Read Biblija - Pe Baltitko Romani čib (Romanes) 2019 Baltic Romani Bible Iáno 8 Bible Online

Iáno 8 - Biblija - Pe Baltitko Romani čib (Romanes) 2019 Baltic Romani Bible bible

Iáno 8

²I pe zlóko Jov javdiá dre Khangirí, i saré manušá giné ke Jov; i Jov besciá i sykliakirdiá len.

³Lylvarítka i Farisiéi jandlé ke Jov džuvliá, savjá uhtyldé dro biladžaipén, čhudé la angíl sarénde,

⁴i phendlé Léske: “Sykliakiribnáskiro! Adaja džuvlý isyn uhtyldy dro biladžaipén; kiéli joj kerdiá ladžaipén péskire romeske.

⁵Mójza dre Zakóno priphenelas aménge, sob (kaj) ame te zamaras džuvlién barénca; ne so Tu phenésa?”

⁶Jone rakirdé adiáke, sob (kaj) te propatiakiren Les, sob (kaj) te lathén vari-so te bangiakiren Les. Ne Isúso bandija ke phuv, čhindiá anguštesa pe phuv?

⁷Kiéli nevéstyr Jone phučenas Léstyr, Jov ĥazdyjá šeró, phendiá lénge: “Kon tuméndyr nijékhvar na kerdiá grého, čhurde pérvo pe láte bar.”

⁸I nevéstyr Jov bandija telé i čhinelas pe phuv.

⁹I kiéli jone šundlé davá, jone lyné te rozdžanpe jekh pal jekhéste, angledýr giné phurydyrá; i jaciápe jekh Isúso i džuvlý, saví sys terdy maškirál.

¹⁰Isúso ĥazdyjá šeró, i Jov ni konés na dykhciá apríč džuvliáte; Jov phuciá látyr: “Džuvlije! Kaj isyn jone saré? Nikón na sendindia tut?”

¹¹Joj otphendiá: “Nikón, Rajo!” Isúso phendiá láke: “I Me tut na sendinava; džá i na ker gréhi butýr.”

¹²Nevéstyr Isúso rakirdiá manušénca i phendiá lénge: “Me som dud dro davá svéto: odová, kon džála pal Mánde, na javéla te psirél dro kalypén, a javéla léste džiibnáskiro dud.”

¹³Tedy Farisiéi phendlé Léske: “Tu Kokoró pal Péste dophenesa, i dophenybén Tyró isyn na čačunó.”

¹⁴Isúso otphendiá lénge: “Kóli Me Kokoró pal Péste dophenava, to Miré lavá isyn čačuné, pal-dová so Me džinóm, katýr Me javdjom i karik Me džáva; a tumé na džinéna, katýr Me javdjom i karik Me džáva.

¹⁵Tumé sendinena pir dová, so tumé dykhéna dre manušéste, ne Me na sendinava nikonés.

¹⁶A kóli Me i sendinava, Miro séndo isyn čačunó, pal-dová so Me na som jekhdžinó; Mánca isyn Miro Dad, Savó bičhadiá Man.

¹⁷Ne i dro tumaró Zakóno isyn čhindló, so dujengire-manušéngiro dophenybén isyn čačunó:

¹⁸Me Kokoró dophenava pal Péste, i dophenéla pal Mánde Dad, Savó bičhadiá Man.”

¹⁹Tedy phučné jone: “Kaj isyn Tyró Dad?” Isúso otphendiá: “Tumé na džinéna ni Man, ni Miré Dadés; kóli tumé te džinén Man, tedy tumé i džinenas Miré Dadés.”

²⁰Kadalé lavá Isúso rakirdiá pašýl Khangirjákiri piralý (tyknorí), kiéli Jov sykliakirdiá dre Khangirí; i nikón Les na čiladiá, pal-dová so Léskiro časo na javdiá.

²¹Jov nevéstyr phendiá lénge: “Me džáva, i tumé javéna te rodén Man, i meréna dre tumaró grého; karik Me džáva, odorík tumé na moginéna te javén.”

²²Paldavá Judy rakirdé: “Jov so, ci na kaméla Kokoró Pes te zamarél, so rakiréla: ‘Karik Me džáva, tuménge odorík naštý te javén?’”

²³Jov phendiá lénge: “Tumé san dalé svetóstyr, savó isyn telál; Me som vučipnástyr; tumé san dalé svetóstyr, Me na som dalé svetóstyr;

²⁴paldová Me i phendjom tuménge, so tumé meréna dre tumaré gréhi; kóli tumé na upatiana, so davá som Me, to tumé saré meréna dre gréhi!”

²⁵Tedy phendlé Léske: “Kon Tu san? Isúso phendiá lénge: “Odová, Konesa Me ŭsády (sak) som, syr Me phendjom anglypnástyr;

²⁶Me but mogináva te rakiráv pal tuménde i te sendinav tumen; ne Odová, Kon bičhadiá Man, isyn čačunó i dová, so Me šundjom Léstyr, Me rakiráva svetoske.”

²⁷Jone na ĥalyné, so Jov rakirdiá lénge pal Dadéste.

²⁸Adiáke Isúso phendiá lénge: “Kiéli ĥazdéna Čhavés Manušeskires, tedy tumé uĥaljona, so davá som Me, i so Me nisó na keráva Péstyr; ne, syr sykliakirdiá Man Miro Dad, adiáke i Me rakiráva.

²⁹Kon bičhadiá Man, isyn Mánca; Dad na jačkirdiá Man jekhés, pal-dová so Me ŭsády (sak) keráva dová, so Léske isyn lahčo.”

