džindiá, so Dad saró otdyjá dre Léskire vastá, i so Jov javdiá Devléstyr i risjola ke Devél.

⁴Isúso uštyjá skamindestyr, zlyjá Péstyr upratuno uribén, lyjá rušnika (khosno) i podphandiape lása.

⁵Paló (poslie) Jov čhudiá paní dro moribnaskiro čaró i lyjá te morel ĥerá sykliaibnytkonénge i te khosel rušnikasa, savjása Jov sys podphandlo.

⁶Kiéli Jov podgíia ke Símono Pétri, odová rakiréla Léske: “Rajo Dévla! Tu javésa te mores ĥerá mánge?

⁷Isúso otphendiá léske: “So Me keráva, kakaná tu na ĥaljosa, ne saró tu ĥaljosa korigedýr.”

⁸Pétri rakiréla Léske: “Tu nijékhvar na vymoresa ĥerá miré.” Isúso otphendiá léske: “Kóli Me na vymorava túke ĥerá, tedy tu na san Mánca khetané dre paš.”

⁹Tedy Pétri rakiréla Léske: “Rajo Dévla! Mor, na jekh ĥerá i vastá miré, ne i šeró.”

¹⁰Isúso rakiréla Léske: “Žužé (čystone) manušéske trej jekh ĥerá te vymorel, pal-dová so jov isyn žužó; i tumé san žužé, ne na saré.

¹¹Pal-dová so Jov džindiá Péskires zdyibnaris, paldavá adiáke i phendiá, so na saré jone sys žužé.

¹²Ne kiéli Isúso vymordia lénge ĥerá i uridia Péskiro uribén, Jov besciá pe Péskiro štéto i phendiá lénge: “Ci tumé na džinéna, so Me kerdjom vaš tuménge?

¹³Tumé Man kharéna “Sykliakiribnáskiro” i “Devél”, i mištó keréna, pal-dová so Me adasavó i Som.

¹⁴I kóli Me, Devél i Sykliakiribnáskiro vymordjom tuménge ĥerá, adiáke-pac' i tuménge trej te moren ĥerá jekh jekhéske.

¹⁵Me dyjom tuménge primiéro (sykaibén), sob (kaj) i tumé te kerén adiáke-pac', so Me kerdjom tuménge.

¹⁶Čačes, čačes Me rakiráva tuménge: dynári isyn na baredýr péskire Rástyr, i odová, kon bičhadó, nane baredýr odoléstyr, Kon bičhadiá les.

¹⁷Kóli tumé džinéna davá, tumé javéna bahtalé, kóli i javéna te kerén adiáke-pac'.

¹⁸Me na pal sarénde tuménge rakiráva. Me džinóm (džináv) odolén, savén Me vykedyjom; ne mek te spolninélpe Svénto Čhinybén: Odová, kon xála maró khetané Mánca, ĥazdyjá ĥerój pe Mánde.

¹⁹Kakaná Me rakiráva tuménge: angíl, syr davá spolninelape, sob (kaj) tumé te patián, so davá som Me.

²⁰Čačes, čačes Me rakiráva tuménge: kon priléla odolés, konés Me bičhaváva, priléla Man; ne kon priléla Man, priléla Odolés, Kon bičhadiá Man.”

²¹Kiéli Isúso phendiá davá, Jov drieván piridživelas dro iló i dosykadia i vyphendia: “Čačes, čačes Me rakiráva tuménge, so jekh tuméndyr zdela Man.”

²²Tedy sykliaibnýtka, dykhí jekh pe jekhéste, na džindlé, pal konéste Jov rakirdiá.

²³Jekh Léskire sykliaibnytkonendyr, savó sys drógo Isusóske, sys paštó pašýl Isusóskiro kolýn.

²⁴Símono Pétri podphendia šperása (znakosa) léske, sob (kaj) odová te phučel Léstyr, pal konéste Jov rakiréla.

²⁵I sykliaibnýtko, syr priklonindiape ke Isusóskiro kolýn, phendiá Léske: “Rajo Dévla! Kon adavá isyn?”

²⁶Isúso otphendiá: “Odová, konéske Me bolavava kotér maró i podava”, i Jov podyja kotér maró Judáske, Simonoskire-Iskariotoskire čhavéske.

²⁷I tedy paló davá kotér, nálačho zagijá dre léste. Tedy Isúso phendiá léske: “So kerésa, ker sygedýr.”

²⁸Ne nikón, kon sys beštó odój, na ĥalyjá, ke so Jov phendiá davá léske.

²⁹Vari-savé léndyr dumindle, so, syr Judaste sys lovitko tyknori, paldavá Isúso rakirdiá léske: “Kin, so aménge trej ke svénko, ci sob (kaj) te das vari-so bogenge.”

³⁰Juda lyjá kotér maró, i adáj že gijá javrí; i davá sys rat.

³¹Kiéli jov gijá, Isúso phendiá: “Kakaná Čhavó Manušéskiro slavindiape i Devél slavindiape dre Léste.

³²Kóli Devél slavindiape dre Léste, tedy i Devél proslavinela Les dre Péste, i syg proslavinela Les.

³³Čhavale Miré! Nábut Mánge jaciápe te javav tuménca. Tumé javéna te rodén Man, i syr Me phendjom Judénge: Karik Me džáva, tumé na moginéna te javén, adiáke Me i tuménge rakiráva.

³⁴Me dáva tuménge nevó priphenybén: javén dróga jekh vaš jekhéske; syr Mánge, adiáke-pac' i tumé javén dróga jekh vaš jekhéske.

³⁵Pir davá udžinena saré, so tumé san Miré sykliaibnýtka, kóli javéla láska maškír tuménde.”

³⁶Símono Pétri phendiá Léske: “Rajo Dévla! Karik Tu džása?” Isúso rakiréla léske: “Karik Me džáva, túke naštý (na moginésa) te džas kakaná pal Mánde, ne korigedýr džása pal Mánde.”

³⁷Pétri phendiá Léske: “Rajo Dévla! Sóske Mánge naštý te džav pal Túte kakaná? Me čhuváva péskiro iló pal Túte.”

³⁸Isúso otphendiá léske: “Čhuvésa iló péskiro pal Mánde? Čačes, čačes Me rakiráva túke: na probagala bašno, syr tu trin móly otphenesape Mándyr.”