Read Biblija - Pe Baltitko Romani čib (Romanes) 2019 Baltic Romani Bible Iáno 3 Bible Online

Iáno 3 - Biblija - Pe Baltitko Romani čib (Romanes) 2019 Baltic Romani Bible bible

Iáno 3

¹Sys manúš Farisiejendyr, jekh Judéngire-theméskire barydyrendyr, les khardé Nikadimo,

²savó javdiá ratý ke Isúso i phendiá Léske: “Ravvi! Ame džinása, so Tu san bičhadó Devléstyr syr Sykliakiribnáskiro, pal-dová so dasavé dívy, savé Tu kerésa, nikón na moginéla te kerél, kóli te na javél lésa Devél.”

³Isúso dro otphenybén phendiá léske: “Čačes, čačes Me rakiráva túke: kon na bijandjola nevéstyr, na dykhéla Kralipén dro Devléskiro Rajo.”

⁴Nikadimo phučela Léstyr: “Syr davá baró (stalo) manúš moginéla te bijandjol nevéstyr? Ci moginéla Jov nevéstyr te zadžál pale dre léskire-dakiri ločoví (utroba) i te bijandjol javír mólo?”

⁵Isúso otphendiá: “Čačes, čačes, Me rakiráva túke: kóli kon na bijandjola paniéstyr i Duhóstyr (Fanostyr), jov naštý te zadžál dro Kralipén dro Devléskiro Rajo.

⁶Kodová, so isyn bijandlo manušytkoné ločatyr, isyn manušýtka masá dre loč; kodová, so isyn bijandlo Duhóstyr, isyn dúho (fáno).

⁷Na divinenpe pe davá, so Me phendjom, so tuménge trej te bijandjon nevéstyr.

⁸Dúho (Fáno) phurdela, karik trej léske. Tu šunesa lákiri zan, i na džinésa, katýr joj lélape i karik joj kerlape. Adiáke isyn kažnoné manušésa, kon isyn bijandlo Duhóstyr.”

⁹Nikadimo phendiá i phuciá Léstyr: “Ci saštý (možna) dasavo te javél?”

¹⁰Isúso otphendiá léske: “Tu san Izrailjoskiro Sykliakiribnáskiro i tu na džinésa davá?

¹¹Čačes, Me čačes rakiráva túke: ame rakirasa pal dová, so ame džinása, i dophenasa pal dová, so ame dykhciam; a tumé manušá, so na priĥaljona amaró dophenybén.

¹²Kóli Me phendjom tuménge pal džiibén pe phuv, i tumé na patiána, syr tumé javéna te patián, kóli Me javáva te rakiráv tuménge pal džiibén dro Bolybnáskiro Rajo?

¹³Nikón na sys pe bolybén apríč Odoléste, kon gijá telé bolybnástyr, davá isyn Čhavó Manušéskiro, Savó dživéla dro Bolybnáskiro Rajo.

¹⁴Syr Mójza (Moisiejo) ĥazdyjá sapes pe čhučí phuv, adiáke Čhavéske Manušeskireske treindiá te javél ĥazdynó,

¹⁵sob (kaj) kažno, kon patiála dre Léste, te na xasjol, a te javél léste viéčno džiibén.

¹⁶Devléske adiáke jaciá drógo svéto, so Jov otdyjá Péskire Jekhebijanypnytkone Čhavés, sob (kaj) kažno, kon javéla te patial dre Léste, te na xasjol, a te javél léste viéčno džiibén.

¹⁷Devél na bičhadiá Péskire Čhavés dro svéto, sob (kaj) te sendiakirél svéto, a sob (kaj) pir Léste svéto te javél zrakhno.

¹⁸Odová, kon patiála dre Léste, sendiakirdo na javéla, a kon na patiála, isyn sendiakirdo, pal-dová so jov na patiandyja dre Jekhebijanypnytkone Devléskire-Čhavéskiro lav.

¹⁹Séndo isyn dre dová, so dud javdiá dro svéto, a manušénge butýr pir iló jaciá kalypén (cjomnyma), syr dud, pal-dová so léngire réndy (diély) sys nalačhé.

²⁰Kažno, kon keréla fuipén, léske isyn na pir iló dud (svéto), i jov na džála ke dud, pal-dová, sob (kaj) te jačen džindlé nalačhé réndy léskire.

²¹Ne odová, kon dživéla pir čačipén, džála ke dud, sob (kaj) te javén biciale léskire réndy, savé jov keréla pir Devléskiro lav.”

²²Paló davá javdiá Isúso Péskire sykliaibnytkonénca pe Judejakiri phuv i odój jaciápe lénca i boldia manušén.

²³Iáno dre dová-sámo časo boldia dro Jenono, so isyn pašýl Salimo, kaj sys but paní, i manušá javénas i jov boldia len.

²⁴Davá sys angíl, syr Ianos čhudé dro štaribén.

²⁵Jekhvar Ianoskire syklytkonende vygijá čingárd Judenca pal obmoriben pir Judýtko maniera.

²⁶Sykliaibnýtka javné ke Iáno i phendlé léske: “Ravvi! Odová manúš, Savó sys túsa pe Iordáno i pal Savéste tu dophenesas, ĥáda, Jov bolela, i saré džána ke jov.”

²⁷Iáno otphendiá i phendiá lénge: “Manúš naštý nisó te kerél kokoró péstyr, kóli na javéla dynó léske bolybnástyr.

²⁸Tumé kokoré san jakhítka Mánge dro dová, so me phendjom: ‘Me na som Xristóso, me sómas bičhadó angíl Léste’.

²⁹Terný isyn vaš Terneske, a Terneskiro drúgo (mal), savó isyn terdó pašýl, šunéla les i radynélape, kiéli šunéla, so jov rakiréla. Kadaja mirí baht javdiá sarésa ke me.

³⁰Léske trej te barjol, a mánge te tyknjovav.

³¹Kodová, Kon javdiá vučipnástyr, isyn vučedýr saréndyr; a kon bijándyja pe phuv isyn phuvitko, i rakiréla syr manúš, savó dživéla pe phuv. Kodová, Kon javdiá Bolybnáskire Rajostyr, isyn vučedýr saréndyr.

³²Jov dophenéla dová, so Jov kokoró dykhciá i šundiá, a nikón na priĥaljola Léskiro dophenybén.

³³Ne kon priĥaljola Léskiro dophenybén, odová dophenéla, so Devél isyn čačunó.

³⁴Pal-dová so Kodová, Konés bičhadiá Devél, rakiréla lavá Devléskire, pal-dová so Devél déla Péskiro Dúho (Fáno) Léske bi mierakiro.

³⁵Dadéske isyn drógo léskiro Čhavó i Jov saró otdyjá dre Léskire vastá.

³⁶Odová, kon patiála dre Devléskire Čhavéste, léste javéla viéčno džiibén; a kon na patiála dre Devléskire Čhavéste, odová na dykhéla džiibén, a Devléskiri xolý javéla pe léste saró viéko.”