³⁰Kiéli Jov rakirdiá davá, but manušá upatiándyne dre Léste.

³¹Tedy Isúso phendiá odolé Judénge, savé upatiándyne dre Léste: “Kóli tuménde javéla Miro Lav dre péste, tumé, čačes, san Miré sykliaibnýtka;

³²i tumé udžinena čačipén, i čačipén keréla tumen vol'nonenca.

³³Jone Léske otphendlé: “Ame sam Avraamóskire rodóstyr i nijékhvar nikonéske na sámas slúgi (dynárja); syr Tu rakirésa davá, so ame jačasa vol'na?”

³⁴Isúso otphendiá lénge: “Čačes, čačes, Me rakiráva tuménge: kažno, kon keréla grého, odová kokoró isyn dynári grehoske.

³⁵Ne dynári na saró časo javéla te dživél dro kher; a čhavó dživéla viéčnes.

³⁶Kóli Čhavó keréla tumen vol'nonenca, tedy, čačes, tumé javéna vol'na.

³⁷Me džinóm (džináv), so tumé san Avraamóskire rodóstyr: i usajékh tumé rodéna Man te zamarén, pal-dová so Miro lav na jaciápe dro tumaró iló.

³⁸Me rakiráva tuménge dová, so Me dykhcjom Miré Dadéste: ne tumé keréna dová, so tumé dykhné péskire dadéste.”

³⁹Jone phendlé Léske dro otphenybén: “Amaró dad isyn Avraámo.” Isúso rakiréla lénge: “Kóli tumé te javén Avraamóskire čhavé, tedy tumé kerénas Avraamóskire réndy;

⁴⁰ne kakaná tumé rodéna te zamarén Man, Manušés, Savó phendiá tuménge čačipén, Savó Me šundjom Devléstyr; Avraámo na kerdiá davá.

⁴¹Tumé keréna dová, so kerdiá tumaró dad.” Jone phendlé Léske: “Ame na bijandyjam blendostyr; aménde isyn jekh Dad: Devél.”

⁴²Isúso phendiá lénge: “Kóli Devél te javél tumaró Dad, tedy tuménge javavas by drógo Me, pal-dová so Me i javdjom Devléstyr i Me javdjom na Kokoró Péstyr, ne Jov Man bičhadiá.

⁴³Sóske tumé na ĥaljona Miro rakiribén? Pal-dová so tumé na moginéna te šunén Miro lav.

⁴⁴Tumaro dad isyn nálačho i tumé kaména te kerén pir tumaré-dadéskiri láska. Ne jov saró džiibén sys manušéngiro zamaribnari, i jov na dživdiá dro čačipén, pal-dová so nane čačipén dre léste; kiéli jov rakiréla xohaibén, rakiréla péskiro, pal-dová so jov isyn xohaibnari i xohaibnaskiro dad.

⁴⁵Ne kiéli Me rakiráva tuménge čačipén, tumé na patiána Mánge.

⁴⁶Kon tuméndyr bangiakirela Man dro grého? Kóli Me rakiráva tuménge čačipén, sóske tumé na patiána Mánge?

⁴⁷Odová, kon isyn Devléstyr, odová šunéla Devléskire lavá; tumé paldavá na šunéna, pal-dová so tumé san na Devléstyr.”

⁴⁸Pe davá Judy phendlé Léske: “Ci na čačipén ame rakirasa, so Tu san Samarianino i nálačho dúho (fáno) isyn beštó dre Túte?”

⁴⁹Isúso otphendiá: “Dre Mánde nane nálačho dúho (fáno), ne Me kutiakirava Miré Dadés, a tumé kaliakirena Man.

⁵⁰Ne Me na rodava Péske sláva: isyn javír, Odová, Kon rodéla i Jov javéla te sendinel.

⁵¹Čačes, Čačes Me rakiráva tuménge: kon zrakhéla Miro lav, odová na dykhéla meribén nijékhvar.”

⁵²A Judy phendlé Léske: “Kakaná ame uĥalyjam, so nálačho dúho (fáno) isyn beštó dre Túte; Avraámo myjá, myné i proróki, a Tu rakirésa: ‘Kon zrakhéla lav Miro, odová na meréla nijékhvar’.

⁵³Naúšto Tu san baredýr dadéstyr amarestyr Avraamostyr, savó myjá i saré proróki myné: pal konéste Tu Pes ginesa?”

⁵⁴Isúso otphendiá: “Kóli Me Kokoró Pes slavinava, tedy sláva Mirí nisó na mol: ne Miro Dad slavinela Man, pal Savéste tumé rakiréna, so Jov isyn tumaró Devél.

⁵⁵Tumé na džindlé Les, ne Me džinóm (džináv) Les; i kóli Me phenáva, so na džinóm Les, tedy Me javáva adasavó-pac' xohaibnari, syr i tumé san. Ne Me džinóm Les i Me rakhava Léskiro lav.

⁵⁶Avraámo, dad tumaró, sys rado te dykhél Miro dyvés: i dykhciá, i obradyndiape.”

⁵⁷Pe davá phendlé Léske Judy: “Túke nane i pandždešá berš, i Tu dykhcián Avraamos?”

⁵⁸Isúso phendiá lénge: “Čačes, čačes Me rakiráva tuménge: angledýr, syr bijándyja Avraámo, Me sómas.”

⁵⁹Tedy jone uhtyldé bará, sob (kaj) te marén Les; ne Isúso sčhakirdiape i gijá javrí Khangirjátyr, gijá maškír lénde, i gijá duredýr.