Read Biblija - Pe Baltitko Romani čib (Romanes) 2019 Baltic Romani Bible Iáno 4 Bible Online

Iáno 4 - Biblija - Pe Baltitko Romani čib (Romanes) 2019 Baltic Romani Bible bible

Iáno 4

¹Isúso udžindiá, so Farisiéi šundlé, so Léste isyn butýr sykliaibnýtka, i so Jov bolela butedýr manušén, syr Iáno.

²Kokoró Isúso na boldia, Léskire sykliaibnýtka kerdé davá.

³Syr Jov udžindiá davá saró, tedy mekciá Judejakiri phuv i risijá pale dre Galiliéia.

⁴I trebindia Léske te džal pir Samárija.

⁵Ĥáda, Jov javdiá dre Samarijakiro fóro, savó khardé Sihar', pašýl félda, saví dyjá Jakovo péskire čhavéske Jozáske.

⁶Odój sys Jakovoskiri ĥanýng (kolodco). Isúso khinyja droméstyr i besciá te otkinjol pašýl ĥanýng; ĥáda, sys pašé šov mardé (štundy).

⁷Javdiá te pherel paní džuvlý Samarijatyr. ‘De Mánge te pjáv paní”, — rakiréla Isúso láke.

⁸Paldavá so Léskire sykliaibnýtka giné dro fóro te kinen xabén.

⁹Samarianka rakiréla Léske: “Syr? Tu san Judo, mangesa mándyr, Samariankatyr te p'jes? Réndo (diélo) dre dová, so Judy na piné jekhe kučikatyr Samarianenca.

¹⁰Isúso phendiá dro otphenybén láke: “Kóli tu džinesas, so Devél déla i Kon odová isyn, Savó rakiréla túke: “De Mánge te pjáv,’ tedy tu kokori mangesas Léstyr, i Jov délas túke džidó paní.”

¹¹Džuvlý rakiréla Léske: “Mro Rajo! Túte nane sósa te pheres paní i ĥanýng isyn xor: Katýr Túke te les džidó paní?”

¹²Tu, xaj, na san baredýr amaré dadéstyr Jakovostyr, savó dyjá daja ĥanýng aménge, pija jov kokoró, i čhavé léskire, i kherítka murdalá léskire (skoto)?”

¹³Isúso otphendiá láke: “Odová, kon p'jela davá paní, javéla te kamel nevéstyr te p'jel.

¹⁴Ne kon javéla te p'jel paní, savó Me dáva léske, odová na javéla te kamel te p'jel saró viéko; a paní, savó Me dáva léske, jačéla andrál manušéste ĥanyngasa vaš dasavo paní, savó lydžála dro viéčno džiibén.”

¹⁵Džuvlý rakiréla Léske: “Rajo! De mánge dasavo paní, sob (kaj) mánge te na javav te kamám butýr te pjáv i te na psirav adarík te pherav paní.”

¹⁶Isúso rakiréla láke: “Džá, khar péskire romes i jav adarík.”

¹⁷Džuvlý otphendiá i phendiá Léske: “Mánde nane rom.” Isúso rakiréla láke: “Čačipén tu phendián, so túte nane rom;

¹⁸túte sys pandž romá, a odová manúš, savésa tu kakaná dživesa, jov isyn na rom túke; davá čačipén tu phendián.”

¹⁹Džuvlý rakiréla Léske “Rajo! Me dykháva, so Tu san proróko.

²⁰Amaré dadá mangnepe Devléske pe daja bérga, ne tumé rakiréna, so štéto, kaj trej te mangespe Devléske, isyn dro Jerusalimo.”

²¹Isúso rakiréla láke: “Patia Mánge, džuvlý, so javéla časo (cýro), kiéli na pe daja bérga i na dro Jerusalimo javéna te mangénpe Dadéske.

²²Tumé na džinéna, konéske tumé mangénape: ne ame džinása, konéske mangasape, pal-dová so zrakhibén javéla Judendyr.

²³Ne javéla, i akaná javdiá časo, kiéli čačuné devlýtka javéna te den patýv pir dúho (fáno) i čačipén, pal-dová so adasaven devlytkonen rodéla Péske Devél Dad.

²⁴Devél isyn dúho (fáno), i kon mangelape Léske, trej te mangélpe, syr podphenela Léskiro Dúho (Fáno) dro čačipén.”

²⁵Džuvlý rakiréla Léske: “Me džinóm (džináv), so javéla Miesija, ĥáda, isyn Xristóso; kiéli Jov javéla, tedy Jov saró rosphenéla aménge.”

²⁶Isúso rakiréla láke: “Ĥáda, Me som Kodová, Kon rakiréla túsa.”

