Read Biblija - Pe Baltitko Romani čib (Romanes) 2019 Baltic Romani Bible Iáno 6 Bible Online

Iáno 6 - Biblija - Pe Baltitko Romani čib (Romanes) 2019 Baltic Romani Bible bible

Iáno 6

¹Paló davá Isúso gijá pe javír Galilejakire ci Tivieriadaskire-morjoskiri rig.

²I but manušá giné pal Léste, pal-dová so jone dykhné dívy, savé Jov kerdiá, kiéli sastiakirdia nasvalen.

³Isúso gijá upré pe bérga i odój besciá Péskire sykliaibnytkonénca.

⁴Javélas sýges Judýtko svénko, Patradí.

⁵Isúso ĥazdyjá jakhá i dykhciá, so but manušá džána ke Jov, rakiréla Filiposke: “Kaj aménge te kinas maró, sob (kaj) te čaliakiras len?”

⁶Jov rakirdiá davá vaš dová, sob (kaj) te propatiakirel Filipos: Jov kokoró džindiá, so Jov javéla te kerél.

⁷Filipo otphendiá Léske: “Duj šelá dinarja na uhtýlla (nádosi) lénge pe maró, sob (kaj) kažnonéske léndyr te das pir kotér (kusko).”

⁸Jekh Léskire sykliaibnytkonendyr, ĥáda, sys Jendri (Andriejo), pšal Simonoskire Petriskiro, rakiréla Isusóske:

⁹“Adáj iekhe rakloreste isyn pandž ĥerstytka (jačmienitka) maré i duj mačhore; ne so davá vaš adákicy manušénge?”

¹⁰Isúso phendiá: “Phenén lénge te bešén.” Dre dová štéto sys ĥensto čar. I manušén, savé bešné pe čar, sys pašé pandž tysjoncy.

¹¹Isúso lyjá maró i parikirdia dre mangipén Devléske, rozdyja sykliaibnytkonénge i sykliaibnýtka dyné manušénge, savé sys bešté, i dová-pac' Jov kerdiá i mačhenca i dyjá kažnonéske, ci but, kon kamdiá.

¹²Kiéli saré manušá čalyne, Isúso phendiá Péskire sykliaibnytkonénge: “Keden koterá (kuski), savé jačnépe, sob (kaj) nisó te na xasjol.”

¹³Jone kedyne dešudúj pherdé korzíny (khudé) koterenca, savé jačnépe paló (poslie) odolénde, kon xaja pandžendyr ĥerstytkone marendyr.

¹⁴Manušá dykhné, savó dívo Jov kerdiá i jone phendlé: “Davá isyn kodová čačunó Proróko, Savéske Trej bangó te javél dro svéto.”

¹⁵Isúso ĥalyjá, so jone kaména te javén i te začhuven Les zorjása te javél kralísa; Jov nevéstyr gijá léndyr jekhdžinó pe bérga.

¹⁶Kiéli javdiá bel'vél', Léskire sykliaibnýtka giné ke mórjo (derjáv).

¹⁷I jone bešné dre bárka, i tradyne pe javír morjoskiri rig, dro Kapiernaumo. Jaciá kaló (cjomno), a Isúso na džálas ke jone.

¹⁸Phurdelas zoralý balvál, i mórjo (derjáv) kuninelaspe.

¹⁹Kiéli jone otplyvindle (dyne plíma duredyr) pe trin ci štar versty, tedy jone dykhné, so Isúso džálas pir mórjo (derjáv) ke bárka, i jone strahádyne.

²⁰Ne Jov phendiá lénge: “Ĥáda, Me som, na andyršan”

²¹Jone kamlé te len Les dre bárka, ne dre dová-pac' momiento bárka podtradyja ke brégo, odorík, karik jone plyvindle.

²²Pe javír dyvés manušá, savé sys terdé pe doiá morjoskiri rig, dykhné, so odój apríč jekh bárka, dre saví Léskire sykliaibnýtka bešné, javír na sys, i so Isúso na tradyjá dre doiá bárka Léskire sykliaibnytkonénca, i so Léskire sykliaibnýtka tradyne jekhdžine.

²³Tedy ke brégo podtradyne i javír barki Tivieriadatyr ke dová štéto, kaj jone xané maró, savó Isúso bahtiakirdiá dro Devléskiro mangipén.

