Read Biblija - Pe Baltitko Romani čib (Romanes) 2019 Baltic Romani Bible Iáno 18 Bible Online

Iáno 18 - Biblija - Pe Baltitko Romani čib (Romanes) 2019 Baltic Romani Bible bible

Iáno 18

¹Kiéli Isúso mekciá te rakirél, Jov gijá Péskire sykliaibnytkonénca pal Kiedronoskiri sýgno rékica (lenorí) pe dová štéto, kaj sys únta (sado), dre saví zagijá Jov Kokoró i Léskire sykliaibnýtka.

²O Juda, Léskiro zdyibnari, džindiá davá štéto, pal-dová so Isúso skedelaspe but móly Péskire sykliaibnytkonénca odój.

³I, ĥáda, Juda lyjá xievra xaladén i dynar'jén, rašángire barydyrendyr i Farisijendyr, i jone javné odorík zahačkirde jagenca, jagengirenca i kurtalenca.

⁴Isúso džindiá saró, so javéla Lésa, vygijá ke jone i phuciá léndyr: “Konés tumé rodéna?”

⁵Léske otphendlé: “Isusós Nazariejos.” Isúso phendiá lénge: “Ĥáda, som Me.” O Juda, Léskiro zdyibnari, sys terdó khetané lénca.

⁶I kiéli Isúso phendiá lénge: “Ĥáda, Me som”, jone dynepe pale i pyné pe phuv.

⁷Nevéstyr Jov phuciá léndyr: “Konés tumé rodéna?” Jone phendlé: “Isusós Nazariejos.”

⁸Isúso otphendiá: “Me phendjom tuménge, so davá som Me; kóli tumé rodéna Man, mek te džán adalé manušá,

⁹mek te kerélpe lav, savó Jov phendiá: “Odoléndyr, savén Tu Mánge dyján, Me ni jekhés na xasiakirdjom”.”

¹⁰Símono (Simieono), adavá-pac' Pétri, savéste sys kurtála, vytyrdyja la i čingirdia lása dynarís rašángire barydyreskires i otčingirdia léske čačó kan. Adalé dynarís khardé Malho.

¹¹Ne Isúso phendiá Petriske: “Čhuv pale kurtála; naúšto Mánge te na pjáv davá tahtái, savó Dad dyjá Mánge?”

¹²Tedy xaladé i léngire-tysjoncengiro barydyrá i Judéngire dynárja lyné Isusós, i phandle Les:

¹³angledýr jone lydžiné Les ke Anna; jov sys Kaiafaske sastro, savó sys pérvo rašángiro barydyró dro dová berš.

¹⁴Davá sys odová Kaiáfa, savó podphendia Judénge, so javéla fedýr, kóli jekh manúš xasjola pal saré manušénde.

¹⁵Pal Isusóste giné Símono Pétri i javír Léskiro sykliaibnýtko. Ne odová sykliaibnýtko sys džindló (pindžkirdo) rašángire barydyréske i jov gijá khetané Isusósa dre rašángire-barydyreskiri gréda (dvóro).

¹⁶Pétri ž jaciápe javrí pašýl pórta. Korigedýr (pozžedýr) javír sykliaibnýtko, savó sys džindló rašángire barydyréske, vygijá i pirirakirdia vudarengire rakhibnaskirjasa i zalydžijá Petris andré.

¹⁷Adáj vudarengiri rakhibnaskiri rakiréla Petriske: “Ci na san tu jekh kadalé Manušéskire sykliaibnytkonendyr? Jov phendiá: “Nad.”

¹⁸Sys šylalo, slúgi (dynárja) i dynaricy, kerdé jag i lyné te tatjon; Pétri adiáke-pac' sys terdó khetané lénca i tatija.

¹⁹Rašángiro barydyró phuciá Isusóstyr pal Léskire sykliaibnytkonende i pal Léskiro sykliakiribén.

