Read Biblija - Pe Baltitko Romani čib (Romanes) 2019 Baltic Romani Bible Iáno 21 Bible Online

Iáno 21 - Biblija - Pe Baltitko Romani čib (Romanes) 2019 Baltic Romani Bible bible

Iáno 21

¹Paló davá Isúso nevéstyr sykadiá Pes Péskire sykliaibnytkonénge pašýl Tivieriadoskiro mórjo (derjáv). Ake, syr davá sys:

²Símono Pétri sys khetané Famasa, Saves kharenas “Blizniako”, Nafanailo Kanatyr Galilejakirjatyr, i Zieviediejoskire čhavé, i duj javír Léskire sykliaibnýtka.

³Símono Pétri rakiréla lénge: “Me džáva te starav mačhen.” “I ame khetané džása túsa”, — jone rakiréna léske. Jone giné i bešné dre bárka, ne jone nisó na starde dre doiá rat.

⁴Ne kiéli sys tasiarla, Isúso sys terdó pe brégo; ne sykliaibnýtka na ĥalyné, so davá sys Isúso.

⁵Isúso rakiréla lénge: “Terné Manušále! Ci isyn tuménde vari-savó xabén?” Jone otphendlé Léske: “Nad.”

⁶Jov rakiréla lénge: “Začhurden khudý (sietka) pir čačí rig barkakiri i tumé uhtylena.” Jone začhurdyne khudý, i na mogindlé te vytyrden la, pal-dová so odój sys adákicy but mačhé.

⁷Tedy jekh sykliaibnýtko, savó sys drógo Isusóske, rakiréla Petriske: “Ĥáda, Raj Devél.” Símono Pétri, kiéli šundiá, so adavá sys Raj Devél, jov podphandiape idiasa, pal-dová so jov sys nango, i čhurdyjape dro paní;

⁸a javire sykliaibnýtka priplyvindle (dyne plima adarík) dre bárka, tyrdyi pal péste khudý pherdý mačhenca. Jone sys nádur bregostyr pašé šel mietry.

⁹Kiéli jone vyginé pe brégo, jone dykhné xačkirdé vangara, i pe lénde sys pašté mačhé i maró.

¹⁰Isúso rakiréla lénge: “Janén mačhé, savé tumé kakaná starde.”

¹¹Símono Pétri vygijá i vytyrdyja pe phuv khudý (sietka), so sys pherdý baré mačhenca, savén sys šel pandždešá trin; i na dykhí pe davá, so sys adákicy but mačhé, khudý na prokusciape.

¹²Isúso rakiréla lénge: “Javén te xan.” Nikoneste sykliaibnytkonendyr na sys murškipen te phučel Léstyr: “Kon Tu san?” Jone džindlé, so adavá sys Raj Devél.

¹³Isúso javélas pašedyr, lelas maró i délas sykliaibnytkonénge, adiáke-pac' i mačhé.

¹⁴Ĥáda, akaná tríto mólo Isúso sykadiá Pes Péskire sykliaibnytkonénge, korigedýr (pozžedýr) Léskire otdžidyipnastyr muléndyr.

¹⁵Kiéli jone xané, Isúso rakirélas Simonoske Petriske: “Simonie, Ianoskiro Čhavó! Ci som Me drógo túke butedýr léndyr?” Pétri rakiréla Léske: “Adiáke, Rajo Dévla! Tu džinésa, so Tu san drógo Mánge.” Isúso rakiréla léske: “Čaráv Miré sventoné bakrorén.”

¹⁶I javír mólo nevéstyr Isúso rakiréla léske: “Simonie, Ianoskiro Čhavó! Ci som Me drógo túke?” Pétri rakiréla Léske: “Adiáke, Rajo Dévla!” Tu džinésa, so me Tu san drógo mánge.” Isúso rakiréla léske: “Čaráv Miré bakrén.”

¹⁷I tríto mólo rakiréla léske Isúso: “Simonie, Ianoskiro čhavó! Ci som Me drógo Túke?” Pétri jaciá smentno, so dro tríto mólo Isúso phendiá léske: “Ci som Me drógo túke?”, i jov phendiá Isusóske: “Rajo Dévla! Tu saró džinésa; Tu džinésa, so Tu san drógo mánge.” Isúso rakiréla léske: “Čaráv Miré bakrén.

¹⁸Čačes, čačes Me rakiráva túke: kiéli tu sánas ternó, tu kokoró urjavesaspe i psirdian, karik tu kamdian; ne kiéli tu jačesa phuranó, tedy protyrdesa péskire vastá, i javír manúš urjavela tut i lydžála, karik tu na kamésa.”

¹⁹I phení davá, Isúso dyjá léske te ĥaljol, savé meribnasa Pétri proslavinela Devlés. Tén'ci Isúso rakiréla léske: “Džá pal Mánde.”

²⁰Pétri porisija i dykhéla, so pal léste džála sykliaibnýtko, savéske Isúso sykadiá i savó, kiéli jone xané, čhudiá šeró ke Isusóskiro kolýn i phuciá: “Rajo Dévla! Kon zdela Tut?”

²¹Pétri dykhciá les i rakiréla Isusóske: “Rajo Dévla! Ne so javéla lésa?

²²Isúso rakiréla léske: “Kiéli Me kamám, sob (kaj) jov te javél džidó paka Me javáva, so túke ke davá? Tu džá pal Mánde.”

²³I gijá davá lav maškír pšalénde, so odová sykliaibnýtko na meréla. Ne Isúso na phendiá léske, so jov na meréla, ne “Kóli Me kamám, sob (kaj) jov te javél džidó, paka Me javáva, so túke ke davá?”

²⁴Kadavá-pac' kokoró sykliaibnýtko, savó i dophendia pal davá, i saró davá začhindiá: i ame džinása, so léskiro dophenybén isyn čačunó.

²⁵But sys adiáke-pac' i javír réndy (diély), so Isúso kerdiá: ne, kóli sys te čhinen jekh pal davá, tedy pir saró svéto na uhtylelas (nádosi) štéto vaš adákicy lylvaria. Amín'.