Read Biblija - Pe Baltitko Romani čib (Romanes) 2019 Baltic Romani Bible Iáno 2 Bible Online

Iáno 2 - Biblija - Pe Baltitko Romani čib (Romanes) 2019 Baltic Romani Bible bible

Iáno 2

¹Pe tríto dyvés sys bjav dre Kaná, saví sys dre Galiliéia, i Isusoskiri Daj sys odój.

²Isúso adiáke-pac' sys khardo Péskire sykliaibnytkonénca pe bjav.

³I syr na jaciá butýr mol (vino), to Isusoskiri Daj rakiréla Léske: “Lénde nane butýr mol”

⁴I rakiréla láke Isúso: “Vaš so Tu rakirésa davá Mánge, Drógo Džuvlije? Miro mardó (štúnda) te keráv Devléskire-Dadéskiri vólia iščo (inké) na javdiá.

⁵Léskiri Daj phendiá dynar'jénge: “So Jov phenéla tuménge, kerén dová.”

⁶Sys odój šov vučé baruné khoré (žbany), savé sys terdé vaš panitko obmoriben pir Judengiri maniera, dre savé zadžanas ke šel te biš litry paní.

⁷Isúso rakiréla lénge: “Čhuvén paní dre vučé khoré.” Dynárja čhudé paní dre khoré ke bregi.

⁸“Kakaná pheren i lydžán ke bjavitko phuredýr”, — rakiréla Isúso. I lydžiné.

⁹Kiéli bjavitko phuredýr pokoštyndia paní, savó jaciá syr mol, /ne jov na džindiá, katýr daja mol lyjape, jekh dynárja (služytieli) džindlé, savé ž čhudé dre vučé pirja paní/, Jov kharéla Ternes ke pe,

¹⁰i rakiréla léske: “Saré manušá déna anglydyr lačhí mol, a syr matjona, korigedýr (pozžedýr) čhuvéna fujedýr; tu ž lačhí mol rakhcian ke davá časo.”

¹¹Adiáke Isúso sykadiá pérvo dívo pe bjav dre Kaná. Jov sykadiá Péskiri zor i sláva dalésa, i Léskire sykliaibnýtka (učeniki) patiandyné dre Léste.

¹²Paló davá javdiá Jov dro Kapiernaumo, i Lésa sys Daj, pšála i Léskire sykliaibnýtka i jone javné odój nábut dyvesá.

¹³Kiéli javélas pir časo Judýtko Patradí, Isúso javdiá dro Jerusalimo.

¹⁴Jov lathiá dre Khangirí manušén, savé biknenas guruvén, bakrén i golumben; javír sys bešté i paruvenas lové;

¹⁵i kerdiá Isúso čhupny šolendyr, tradyjá len javrí sarén Khangirjátyr khetané bakrenca i guruvenca i obriskirdia lovengire-paruibnar'jengire skaminda i rosčhudiá léngire lové.

¹⁶I phendiá Isúso manušénge, savé biknenas golumben: “Zakeden len adathýr! Na kerén targo Miré-Dadéskire Kheréstyr.”

¹⁷Léskire sykliaibnýtka priripirde, so sys čhindló dre Svénto Čhinybén: “Zevlynyben (Rievnost') ke Tyró Kher javéla te xačkirel Man syr jag.”

¹⁸Judy lyné te trebinen Léstyr otphenybén: “Sósa Tu dophenesa aménge, so túte isyn pravo te kerés adiáke?”

¹⁹Isúso phendiá lénge dre otphenybén: “Rosphagiren daja Khangirí, i Me pal trin dyvesá ĥazdáva la nevéstyr.”

²⁰Tedy Judy rakiréna Léske: “Štardešá šov berš kerdé daja Khangirí i Tu pal trin dyvesá ĥazdesa la nevéstyr?”

²¹Isúso ž rakirdiá na pal baruny Khangirí, a Léste pe godý sys Léskire masá, Save isyn Khangirí.

²²Kiéli Jov otdžidyjá muléndyr, Léskire sykliaibnýtka priripirde davá, i patiandyné Sventoné Čhinybnaske i lavéske, savó Isúso phendiá.

²³Dro dová časo, kiéli Isúso sys pe Patraditko svénko dro Jerusalimo, but manušá, savé dykhné dívy, savé Jov kerdiá, patiandyné dre Léskiro lav.

²⁴Isúso Kokoró nikonéske léndyr na dopatialas Pes, pal-dová so Jov džindiá len sarén.

²⁵Léske na treindiá te phučel pal manušéste, Jov Kokoró džindiá saró, so sys andrál manušéste.