²⁴I kiéli manušá dykhné, so nane adáj ni Isusós, ni Léskire sykliaibnytkonén, jone bešné dre barki i tradyne dro Kapiernaumo te rodén Les.

²⁵Jone lathné Les pe javír morjoskiri rig i phendlé Léske: “Sykliakiribnáskiro! Kiéli Tu javdián adarík?”

²⁶Isúso phendiá lénge dro otphenybén: “Čačes, Me rakiráva tuménge: tumé rodéna Man na paldová, so dykhné dívy, a pal-dová, so tumé xané maró i čalyne.

²⁷Na kerén butý pal xabén, savó pe jekh mólo, a rodén dová xabén, savó javéla dre viéčno džiibén; davá xabén kaméla Manušéskiro Čhavó te del tuménge, — pal-dová so pe Léste čhudiá Devél Dad Péskiri čergenorí, so Jov bahtiakiréla davá.”

²⁸Jone phučné Léstyr: “So aménge trej te kerás vaš dová, sob (kaj) amaré réndy (diély) te javén lačhé vaš Devléske?”

²⁹Isúso phendiá lénge dro otphenybén: “Ĥáda, isyn tumaró réndo vaš Devléske, sob (kaj) tumé te patián dre Odoléste, Konés Jov bičhadiá.”

³⁰Jone phučné Léstyr: “Saví ĥiertýk (znamiénijo) Tu sykavesa aménge, sob (kaj) aménge te dykhas la i te patias Túke? So Tu kerésa?

³¹Amaré dadá xané mannovo khurmi pe čhučí phuv, syr pal davá isyn čhindló dro Svénto Čhinybén: ‘Jov dyjá maró bolybnástyr te xan.’”

³²Isúso phendiá lénge: “Čačes, Me rakiráva tuménge: davá isyn na Mójza (Moisiejo) dyjá maró tuménge Bolybnástyr, a Miro Dad déla tuménge čačunó maró bolybnástyr.

³³Pal-dová so Devléskiro maró isyn Odová, Savó javéla (džála telé) bolybnástyr i déla džiibén svetoske.”

³⁴Tedy jone phendlé Léske: “Rajo Dévla! De aménge ŭsády (sak) davá maró.”

³⁵Isúso phendiá lénge: “Me kokoró som džiibnáskiro maró; odová, kon javéla ke Me, na javéla nijékhvar bokhalo, i odová, kon patiála dre Mánde, nijékhvar na javéla te kamel te p'jel.

³⁶Ne syr Me rakirdjom, so tumé dykhné Man, i usajékh tumé na patiána.

³⁷Saró, so déla Mánge Dad, javéla ke Me, i odolés, kon ke Me javéla, Me na tradava javrí.

³⁸Pal-dová so Me javdjom bolybnástyr na vaš davá, sob (kaj) te keráv dová, so Me kokoró kamám, ne, sob (kaj) te keráv pir Miré-Dadéskiri vólia, Savó bičhadiá Man.

³⁹A vólia Miré Dadéskiri, Savó bičhadiá Man, isyn dasaví, sob (kaj) nisó odoléstyr, so Jov dyjá Mánge te na xasiakiráv, ne saró dová te otdžidiakirav dro palatunó (posliednjo) dyvés.

⁴⁰A vólia Miré Dadéskiri, Kon bičhadiá Man, isyn dasaví, sob (kaj) kažno, kon dykhéla Čhavés i patiála dre Léste, te javél léste viéčno džiibén; i Me les otdžidiakirava dro palatunó (posliednjo) dyvés.”

⁴¹E Judy rakirdé xoliames pe Léste pal dová, so Jov phendiá: “Me som maró, savó javdiá bolybnástyr.”

⁴²Jone rakirdé: “Ci davá Isúso isyn čhavó Jozaskiro (Iosifoskiro), Saveskires Dadés i Da ame džinása? Syr Jov moginéla te rakirél: “Me javdiem bolybnástyr?”

⁴³Isúso phendiá lénge dro otphenybén: “Na rakirén xoliames maškír péste.

⁴⁴Nikón na moginéla te javél ke Me, kóli na priterdela les ke Pe Dad, Savó bičhadiá Man; i Me otdžidiakirava les dro palatunó dyvés.

