Read Biblija - Pe Baltitko Romani čib (Romanes) 2019 Baltic Romani Bible Iáno 9 Bible Online

Iáno 9 - Biblija - Pe Baltitko Romani čib (Romanes) 2019 Baltic Romani Bible bible

Iáno 9

¹Kiéli Isúso gijá piró drom, Jov dykhciá manušés, savó sys kororó bijanypnastyr.

²Léskire sykliaibnýtka phučné Léstyr: “Ravvi! Kon léndyr kerdiá grého, jov kokoró, ci dadá léskire, so jov bijándyja kororó?”

³Isúso otphendiá: “Ni jov, ni léskire dadá na kerdé grého, ne davá isyn vaš dová, sob (kaj) te javél pe léste bicialy (dyc'ly) Devléskiri zor.

⁴Paka na progijá dyvés, Mánge trej te keráv Odoleskire réndy, Kon bičhadiá Man; syg javéla rat, kiéli nikón naštý nisó te kerél.

⁵Dro davá časo, syr Me som dro svéto, Me som dud (svéto) dalé svetoske”

⁶Kiéli Jov phendiá davá, čungardyja pe phuv, kerdiá saliatyr (slinatyr) makhiben i makcia jakhá kororeske,

⁷I phendiá léske: “Džá, obmorpe dre Siloamoskiri venderín (prudo)” /so značinela “bičhadó!”/. Jov gijá, obmordiape i jaciá te dykhél.

⁸Léskire pašatuné i javír manušá, savé dykhné, so jov angledýr sys kororó beštó i mangdiá dyibén, phendlé: “Ci da isyn na odová manúš, savó sys beštó i mangdiá dyibén?”

⁹Vari-savé rakirdé: “Davá jov isyn.” Ne javír rakirdé: “Nad, jov zdela (poddžála) pe léste.” Jov ž rakirdiá: “Čačes, me som.”

¹⁰Tedy phučné léstyr: “Syr tu jacián te dykhés?”

¹¹Jov otphendiá lénge: “Jekh Manúš, Saves kharéna Isúso, kerdiá makhiben, makcia miré jakhá i phendiá mánge: ‘Džá dro Siloamoskiro kompinytko i obmorpe’. Me gijom, obmordjompe i jacjom te dykháv.”

¹²Tedy phučné léstyr: “Kaj Jov isyn?” Jov otphendiá: “Na džinóm (na džináv).”

¹³Adales manušés, savó sys ĥaredyr kororó, lydžiné ke Farisiéi.

¹⁴Davá sys sávato, dyvés, dro savó Isúso kerdiá pomakhiben i vysastiakirdiá les kororipnastyr.

¹⁵Adiáke-pac' i Farisiéi lyné te phučén Léstyr, syr jov jaciá te dykhél. Jov phendiá lénge: “Jov čhudiá makhiben mánge pe miré jakhá i me obmordjompe, i me kakaná dykháva.”

¹⁶Tedy vari-savé Farisiejendyr rakirdé: “Adavá manúš na moginéla te javél Devléstyr, pal-dová so Jov na rakhéla sávato.” Javír rakirdé: “Syr moginéla grehítko manúš te kerél dasavé dívy?” — I jaciá košybén maškír lénde.

¹⁷Jone nevéstyr rakiréna kororeske: “So tu phenésa pal Léste, pal-dová so Jov otčhakirdiá túke jakhá? Kon Jov isyn pir tyró?” Jov phendiá: “Jov isyn proróko.”

¹⁸Judy usajékh na patiandyné, so manúš sys kororó i jaciá te dykhél, angíl dová, syr jone khardé léskire daden.

¹⁹I phučné léndyr: “Ci davá isyn tumaró čhavó, pal savéste tumé rakiréna, so jov bijándyja kororó? Syr jov kakaná jaciá te dykhél?”

