Read Biblija - Pe Baltitko Romani čib (Romanes) 2019 Baltic Romani Bible Iáno 20 Bible Online

Iáno 20 - Biblija - Pe Baltitko Romani čib (Romanes) 2019 Baltic Romani Bible bible

Iáno 20

¹Dro pérvo kurkeskiro dyvés, pe zlóko, kiéli sys iščo (inké) kaló (cjomno), Maríia Magdalina javdiá ke koplíca, i dykhéla, so bar sys riskirdo zagiibnastyr dre koplíca.

²Joj adáj že prastyndoj javdiá ke Símono Pétri i ke javír Léskiro sykliaibnýtko, savó sys drógo Isusóske, i rakiréla lénge: “Jone lydžiné Ras-Devlés koplicatyr krig, i ame na džinása, karik jone čhudé Les.”

³Pétri i javír sykliaibnýtko giné ke koplíca.

⁴Jone prastándyne dujdžiné; ne javír sykliaibnýtko prastándyja sygedýr Petristyr i jov angledýr javdiá ke koplíca.

⁵I jov bandija i dykhciá pašté pohtana, ne jov na zagijá andré dre koplíca.

⁶Palál pal léste priprastandyja Símono Pétri, i zagijá dre koplíca, i dykhéla, so pohtana sys pašté,

⁷i garaibnytko dykhlo, savésa sys obphandlo Léskiro šeró, i savó na sys khetané paštó garaibnytkone pohtanesa, ne sys skrencyndlo pe javír štéto.

⁸Tedy i javír sykliaibnýtko zagijá, savó angíl priprastandyja ke koplíca, jov dykhciá, i upatiandyja;

⁹pal-dová so jone ješče na džindlé Sventoné Čhinybnástyr, so Léske treindiá te otdžidjol muléndyr.

¹⁰Tedy Léskire sykliaibnýtka risiné kheré.

¹¹Ne Maríia sys terdy pašýl koplíca i rondiá. I kiéli joj rondiá, joj bandija i zadykhcia dre koplíca,

¹²i joj dykhciá dujén Jangolen, savé sys bešté dre parny ídia pe dová štéto, kaj sys paštó Isusóskiro trúpo, jekh dre šeró, javír pašýl ĥerá.

¹³I jone rakiréna láke: “Džuvlije! Sóske tu rovesa?” Joj rakiréla lénge: “Jone lydžiné krig miré Ras-Devlés, i me na džinóm, karik jone čhudé Les.”

¹⁴Syr joj phendiá davá, joj obrisija pale i dykhciá Isusós, Savó sys terdó angíl láte; ne joj na ĥalyjá, so davá sys Isúso.

¹⁵Isúso rakiréla láke: “Džuvlije! Sóske tu rovesa? Konés tu rodesa?” Joj dumindia, so davá isyn butiarno, savó keréla butý dre bar, i rakiréla Léske: “Hulájo! Kóli (so) tu vylydžijan Les, phen mánge, kaj tu čhudián Les, i me láva Les.”

¹⁶Isúso rakiréla láke: “Marije!” Joj obrisija i phendiá Léske judytkes: “Ravvuni!” (so značynéla “Sykliakiribnáskiro!”)

¹⁷Isúso rakiréla: “Na čilav Man, pal-dová so Me na risijom ke Miro Dad; džá ke Miré pšála i phen lénge: “Me risjováva ke Miro Dad i tumaró Dad i ke Miro Devél i ke tumaró Devél”.”

¹⁸Maríia Magdalina gijá ke sykliaibnýtka i phendiá lénge, so joj dykhciá Ras-Devlés i joj rosphendiá lénge dová, so Isúso phendiá láke.

¹⁹Dre doiá pérvo kurkeskiri bel'vél', kaj Léskire sykliaibnýtka sys khetané bešté pale zaphandle vudará darátyr Judendyr, javdiá Isúso, i terdijá maškirál, i rakiréla lénge: “Ramánjo (miro) tuménge!”

²⁰Kiéli Jov phendiá davá, Jov sykadiá lénge vastá i Péskire pašvare. Sykliaibnýtka drieván obradyndlepe, kiéli dykhné Ras-Devlés.

²¹Isúso phendiá lénge javír mólo: “Ramánjo tuménge! Syr Dad bičhadiá Man, adiáke i Me bičhaváva tumen.”

²²Kiéli Jov phendiá davá, Jov phurdyja pe lénde i phendiá lénge: “Prilén Svénto Dúho (Fáno):

²³konéske tumé javéna te primangen gréhi, odolénge javéna primangle, ne pe konéste tumé jačkirena, pe odolénde jone jačénape.”

²⁴O Famá, jekh dešedujendyr sykliaibnytkonendyr, savés khardé “Blizniako”, na sys lénca, kiéli Isúso javdiá.

²⁵Javír sykliaibnýtka phendlé léske: “Ame dykhciam Ras-Devlés.” Ne jov otphendiá lénge: “Kóli (so) me na dykháva špéra gvozdendyr (karfinendyr) pe Léskire vastá, i me na čhuváva miro angúšt dro štéto, kaj sys gvozdy (karfina), i me na čhuváva miro vast dre Léskire pašvare, Me na upatiava.”

²⁶Pir ohtó (bidujéngiro deš) dyvesá Léskire sykliaibnýtka nevéstyr saré khetané skedynépe dro kher, i Fama sys lénca. Javdiá Isúso, kiéli vudará sys zaphandle, terdijá maškír lénde, i phendiá: “Ramánjo tuménge!”

²⁷Tén'ci jov rakiréla Famaske: “De angúšt (pal'co) tyró adarík i podykh Miré vastá; de vast tyró i čhuv dre Miré pašvare; i pirijač te kuninespe, a patia.”

²⁸Fama phendiá Léske dro otphenybén: “Rajo Dévla miro i Devél miro!”

²⁹Isúso rakiréla léske: “Tu patiandyjan, pal-dová so tu dykhcián Man: ne bahtalé isyn kodolé, savé na dykhné Man, a jone upatiándyne.”

³⁰But javír znamiénii (ĥiertyká) kerdiá Isúso angíl Péskire sykliaibnytkonende, pal savé nane čhindló dre daja lylvarí;

³¹ne saró, so sys čhindló dre daja lylvarí, isyn vaš tuménge, sob (kaj) tumé te patián, so Isúso isyn Xristóso, Devléskiro Čhavó, i pir patiaibén dre Léste, tumé te dživén Léskire lavéstyr.