²⁰Isúso otphenélas léske: “Me rakirdjom mamúj (priames) angíl sarénde; Me ŭsády (sak) sykliakirdjom dre sinagoga i dre Khangirí, odój, kaj saré Judy skedénape, i Me čorahanés nisó na rakirdjom;

²¹so tu phučesa Mándyr? Phuč fedýr odoléndyr, savé šundlé, so Me rakirdjom lénge: jone džinéna, so Me rakirdjom.”

²²Kiéli Jov phendiá davá, jekh stregar'jendyr, savó sys terdó pašýl, pekadiá Isusós pir čam (ščoka), rakirí: “Syr Tu otphenesa rašángire barydyréske?”

²³Isúso otphendiá léske: “Kóli Me phendjom savó čoripén, sykáv Mánge dre so isyn čoripén; ne kóli saró lačhipén, sóske tu marésa Man?”

²⁴Anna bičhadiá phandles Les ke pérvo rašángiro barydyró Kaiáfa.

²⁵Símono (Pétri) sys terdó pašýl jag i tatija. Adáj phendlé léske: “Ci na san i Tu Léskire sykliaibnytkonendyr? Jov na priĥalyjape i phendiá: “Nad.”

²⁶Jekh rašángire-barydyreskiro dynári, seménca odoléske, savéske Pétri otčingirdia kan, rakiréla: “Ci na tut me dykhcjom khetané Lésa dre únta (sado)?”

²⁷Pétri nevéstyr na priĥalyjape; i dre dová-pac' časo probagandia bašno.

²⁸Kaiafastyr lydžiné Isusós dre Rimoskiri prietorija; davá sys zlóko (ránko). I jone na giné dro kher, sob (kaj) te na magirenpe, tedy jone na moginénas te svenkinen Patradí.

²⁹Paldavá Piláto gijá ke jone i phuciá: “Dro so tumé bangiakirena Adalé Manušés, Saves tumé jandlé ke me?”

³⁰Jone otphendlé léske: “Kóli (so) Jov te na javél bangó, ame na janasas Les ke tu pe séndo.”

³¹Piláto phendiá lénge: “Len Les tumé kokoré i sendinén Les pir péskiro Zakóno.” Judy rakiréna léske: “Aménge naštý te muliakiras nikonés”;

³²mek te spolninélpe Isusóskiro lav, savó phendiá Jov, savé Jov délas te ĥaljon, savé meribnasa Jov meréla.

³³Tedy Piláto risijá dre prietorija, khardiá Isusós i phuciá Léstyr: “Tu san Judéngiro Králi?”

³⁴Isúso otphenélas léske: “Ci Tu Kokoró péstyr davá rakirésa, ci manušá phendlé túke pal Mánde?”

³⁵Piláto otphenélas: “So Me som Judo? Tyré manušá i rašángire barydyrá jandlé Tut ke me; so Tu dasavo kerdián?”

³⁶Isúso rakiréla: “Miro Kralipén isyn na dalé svetóstyr: kóli Miro Kralipén te javél dalé svetóstyr, tedy Miré dynárja javénas te marénpe pal Mánde; sob (kaj) Man te na zden Judénge; ne dykhén, Miro Kralipén isyn na dalé svetoskiro.”

³⁷Piláto rakiréla Léske: “Ake, adiáke Tu san Králi?” Isúso otphenéla: “Tu ž rakirésa, so Me som Králi. Me vaš davá bijandyjom i vaš davá javdjom pe svéto, sob (kaj) te dophenav pal čačipén; kažno, konéske isyn pir iló čačipén, šunéla zan Mirí”

³⁸Piláto rakiréla Léske: “So da dasavo isyn čačipén?” I phení davá, Piláto vygijá ke Judy i phendiá lénge: “Me nisaví bang na lathjom dre Léste.

³⁹Tuménde isyn prisykliaiben, sob (kaj) me te otmekav jekhe bešybnaris tuménge pe Patradí; ci kaména tumé te otmekav Judéngire Kralís tuménge?”

⁴⁰Tedy jone jačné te den gódla saré, rakirí: “Na Les, a Varavas.” Adavá Varava sys rozmaribnari.