²⁷Dro davá časo (cýro) javné Léskire sykliaibnýtka i divindlépe, so Jov rakirdiá džuvliása; ne usajékh nikón na phuciá Léstyr: “So Tu phučesa?” Ci: “Pal so Tu rakirésa lása?”

²⁸Tedy džuvlý jačkirdiá péskiro khoró vaš paní, i gijá dro fóro, i phendiá manušénge:

²⁹“Džán, dykhén Manušés, Savó phendiá mánge saró, so me kerdjom, ci na Jov isyn Xristóso?”

³⁰I jone giné foróstyr i giné ke Isúso.

³¹Dro dová časo sykliaibnýtka mangné Les, rakirí: “Ravvi, xa vari-so!”

³²Ne Jov phendiá lénge: “Mánde isyn xabén, pal savó tumé na džinéna.”

³³Sykliaibnýtka lyné te rakirén maškír péste: “Ci moginéla te javél, so vari-kon jandiá Léske te xal?”

³⁴Isúso rakiréla lénge: “Miro xabén isyn te keráv vólia Odoleskiri, Kon bičhadiá Man, i te keráv Léskiro réndo.

³⁵Ci na tumé rakiréna, so pir štar čhoná javéla giveskiro čhinybén? Ne, ĥáda, Me rakiráva tuménge: ĥazdén péskire jakhá i dykhén pe féldy, syr Jone jačné parné ke sčhinyben.

³⁶Kon čhinela, léla pleskiriben i skedéla barjakirdó (plódo) dro viéčno džiibén i odová, kon sieinela i čhinela, javéna khetané te radynénpe.

³⁷Pal-dová so dro davá isyn čačunó phenybén: ‘Jekh sieinela, javír sčhinela’.

³⁸Me bičhadjom tumen te čhinen dová, so tumé na sieindle: javír odój sieindle, a tumé léna pleskiriben léngire butiátyr.”

³⁹But ž manušá Samarijatyr patiandyné dre Isusóste pir džuvliákiro lav, saví rosphenelas, so Jov phendiá láke saró, so joj kerdiá.

⁴⁰I kiéli Samariani javné ke Jov, jone lyné te mangén Les te jačélpe lénde, i Jov jaciápe odój pe duj dyvesá.

⁴¹Kiéli Jov rakirdiá lénca, but manušá patiandyné dre Léste pir Léskiro lav.

⁴²Jone phendlé odolé džuvliáke: “Kakaná ame patiása na jekhe tyré lavenge, so tu aménge rosphendian. Ame šundiám kokoré Les i džinása, so Jov isyn čačunó svetoskiro Zrakhibnari.”

⁴³Pir duj dyvesá Isúso gijá Péske odothýr dre Galiliéia,

⁴⁴paldavá, so Jov kokoró dophenelas, so prorokós na kutiakirena pe léskiri phuv.

⁴⁵Ne kiéli Jov javdiá dre Galiliéia, Galilejakire manušá prilyné Les ilésa. Jone kokoré sys pe Svénko Patradí dro Jerusalimo i dykhné saró, so Jov odój kerdiá pe svénko.

⁴⁶Adiáke Isúso nevéstyr javdiá dre Galilejakiri Kaná, kaj Jov paniéstyr kerdiá mol (vino). Odój sys vari-savó kralískiro manúš, savéste dre Kapiernaumo sys nasvaló čhavó.

⁴⁷Kiéli adavá manúš šundiá, so Isúso risijá Judejátyr dre Galiliéia, to jov javdiá ke Jov i jaciá te mangél Les, sob (kaj) Jov te sastiakirel Léskire čhavés, savó sys nasvaló ke meribén.

⁴⁸Isúso phendiá léske: “Tumé manušá na moginéna te patián, paka tumé dykhéna znamiénii (ĥiertyká) i dívy.”

⁴⁹Kralískire-kheréskiro barydyró rakiréla Léske: “Rajo Dévla! Jav, paka miro čhavoró na myjá.

⁵⁰Isúso rakiréla léske: “Džá kheré, tyró čhavó javéla te dživél”, i adavá manúš patiandyja Isusóskire lavenge i gijá.

⁵¹Jov sys iščo (inké) dro drom, Léskire pishárja pirilyne les i phendlé: “Tyró čhavó isyn džidó.”

⁵²Jov phuciá léndyr, dro savó mardó (časo) léske jaciá lokhedýr. Jone phendlé: “Atasiá dro eftáto (bitrinéngiro déšto) mardó xačkiribén pyjá.

⁵³I dad udžindiá, so davá sys dre dová-pac' časo, kiéli Isúso phendiá léske: “Tyró čhavó javéla te dživél”, i jov kokoró, i saré Léskire kheréstyr upatiándyne.

⁵⁴Davá sys javír dívo, savó kerdiá Isúso, kiéli Jov javdiá Judejátyr dre Galiliéia.