Read Biblija - Pe Baltitko Romani čib (Romanes) 2019 Baltic Romani Bible Iáno 14 Bible Online

Iáno 14 - Biblija - Pe Baltitko Romani čib (Romanes) 2019 Baltic Romani Bible bible

Iáno 14

¹“Mek iló tumaró te na strahadjol; patián dre Devléste i patián dre Mánde.

²Dre Miré-Dadéskiro kher isyn but štéty; ne kóli te na javél adiáke, Me phenavas tuménge: Me džáva te kedav štéto tuménge?”

³I kiéli Me džáva i kedava štéto tuménge, Me javáva nevéstyr i lavá tumen ke Pe; sob (kaj) i tumé te javén odój, kaj Me javáva.

⁴A karik Me džáva, tumé džinéna i drom odorík isyn džindló tuménge.”

⁵Fama phendiá Léske: “Rajo Dévla! Ame na džinása, karik Tu džása; syr ame moginasa te džinas drom odorík?”

⁶Isúso phendiá léske: “Me som drom i čačipén i džiibén; nikón na javéla ke Dad, syr jekh pir Mánde.

⁷Kóli tumé te džinén Man, tedy tumé džinenas i Miré Dadés; i kakaná tumé džinéna Les i dykhné Les.”

⁸Filipo phendiá Léske: “Rajo Dévla! Sykáv aménge Dadés, i butýr aménge nisó na trej.”

⁹Isúso phendiá léske: “Ci na ĥará” (dlúges) Me som tuménca, i tu na džinésa Man, Filipo? Odová, kon dykhciá Man, dykhciá i Dadés; syr tu rakirésa: ‘Sykáv aménge Dadés?’

¹⁰Ci tu na patiása, so Me som dre Dadéste i Dad isyn dre Mánde? Lavá, savé Me rakiráva tuménge, Me rakiráva na Péstyr; adavá Dad, Savó isyn dre Mánde, Jov keréla Péskire réndy.

¹¹Patián Mánge, so Me som dre Dadéste i Dad isyn dre Mánde; ne kóli na patiána Mánge, tedy patián pir kokoré Miré réndy.

¹²Čačes, čačes Me rakiráva tuménge: Odová, kon patiála dre Mánde, javéla te kerél dasavé-pac' réndy, so i Me keráva i butýr odolé rendéndyr jov keréla; pal-dová so Me džáva ke Miro Dad.

¹³I so tumé te na pomangen Dadéstyr Miré lavéstyr, Me saró keráva dová, i Dad sykavéla Péskiri sláva pir Čhavéste.

¹⁴Kóli so te ná mangen Miré lavéstyr, Me dová keráva.

¹⁵Kóli tumé rikiréna Man syr Drógima dro iló, to kerén dová, so Me priphendjom tuménge.

¹⁶I Me pomangava Dadés, i Jov déla tuménge javire Obradypnáskires (Utiešytieljos), savó ŭsády (sak) javéla tuménca;

¹⁷davá isyn Dúho (Fáno) čačipnáskiro, Saves svéto naštý te prilel, pal-dová so jov na dykhéla Les i na džinéla; ne tumé Les džinéna, pal-dová so Jov isyn tuménca i javéla dre tuménde.

¹⁸Me na jačkirava tumen pirotenca (sirotenca), Me javáva ke tumé.

¹⁹Sarésa nábut, i svéto Man na javéla te dykhél, ne tumé dykhéna Man, pal-dová so Me dživáva, i tumé javéna te dživén.

²⁰Dre dová dyvés tumé javéna te džinén, so Me som dre Miré Dadéste, i tumé san dre Mánde, i Me som dre tuménde.

²¹Odová, konéste isyn Miré priphenybená, i kon rakhéla len, odová rikiréla Man syr Drógima dro iló, i Dad Miro sykavéla patýv léske, i Me adiáke-pac' javáva te sykavav patýv léske, i Me sykadjovava Kokoró Pes léske.”

²²Juda, savó na sys Iskarioto, rakiréla Léske: “Rajo Dévla! Syr da Tu skedesape te sykadjos aménge, a na svetoske?”

²³Isúso otphendiá léske: “Kóli vari-konéske som drógo Me, odová manúš zrakhéla Miro lav; i tedy Miré Dadéske javéla drógo jov, i ame javása ke jov i ame javása te dživás ke jov.

²⁴Odová, konéske na drógo som Me, odová manúš na rakhéla Miré lavá; ne lav, savó tumé šunéna, davá isyn na Miro, a Dadéskiro, Savó bičhadiá Man.

²⁵Me phendjom tuménge davá, kiéli Me sómas khetané tuménca.

²⁶Obradypnaskiro, Savó isyn Dúho (Fáno) Svénto, Savó bičhavéla Dad vaš Miro lav, vysykliakirela tumen sareske i saró čhuvéla dre tumarí godý, pal so Me rakirdjom tuménge.

²⁷Me jačkirava ramánjo (miro) tuménge, Miro ramánjo Me dáva tuménge: ne na adiáke, syr svéto déla, Me dáva tuménge, i mek te na strahadjol tumaró iló, i te na darel.

²⁸Tumé šundlé, so Me phendjom tuménge: ‘Me džáva krig tuméndyr i javáva ke tumé. Kóli tuménge Me javavas drógo, tumé javénas ráda, so Me džáva ke Dad; pal-dová so Miro Dad isyn baredýr Mándyr’.

²⁹I, ĥáda, Me phendjom tuménge saró angledýr doléstyr, syr davá kerélape vaš dová, sob (kaj) tumé te patián, kiéli davá kerélape.

³⁰Me kakaná na javáva but te rakiráv tuménca, pal-dová so džála dalé-svetoskiro xulái, ne jov isyn na xuláj pe Mánde.

³¹Ne, sob (kaj) svéto te džinél, so Mánge isyn drógo Dad i, syr phendiá Mánge Dad, adiáke Me saró keráva: ‘Uštén, džása adathýr.’”