Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 11 Bible Online

Apostolengiri Butý 11 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 11

¹Apóstoly i pšála, savé dživdé ke Judéia, šundlé, so i Náiudy prilyné Devléskiro lav;

²i kiéli Pétri javdiá dro Jerusalimo, devlýtka Judy, savé sys občhindlé, lyné te vyrakiren léske, phení:

³“Tu psirdian ke manušá, savé isyn naobčhindle i xajan lénca.”

⁴I Pétri lyjá te rosphenel lénge saró, syr sys:

⁵“Dro fóro Iopija me mangdjompe Devléske i dre mangipén sýrby dre suné me dykhcjom dykhibén i izdrandyjom: me dykhcjom, syr bolybnástyr zmekelape vari-so, so poddžála pe bari cérga, saví pal štar véngly zmekelape bolybnástyr mamúj (priames) odorík, kaj me sómas:

⁶me zadykhcjom rakhunes andré i dykhcjom štaré phuvitkone — ĥeritkone murdalén (zvierien), savé psiréna pirí phuv i savé polzynena, i bolybnytkone čiriklien.

⁷I šundjom me zan, saví phendiá mánge: “Pétrie! Uštý, zamar dalé murdalén i xa.”

⁸Ne Me phendjom: “Nad, Rajo Dévla! Me nijékhvar na xajom nisó džungaló (brytko) ci nažužo.”

⁹I phendiá mánge zan bolybnástyr javír mólo: “So Devél kerdiá žužesa, dová tu na gin pal nažužo.”

¹⁰I sys adiáke trin móly, i korigedýr (pozžedýr) cérga nevéstyr ĥazdyjápe pe bolybén;

¹¹i ĥáda, dro dová-pac' časo, trin manušá podginé ke kher, dre savó me sómas, jone sys bičhadé Kiesarijatyr ke me.

¹²I Dúho phendiá mánge, sob (kaj) me te džav lénca, nikicy na duminy. I adalé šov pšála giné khetané mánca i ame javdiám dro odolé-manušéskiro kher, savó khardiá man.

¹³Jov rosphendiá aménge, syr jov dykhciá dro péskiro kher sventoné Jangolós, savó i phendiá léske: bičháv ke Iopija manušén i vykhar Simonos, savés kharéna Pétri;

¹⁴jov phenéla túke lavá, savénca tu zrakhesape i saró tyró kher.”

¹⁵Kiéli me lyjom te rakiráv, Svénto Dúho (Fáno) zgija pe lénde, adiáke-pac', syr angledýr jov zgija i pe aménde.

¹⁶I Me priripirdjom Ráskire-Devléskiro lav, syr Jov rakirdiá: ‘Iáno boldia paniésa, a tumé javéna bolde Sventoné Duhósa’.

¹⁷Kóli tedy Devél dyjá lénge dasavo-pac' taláno, syr i aménge, savé patiána dre Raste-Devléste, Isusóste Xristosóste, tedy, kon me som adasavó, sob (kaj) te keráv vari-so proti Devléste?”

¹⁸Kiéli jone šundlé saró davá, jačné štyl i lyné te slavinén Devlés, rakirí: “Bicialó, so i Najudénge Devél dyjá vólia te riskirén péskiro džiibén ke Devél i te dživén.”

¹⁹A manušá, savé mekné péskire štéty pal bída, saví kerdiápe Stiehvanosa, doginé ke Finikija, Kipro i Antióhiia, jone nikonéske na rakirdé Devléskiro lav, apríč jekhe Judénde.

²⁰A sys maškír lénde Kipriani i Kirinieicy, savé, kiéli javné dre Antióhiia, lyné te rakirén i Elinenge (Griekénge/Balaménge), kiéli jone mištophenenas pal Raste-Devléste Isusóste.

²¹I sys Devléskiro vast lénca, i but manušá patiandyné i risiné ke Devél.

²²I udžindlé pal davá dre Jerusalimóskiri Khangirí, i odothýr bičhadé Varnavas dre Antióhiia:

²³savó, kiéli javdiá, dykhciá Devléskiro bahtalypén, i jov drieván obradyndiape i podrikirelas sarén, sob (kaj) jone te javén dro patiaibén dre Raste-Devléste saré péskire ilésa;

²⁴pal-dová so Varnava sys lačhó manúš, pherdó patiaibnása i Sventoné Duhósa, i pir léste drieván but manušá riskirdé péskiro iló ke Devél.

²⁵Korigedýr Varnava gijá dro Tarso te rodél Savlos. I kiéli jov lathiá les, to jandiá dre Antióhiia.

²⁶I saró berš Varnava Savlosa kedenaspe dre Khangirí i sykliakirdé buté manušén: i sykliaibnýtka dre Antióhiia sys pérva te kharenpe Devlytkonénca (Xristianénca).

²⁷I dro dová časo proróki Jerusalimóstyr javné dre Antióhiia;

²⁸i jekh léndyr, savés khardé “Agavo”, uštyjá i Sventoné Duhósa angilphendia, so javéla bari bokh pir sarí phuv, i, ĥáda, bokh jaciá, kiéli Klavdijo sys khieningo (kiesarjo).

²⁹I sykliaibnýtka dorakirdepe, sob (kaj) kažno léndyr, kicý kon moginéla, te pomoginel pšalénge, savé dživéna ke Judéia,

³⁰I jone kerdé dová, kiéli jone bičhadé lové phurepšalenge (priesvitierenge), so skedyné Varnava i Savlo.”