Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 12 Bible Online

Apostolengiri Butý 12 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 12

¹Dre dová časo králi Irodo nevéstyr lyjá te tradel devlytkonen i zakedyja vari-kicý manušén léngire khangirjátyr, sob (kaj) te kerél fuipén lénge,

²I muliakirdiá Jakovós, Ianoskire pšalés kurtalása.

³Kiéli jov dykhciá, so davá isyn pir iló Judénge, jov zakamdiá te zakedel apríč dová i Petris; a sys davá pe Judýtko svénko, kiéli xána bi roščynakiro (droždžengiro) maró.

⁴I Jov zakedyja Petris, i čhudiá les dro štaribén, i priphendiá xaladenge te terdjon dre štar riady pe štar manušén dre kažno riado i te rakhén les; Irodo kedelaspe paló Patradí te lydžál Petris pe manušýtko séndo.

⁵I adiáke Petris rakhne dro štaribén; a manušá Khangirjátyr drieván mangnepe Devléske pal léste.

⁶Ratiákiro, angíl dová, kiéli Irodo kedyjape te vylydžal les pe manušýtko séndo, Pétri sys sutó maškirál duje xaladénde, phandlo dujenca zandir'jenca, i xaladé sys terdé pašýl vudará i rakhne štaribén.

⁷I, ĥáda, javdiá Devléskiro Jangólo, terdijá pašýl, i jag zaziaindia dro štaribén; Jangólo pekadiá Petris dro pašvaro, džangadia les, phení: “Uštý sygedýr.” I zandirjá (cépi) pyné léskire vasténdyr.

⁸I Jangólo phendiá léske: “Podphandepe i uri ĥerá.” I jov kerdiá adiáke. Korigedýr rakiréla léske: “Uri tyrí ídia i džá pal mánde.”

⁹I syr Pétri vygijá štaribnastyr, jov gijá pal Jangoloste, na džiný, so saró davá, so Jangólo kerdiá, isyn dro čačipén, a léske zdyjape, so jov dykhéla dykhibén sýrby dre suné.

¹⁰Jone proginé mamúj iekhende i javire rakhibnar'jende i podginé ke sastruny pórta, saví lydžála dro fóro, vudará otčhakirdepe angíl lénde kokoré péstyr; jone vyginé, i proginé jekh vulíca (gása), i adáj že Jangólo mekciá Petris.

¹¹Kiéli Pétri javdiá dre péste, jov phendiá: “Me kakaná, čačes, dykháva, so Devél bičhadiá Péskire Jangolós i rakhciá man Irodoskire vasténdyr i saréstyr, so kamlé Judejákire manušá te kerén.”

¹²Kiéli Pétri kokoró saró ĥalyjá, jov javdiá ke Marijakiro kher, joj sys Ianoskiri daj, savés khardé adiáke-pac' Marko, kaj but skedynépe manušá i mangnepe Devléske.

¹³Kiéli Pétri pekadiá dre vudará, dynárica vygijá te udžinel, savjá khardé Roda;

¹⁴i kiéli joj udžindiá Petris pirí zan, joj radymátyr bistyrdia te otčhakirel vudará, a prastándyja pale i phendiá, so Pétri sys terdó angíl vudará.

¹⁵I jone phendlé láke: “Ci dre péskiri godý tu san? Ne joj saroiekh rakirdiá péskiro, so davá isyn čačó.” Jone rakirdé: “Davá isyn léskiro Jangólo.”

¹⁶Ne Pétri ŭsa pekavelas dre vudará: kiéli otčhakirde vudará, tedy dykhné les i divindlépe.

¹⁷Jov sykadiá vastésa, sob (kaj) te na rakirén, rosphendiá lénge, syr Devél vylydžijá les štaribnastyr i phendiá: “Piridén daja zan Jakovóske i javire pšalénge.” Jov gijá i gijá odothýr pe javír štéto.

¹⁸A kiéli jaciá dyvés, sys bari godlyma maškír xaladénde pal dová, so kerdiápe Petrisa.

¹⁹A Irodo rodyja Petris i nikaj na lathiá, a kiéli jov dophucia xaladendyr, tedy priphendiá te muliakirén len. Tén'ci jov gijá Judejátyr dre Kiesarija i odój jaciápe.

²⁰Irodo sys drieván xoliamó pe Tiranoskire i Sidonoskire manušénde; ne jone javné ke jov vaš dová, sob (kaj) jov len te prilel i podrakirde pe péskiri rig Vlastos, savó sys kralískiro štubatuno (phuredýr) i pomangne “ramánjo (miro)”, pal-dová so léngiri rig čaradiape kralískire rigátyr.

²¹Pe vykedyno dyvés Irodo uridia pe péste kralítko ídia, besciá pe trono i rakirdiá angíl sarénde.

²²I manušá dénas gódla: “Davá isyn zan Devléskiri, a na manušeskiri.”

²³Ne dro dová-pac' momiento Devléskiro Jangólo muliakirdiá Irodos, pal-dová so Irodo na slavindia Devlés, les džides xané kirme, i jov myjá.

²⁴Ne Devléskiro lav usá butýr šundjolas i rozdžalas maškír manušénde.

²⁵Varnava i Savlo kerdé, so lénge sys phendló i javné pale Jerusalimóstyr dre Antióhiia; jone lyné Pésa Ianos, savés khardé “Marko.”