Read Biblija - Pe Baltitko Romani čib (Romanes) 2019 Baltic Romani Bible Iáno 16 Bible Online

Iáno 16 - Biblija - Pe Baltitko Romani čib (Romanes) 2019 Baltic Romani Bible bible

Iáno 16

¹Me phendjom davá tuménge, sob (kaj) tumé te na otperen.

²Tumen tradéna javrí khangir'jendyr; i javéla dasavo časo (cýro), kiéli odová manúš, savó zamarela tumen, javéla te duminel, so jov dalésa dynarinela Devléske.

³Jone javéna te kerén adiáke, pal-dová so adalé manušá na džindlé ni Dadés, ni Man.

⁴Ne Me phendjom tuménge davá vaš dová, sob (kaj) tumé, kiéli javéla odová časo, te ripirén, so Me rakirdjom tuménge pal davá; Me angledýr na rakirdjom tuménge pal davá, pal-dová so Me sómas tuménca.

⁵Ne kakaná Me džáva ke Odová, Kon bičhadiá Man, ne nikón tuméndyr na phučela Mándyr: ‘Karik Tu džása?’

⁶Ne doléstyr, so Me phendjom dová tuménge, tumaró iló jaciá te piridživel.

⁷Ne Me, čačes, rakiráva tuménge: fedýr vaš tuménge, sob (kaj) Me te džav; kóli Me na džáva, tedy Obradypnaskiro na javéla ke tumé, ne kóli Me džáva, tedy Me bičhaváva Les ke tumé.

⁸I, kiéli Jov javéla, bangiakirela svéto pal grého, i pal čačipén, i pal séndo:

⁹pal grého, savó isyn dre dová, so manušá na patiána dre Mánde;

¹⁰pal čačipén, so Me džáva ke Miro Dad, i tumé butýr na dykhéna Man;

¹¹pal séndo, so kadalé svetoskiro králi javéla sendindlo.

¹²Kakaná but so isyn te phenáv tuménge, ne tumé akaná na moginéna te ĥaljon.

¹³Kiéli javéla Jov, čačipnáskiro Dúho (Fáno), tedy sykavéla tuménge čačunó drom dro džiibén; pal-dová so Jov javéla te rakirél na Kokoró Péstyr, ne Jov phenéla tuménge odová, so šunéla, i Jov phenéla, so javéla angíl.

¹⁴Jov slavinela Man, pal-dová so saró, so Jov phenéla, Jov udžinela Mándyr i rosphenéla tuménge.

¹⁵Saró, so isyn Dadéste, isyn Miro. Paldavá Me phendjom tuménge, so Jov Mándyr udžinela i rosphenéla tuménge.

¹⁶Syg tumé na dykhéna Man, ne syg tumé nevéstyr javéna te dykhén Man; pal-dová so Me džáva ke Dad.”

¹⁷Adáj vari-savé Léskire sykliaibnýtka phendlé jekh jekhéske: “So davá Jov rakiréla aménge: ‘Syg tumé na javéna te dykhén Man’, a syg tumé nevés dykhéna Man, i: ‘Me džáva ke Dad’?”

¹⁸I adiáke jone rakirdé: “So da dasavo Jov rakiréla: ‘Syg?’ Ame na ĥaljovasa, so Jov rakiréla.”

¹⁹Isúso ĥalyjá, pal so jone kaména te phučén Léstyr, i phendiá lénge: “Ci pal dová tumé phučena jekh jekhestyr, so Me phendjom: ‘So syg tumé na javéna te dykhén Man, ne nevéstyr syg tumé dykhéna Man?’

²⁰Čačes, čačes rakiráva Me tuménge: tumé javéna te rovén i te piridživen, ne svéto javéla te radynélpe; tumé javéna te smentninen (te tuginen), ne tumarí smentnyma jačéla radymása.

²¹Džuvlý, kiéli bijanéla, menčynelape, pal-dová so javdiá lákiro mardó (štúnda); ne kiéli joj bijanéla tyknores, bistrela radymátyr pal mén'ki, pal-dová so bijándyja manúš pe svéto.

²²Adiáke-pac' i tumé kakaná san smentna; ne Me javáva te dykháv nevéstyr tumen, i iló tumaró javéla pherdó radymása, daja rádyma tuméndyr nikón na otlela.

²³I dro odová dyvés tumé na phučena Mándyr ni pal so. Čačes, čačes Me rakiráva tuménge: pal so tumé te na mangén Dadés Miré lavéstyr, Jov déla tuménge.

²⁴Ke davá časo tumé nisó na mangné Miré lavésa, mangén, i doreséna, sob (kaj) rádyma dro tumaró iló te javél pherdý.

²⁵Ke davá časo Me rakirdjom tuménge pritčenca, ne syg javéla časo, kiéli Me na javáva te rakiráv tuménge pritčy, ne mamúj (priames) Me phenáva tuménge pal Dadéste.

²⁶Dre odová dyvés tumé javéna te mangén Miré lavéstyr i Me na rakiráva tuménge, so Me javáva te mangav pal tuménde Dadés:

²⁷pal-dová so Kokoreske Dadéske tumé san dróga, pal tumarí láska ke Me i pal patiaibén, so Me javdjom Devléstyr.

²⁸Me javdjom Dadéstyr dro davá svéto; i nevéstyr Me mekava svéto i džáva ke Dad.”

²⁹Léskire sykliaibnýtka phendlé Léske: “Ĥáda, kakaná Tu rakirésa mamúi, i Tu na rakirésa nisave pritčy!”

³⁰Kakaná ame dykhasa, so Tu saró džinésa angledýr, i na trej, sob (kaj) vari-kon te phučel Tútyr; paldavá ame patiása, so Tu javdián Devléstyr.”

³¹Isúso otphendiá lénge: “Kakaná tumé patiána?

³²Ĥáda, syg poddžála mardó (štúnda), i podgíia kakaná, so tumé rosprastanape kažno dre péskiri rig i Man tumé jačkirena Jekhés; ne Me na som Jekhdžinó, pal-dová so Dad isyn Mánca;

³³ĥáda, Me phendjom tuménge, sob (kaj) tumé te javén dro ramánjo Mánca. Dro svéto mén'ki tumen užakiréna; ne rikirenpe murškanés: Me zbierdyndjom (pirizorjakirdjom) davá svéto”