⁴⁵Ake, isyn čhindló: ‘Javéna saré sykliakirdé Devléstyr’. Kažno, kon šundiá Dadés i syklyja Léstyr, javéla ke Me;

⁴⁶nikón i na dykhciá Dadés, apríč Odoléste, Kon javdiá Devléstyr, jekh Jov dykhciá Dadés.

⁴⁷Čačes, čačes Me rakiráva tuménge: odová, kon patiála dre Mánde, kodoléske délape viéčno džiibén’.

⁴⁸Me som džiibnáskiro maró.

⁴⁹Maro, savó javéla bolybnástyr, isyn dasavo, so kon xála les, odová na meréla.

⁵⁰Tumaré dadá xané khurmi pe čhučí phuv i myné.

⁵¹Me som džidó maró, savó javdiá bolybnástyr; kon javéla te xal Miro maró, odolé manušéske délape viéčno džiibén; maró, savó Me dáva, isyn Mirí loč (masá), savé Me otdáva, sob (kaj) svéto te dživél.”

⁵²Tedy Judy jačné te čingardenpe maškír péste, i jone rakirdé: “Syr da Jov moginéla te del te xas aménge Léskiri loč (plot')?”

⁵³Isúso phendiá lénge: “Čačes, čačes Me rakiráva tuménge: kóli tumé na javéna te xan Manušéskire-Čhaveskiri loč i na javéna te p'jen Léskiro rat, tedy tuménde na javéla džiibén dre péste.

⁵⁴Odová, kon xála Mirí Loč i p'jela Miro Rat, odoléske délape viéčno džiibén, i Me otdžidiakirava les dro palatunó dyvés;

⁵⁵pal-dová so Loč Mirí isyn čačunó xabén, i Rat Miro isyn čačunó pibén;

⁵⁶kon xála Mirí Loč i p'jela Miro Rat, odová dživéla dre Mánde, i Me jačavape dre léste.

⁵⁷Adiáke-pac', syr Džidó Devél Dad bičhadiá Man, i Me dživáva pal Dadéste, adiáke-pac' i odová, kon xála Mirí loč, javéla te dživél pal Mánde.

⁵⁸Kadavá isyn maró, savó javdiá bolybnástyr, jov isyn na dasavo, syr maró, savó xané tumaré dadá i myné: ne odová, kon xála davá maró, javéla te dživél viéčnes.”

⁵⁹Davá Jov rakirdiá dre sinagoga, kiéli sykliakirdiá dro Kapiernaumo.

⁶⁰But Léskire sykliaibnytkonendyr, syr šundlé Les, rakirdé: “Savó pharó isyn sykliakiribén! Kon moginéla davá te šunél?”

⁶¹Isúso džindiá, so Léskire lavá xoliakirde sykliaibnytkonén, i Jov phendiá lénge: “Ci davá začhuvela tumen te mekén Man?”

⁶²Ne so javéla, kiéli tumé javéna te dykhén, syr Čhavó Manušéskiro ĥazdélape odorík, kaj Jov sys angledýr?

⁶³Dúho (Fáno) déla džiibén, a dro manušýtko loč (plot') nane ni saví zor. Lavá, savé Me rakiráva tuménge, isyn dúho (fáno) i džiibén.

⁶⁴Ne isyn maškír tuménde i adasavé, savé na patiána.” Pal-dová so Isúso džindiá angledýr, kon dre Léste na patiála i kon biknela Les.

⁶⁵I Jov rakirdiá: “Vaš davá i Me rakiráva tuménge, so nikón na javéla ke Me, kóli davá na javéla dynó léske Miré Dadéstyr.”

⁶⁶Pal davá but Léskire sykliaibnýtka mekné Les i jone butýr na psirdé Lésa.

⁶⁷Tedy Isúso phendiá dešudujenge: “Ci na kaména i tumé te džán péske?”

⁶⁸Símono Pétri Léske otphendiá: “Rajo Dévla! Ke kon aménge te džas? Túte isyn lavá, savé déna viéčno džiibén.

⁶⁹Ame akaná džinása i patiása, so Tu san Xristóso, Svénto Devléskiro Čhavó.”

⁷⁰Isúso otphendiá lénge: “Ci na Me vykedyjom dešudujen tumen, ne jekh tuméndyr isyn nálačho.”

⁷¹Jov rakirdiá pal Judaste, Simonoskire-Iskariotoskire čhavéste, savó sys jekh dešudujendyr, pal-dová, so jov kedelaspe te biknel Les.