Read Biblija - Pe Baltitko Romani čib (Romanes) 2019 Baltic Romani Bible Iáno 17 Bible Online

Iáno 17 - Biblija - Pe Baltitko Romani čib (Romanes) 2019 Baltic Romani Bible bible

Iáno 17

¹Paló dalé lavá Isúso ĥazdyjá péskire jakhá pe bolybén i phendiá: “Dádo! Miro mardó (časo) javdiá: slavin Péskire Čhavés, sob (kaj) Čhavó te slavinel Tut,

²adiáke-pac', syr Tu dyján Léske pravo pe kažno loč (plot'), adiáke-pac' i Jov déla viéčno džiibén odolénge, konés Tu dyján Léske.

³A viéčno džiibén isyn dro dová, sob (kaj) te džinén Tut, Jekhés Čačipnaskire Devlés, i Isusós Xristosós, Saves Tu bičhadian.

⁴Me slavindjom Tut pe phuv, kerdjom butý, saví Tu dopatiandyjan Mánge te keráv.

⁵I kakaná, Dádo, slavin Man slavása, saví sys Mánde, kiéli Me sómas Túte angíl, syr svéto sys sozdynó.

⁶Me otčhakirdjom lav Tyró manušénge, savén Tu dyján Mánge svetóstyr. Adalé manušá sys Tyré, i Tu Mánge dyján len, i jone rakhne Tyró lav.

⁷Kakaná jone ĥalyné, so saró, so Tu dyján Mánge, isyn Tútyr;

⁸pal-dová so lav, savó Tu Mánge dyján, Me dyjom lénge, i jone prilyné les i čačunés ĥalyné, so Me javdjom Tútyr, i jone patiána, so Tu bičhadian Man.

⁹Ake, Me mangáva pal lénde: Na pal saró svéto mangáva, a pal odolénde, savén Tu dyján Mánge, pal-dová so jone isyn Tyré.

¹⁰Pal-dová so saró, so isyn Mánde-Tyró, i Miro saró, so isyn Túte, i dre lénde Me proslavindjompe.

¹¹Me na som butýr dro svéto, a jone isyn dro svéto. Me džáva ke Tu, ne jone jačénape dro svéto. Svénto Dádo! Zrákh len Tyré lavésa, odolén, savén Tu dyján Mánge, sob (kaj) jone te javén pal jekh, syr i Ame sam Túsa.

¹²Kiéli Me sómas lénca dro svéto, Me prirakhavas len Tyré lavésa; odolén, savén Tu dyján Mánge, Me prirakhcjom, i nikón léndyr na xasijá apríč čhavéste, savéske trej te xasjol, mek te spolninélpe Svénto Čhinybén.

¹³Kakaná Me džáva ke Tu, i davá Me rakiráva, paka Me som dro svéto, sob (kaj) lénde te javél Mirí pherdý rádyma dre péste.

¹⁴Me piridyjom lav Tyró lénge, i svetoske sys drieván na pir iló, pal-davá so jone nane dalé svetóstyr, syr i Me na som dalé svetóstyr.

¹⁵Me na mangáva, sob (kaj) Tu te les len svetóstyr, ne sob (kaj) Tu te prirakhes len čoripnástyr;

¹⁶jone isyn na dalé svetóstyr, syr i Me na som dalé svetóstyr.

¹⁷Ker len sventonenca Tyré čačipnása. Tyró lav isyn čačipén.

¹⁸Syr Tu bičhadian Man dre svéto, adiáke-pac' i Me bičhadjom len dro davá svéto.

¹⁹Me otdyjom pes Túke pal lénde, sob (kaj) i jone te otdén pes Túke pir čačipén.

²⁰Ne Me mangáva na pal jekhende lénde, ne i pal odolénde, savé patiána dre Mánde pir léngiro lav;

²¹sob (kaj) jone te javén saré syr jekh, syr Tu, Dádo, san dre Mánde, i Me som dre Túte, adiáke-pac' Me i jone te javén dre Aménde, mek te upatial svéto, so Tu bičhadian Man.

²²I bari patýv, saví Tu dyján Mánge, Me dyjom lénge: mek te javén jone pal jekh, syr Ame sam Túsa jekh.

²³Me som dre lénde, i Tu san dre Mánde; mek jone te javén skedyné dro jekh, i mek svéto te džinél, so Tu bičhadian Man, i so Túke jone isyn dróga, adiáke-pac', syr i jone jačné dróga Mánge.

²⁴Dádo! Savén Tu dyján Mánge, jone jačné dróga Mánge, sob (kaj) jone te javén odój khetané Mánca, kaj i Me; mek jone te dykhén Mirí bari patýv, saví Tu dyján Mánge, pal-dová so Túke Me jacjom drógo angíl, syr svéto sys sozdynó.

²⁵Čačunó Miro Dádo! I svéto na udžindiá Tut: a Me udžindjom Tut, i jone udžindlé, so Tu bičhadian Man;

²⁶i Me sykadjom lénge Tyró lav i Me javáva te sykavav, sob (kaj) doiá láska, saví isyn Túte ke Me, te javél dre lénde, syr i Me som dre lénde.”