²⁰E dadá léskire otphendlé lénge: “Ame džinása, so jov isyn amaró čhavó i jov bijándyja kororó;

²¹a syr davá jov kakaná dykhéla i, kon otčhakirdiá léske jakhá, davá ame na džinása; jov kokoró isyn dre stala beršá, phučén léstyr kokorestyr, mek jov kokoró te rosphenel pal péste.”

²²Léskire dadá adiáke otphendlé, pal-dová so jone darándyne Judendyr, so jone uže zrakirdepe, so kóli vari-kon priĥaljola Les pal Xristosóste, odolés te tradén krig Khangirjátyr.

²³Paldavá léskire dadá i phendlé: “Jov isyn dre stala beršá, phučén léstyr kokorestyr.”

²⁴I ĥáda, javír mólo jone khardé manušés, savó sys kororó, i phendlé léske: “De lav angíl Devléste, so tu phenésa čačipén: ame džinása, so Odová Manúš isyn grehítko.”

²⁵Jov otphendiá lénge: “Ci grehítko Jov isyn, davá me na džinóm; jekh me džinóm (džináv), so me sómas kororó, ne kakaná me jacjom te dykháv.”

²⁶Jone nevéstyr phučné léstyr: “So kerdiá Jov túsa? Syr tu jacián te dykhés?”

²⁷Jov otphenélas lénge: “Me rakirdjom uže tuménge, tumé na šundlé: so tumé kaména nevéstyr te šunén? Ci tumé kaména te jačen Léskire sykliaibnytkonénca?”

²⁸Jone zadyne gódla pe léste i phendlé: “Tu san Léskiro sykliaibnýtko, ne ame sam Mojzáskire sykliaibnýtka.

²⁹Ame džinása, so Devél rakirdiá Mojzasa, ne pal adalé manušéste ame na džinása, katýr Jov isyn?”

³⁰Manúš, savó jaciá te dykhél, phendiá lénge: “Davá isyn baró dívo, so tumé na džinéna, katýr Jov isyn, ne Jov otčhakirdiá jakhá mánge.

³¹Ne ame džinása, so, kon keréla grého, kodolén Devél na šunéla, ne jekhe kodolén, savé slavinena Devlés i keréna, so Léske isyn lačhó, kodolés Jov šunéla.

³²Nijékhvar dro džiibén na sys šundlo, sob (kaj) vari-kon manušéske, savó bijándyja kororó, te otčhakirel jakhá.

³³Kóli Jov te na javél Devléstyr, Jov nisó na moginelas te kerél.”

³⁴Jone zadyne gódla pe léste: “Tu saró bijandyjan dre gréhi, i ci na tu sykliakiresa amen?” I tradyne les javrí.

³⁵Isúso udžindiá pal davá, so les tradyne javrí, i lathiá les i phuciá léstyr: “Ci patiása tu dre Devléskire Čhavéste?”

³⁶Jov otphendiá i phuciá: “Ne kon Jov isyn, miro Raj Devél, phen mánge, sob (kaj) me te upatiav dre Léste?”

³⁷Isúso phendiá léske: “Tu dykhcián Les, Jov isyn Odová, Kon rakiréla túsa.”

³⁸Tedy manúš phendiá: “Me patiáva, Rajo Dévla!” I jov dyjá patýv Léske.

³⁹I phendiá Isúso: “Me javdjom pe séndo dre davá svéto, sob (kaj) odolé, savé na dykhéna, te dykhén, ne savé dykhéna, sob (kaj) te jačen kororé.”

⁴⁰Vari-savé Farisiéi, savé sys terdé pašýl Isusóste, syr šundlé davá, phendlé Léske: “Naúšto i ame sam kororé?”

⁴¹Isúso phendiá lénge: “Kóli tumé te javén, čačes, kororé, tedy tuménge na javéla grého; ne kóli tumé rakiréna, so tumé dykhéna, tedy grého jačélape pe tuménde.”