Read Biblija - Pe Baltitko Romani čib (Romanes) 2019 Baltic Romani Bible Iáno 15 Bible Online

Iáno 15 - Biblija - Pe Baltitko Romani čib (Romanes) 2019 Baltic Romani Bible bible

Iáno 15

¹Me som čačunó vinagradoskiro Kašt (Loza), i Miro Dad isyn vinagradnikoskiro Xulái.

²Kažno rand' (vetka), saví isyn dre Mánde, i saví na déla barjakirdó (plódo), Jov občingirela; i kažno rand', saví déla barjakirdó, Jov žužakirela (čystinela), sob (kaj) joj butedýr te del barjakirdó.

³Tumé kakaná san žužé Miré lavéndyr, savé Me rakirdjom tuménge.

⁴Jačénpe dre Mánde, syr Me som dre tuménde. Syr rand' kokori péstyr na moginéla te del barjakirdó, kóli joj na javéla te barjol kaštéstyr: adiáke-pac' i tumé na moginéna, kóli tumé na jačénape dre Mánde.

⁵Me som Kašt, ne tumé san Miré randiá: odová, kon isyn na dre Mánde, syr i Me som dre léste, odová déla but barjakirdé; pal-dová so bi Miro tumé na moginéna nisó te kerén.

⁶Ne, kon na dre Mánde, odová isyn syr rand', saví čhurdelape javrí, saví zašutjola; ne adasavé randiá skedéna i čhurdena dre jag, i odój jone shačona.

⁷Ne kóli tumé jačénape dre Mánde i Miré lavá jačénape dre tuménde, tedy mangén, so tuménge trej, i tuménge javéla dynó.

⁸Dalésa Miro Dad slavinelape, kóli tumé déna but barjakirdé, i tumé javéna Miré sykliaibnýtka.

⁹I syr jacjom drógo Me Miré Dadéske, adiáke-pac' i Mánge jačné dróga tumé; jačénpe dro Mirí láska.

¹⁰Kóli tumé javéna te rakhén Miré priphenybená, to tumé javéna te jačénpe dro Mirí láska, adiáke-pac', syr i Me rakhcjom Miré-Dadéskire priphenybená, i Me dživáva dro Léskiri láska.

¹¹Davá Me phendjom tuménge, sob (kaj) Mirí rádyma te jačél tuménca, i, sob (kaj) tumarí rádyma te javél pherdý.

¹²Ĥáda, isyn Miro priphenybén tuménge: javén dróga jekh jekhéske, adiáke-pac' syr Me jacjom drógo tuménge.

¹³Nane baredýr dolé laskatyr, kóli vari-kon otdéla péskiro džiibén pal malende.

¹⁴Tumé san Miré drúgi (malá), kóli tumé keréna dová, so Me priphendjom tuménge.

¹⁵Me kakaná na kharáva tumen dynar'jénca, pal-dová so dynári na džinéla, so keréla léskiro xulái; ne Me kharáva tumen Péskire drugenca (malenca), pal-dová so Me phendjom tuménge saró, so šundjom Miré Dadéstyr.

¹⁶Na tumé vykedyné Man, ne davá Me tumen vykedyjom, sob (kaj) tumé te džán i den barjakirdó i, sob (kaj) barjakirdó tumaró te barjol i tedy, pal so tumé na pomangenas Miré Dadés Miré lavéstyr, Jov déla tuménge.

¹⁷Ĥáda, so Me priphenava tuménge: sykavén patýv jekh jekhéske.

¹⁸Kóli svéto na déla patýv tuménge, džinén, so jov Man angledýr tuméndyr svéto na délas patýv.

¹⁹Kóli tumé te javén dalé svetóstyr, tedy léske javénas dróga tumé, syr péskire; ne adiáke, syr tumé na san dalé svetóstyr, ne Me vykedyjom tumen dalé svetóstyr, paldavá tumé san na dróga svetoske.

²⁰Ripiren lav, savó Me phendjom tuménge: dynári isyn na baredýr péskire xulastyr. Kóli jone Man tradyne, i tumen javéna te tradén; kóli jone Miro lav kandenas, jone javéna te kandén i tumaró lav.

²¹Ne saró davá jone javéna te kerén tuménge pal Miro lav, pal-dová so jone na džinéna Odolés, Kon bičhadiá Man.

²²Kóli Me te na javav i te na rakiráv lénge, tedy lénde na javélas grého; ne kakaná lénge nane otmekiben dre léngiro grého.

²³Odová, konéske na drógo Me som, odoléske isyn na drógo i Miro Dad.

²⁴Kóli Me te na keráv angíl lénde réndy, savé javír nikón na kerdiá, tedy lénde na javélas grého; ne kakaná ž jone dykhné len i usajékh bidykhena (na déna patýv) Man i Miré Dadés.

²⁵Ne mek te kerélpe lav, savó isyn čhindló dro léngiro Zakóno: ‘Jone bidykhena Man ni palsó’.

²⁶Kiéli javéla Obradypnaskiro (Utiešytielie) ke tumé, savés Me bičhaváva tuménge Miré Dadéstyr, jov isyn čačunó Dúho (Fáno), Jov džála Dadéstyr, Jov Kokoró javéla te dophenel pal Mánde.

²⁷Ne adiáke-pac' i tumé javéna te dophenen, pal-dová so tumé sánas Mánca samone anglypnástyr.