Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 13 Bible Online

Apostolengiri Butý 13 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 13

¹Dre Antióhiia, dre štetýtko khangirí sys proróki i sykliakiribnaskire: Varnava, i Simieono, savés khardé Nigiero, i Lucyjo Kirinejanino, i Manailo, savó barija khetané Iradosa tietrarhosa i Savlo.

²Jekhvar, kiéli jone mangnepe Ráske-Devléske i postindle, Svénto Dúho (Fáno) phendiá lénge: “Otdén Mánge Varnavas i Savlos pe réndo (diélo), vaš savó Me len khardjom.”

³I jone, paló posto i mangipén, čhudé upré vastá pe lénde, i otbičhade len.

⁴Varnava i Savlo, savén bičhadiá Svénto Dúho (Fáno), javné dre Sielievkija, a odothýr otplyvindle (dyné plíma krig) pe Kipro.

⁵Kiéli jone javné dro Salamino, odój jone rosphenenas Devléskiro lav dre Judejákire sinagogi. Iáno sys khetané lénca i délas vast lénge.

⁶Jone giné pir saró óstrovo (džip) i javné dro Pafoso, odój strenindle manušés, savó sys čovahano, xohanó proróko Judo, les khardé Variisuso,

⁷jov sys mal (drúgo) Rimóskire balunitkoneske Sier'gaske Pavliske, god'varé manušéske. Balunitko khardiá Varnavas i Savlos, pal-dová so kamdiá te šunél Devléskiro lav.

⁸Ne Jelimo, čovahano (lav léskiro značynéla “čovahano”), saró kerdiá proti lénde; jov kamdiá te otriskirel Rimóskire balunitkones patiaibnastyr.

⁹Ne Savlo, savés adiáke-pac' khardé Pávli, saré Sventoné Duhóskire zorjása, dykhcia mamúj pe léste,

¹⁰i phendiá: “Tu, san nalačheskiro čhavó i vérgo saré čačipnaske: tu san pherdó xohaibnasa i kalé rendénca; ci pirijačesa tu te zlydžas manušén čačuné Ráskire-Devléskire droméstyr?

¹¹I kakaná, ĥáda, Devléskiro vast isyn pe túte: Tu javésa kororó i tu na javésa te dykhés kham ke savó trej časo.” I jekhátyr zgija pe léste kalypén, i jov lyjá te čhurdelpe pir saré rigá, rodyi vari-konés te lydžál les pal vast.

¹²Kiéli balunítko (konsulo) dykhciá, so kerdiápe, jov lyjá te patial, i jov divindiape pe Ráskire-Devléskiro sykliakiribén.

¹³Pávli i léskire malá otplyvindle (dyné plíma krig) Pafostyr i javné dre Piergija i Pamfilija; ne Iáno mekciá len odój i kokoró risijá dro Jerusalimo.

¹⁴A jone proginé Piergijatyr i javné dre Pisidijakiri Antióhiia, savatoné (subotoné) jone javné dre sinagoga i bešné.

¹⁵Paló (poslie) ginybén Mojzáskire Zakonóstyr i prorokéngire sykliakiribnastyr, sinagogakire barydyrá bičhadé lav lénge: “Manušále-Pšalále! Kóli tuménde isyn lav vaš sykliakiribén te phenén manušénge, to rakirén.

¹⁶Pávli uštyjá i sykadiá vastésa, sob (kaj) jone te šunén, phení: “Manušále Izrailjoskire! Lačhé javír manušá, savé kutiakirena Devlés, vyšunen man:

¹⁷Devél Izrailjoskire manušéngiro vykedyjá amaré daden, Jov kerdiá léndyr bari i patyvalý nacyja, kiéli jone sys dro Jegípto, i Jov baré-zorjakire vastésa lydžijá len odolé rigátyr,

¹⁸I pašé štardešá berš Jov dykhciá pal lénde pe čhučí phuv.

¹⁹Devél pe Xanaanóskiri phuv xasiakirdiá ohtó (bidujéngiro deš) nácyi i otdyjá léngiri phuv, syr meknó mištypén.

²⁰I paló davá, pašé štaršelá pandždešá berš, ke/žýko proróko Samuílo, Devél délas lénge sendar'jen.

²¹Korigedýr (pozže) jone lyné te mangén péske Kralís, i Devél dyjá lénge Saulos, Kisaskire čhavés, Vieniaminóskire rodóstyr pe štardešá berš.

²²Devél zlyjá Saulos kralipnastyr i čhudiá lénge Davidós syr kralís, pal savéste i phendiá dro dophenybén: “Me lathjom Davidós, Jesiejoskire čhavés, adavá manúš Mánge isyn pir iló, savó keréla saró pir Mirí vólia.

²³I Davidóskire rodóstyr Devél, syr Jov dyjá lav, jandiá Izrailjoske Isusós Zrakhibnaskires;

²⁴angíl davá, syr Isúso javdiá, Iáno phenelas lav te riskirén péskiro džiibén ke Devél vaš boldyipen saré Izrailjoskire manušénge.”

²⁵Dro palatunó (posliednjo) péskiro phenybnytko lav, Iáno rakirdiá: “Pal konéste tumé man ginéna? Me na som odová; ne ĥáda, džála pal mánde Odová, Savéske me na som mol te rosphandav Léskire ĥeritka.”

²⁶Manušále-Pšalále, Čhavé Avraamóskire, i maškír tuménde isyn Náiudy, savé kutiakirena Devlés! Davá zrakhibnaskiro lav sys bičhadó aménge:

²⁷so manušá, savé dživdé ke Jerusalimo i léngire barydyrá, na udžindlé Isusós, jone sendindle pharés Les i dalésa-pac' kerdé dová, so rakirdé proróki, dalé lavá ame ginasa kažno savatoné (subotoné), sýrby sendinasa Les.

²⁸Jone na lathné dre Léste nisaví bang vaš meribén, i usajékh mangné Pilatos te muliakirén Les.

²⁹Kiéli jone kerdé saró, so sys čhindló pal Léste, jone lyné Les trušulestyr, čhudé Les dre maĥilytko koplíca.

³⁰Ne Devél otdžidiakirdiá Les meribnástyr;

³¹I but dyvesá Isúso sykadjolas ke odolé manušá, savé khetané Lésa javné Galilejatyr dro Jerusalimo, savé kakaná isyn Léskire jakhítka angíl manušénde.

³²I ame piridasa kadaja bahtalý zan (zvies') tuménge, syr Devél dyjá lav amaré dadénge, Jov kerdiá davá vaš aménge, léngire čhavénge, kiéli otdžidiakirdiá Isusós,

³³syr davá isyn čhindló dro javír psálmo: “Tu san Miro Čhavó: Me adadyvés bijandjom Tut.”

³⁴Devél otdžidiakirdiá Les meribnástyr adiáke, sob (kaj) Jov butýr te na kirnjol dre maĥila, pal davá Jov phendiá adiáke: “Me dáva Túke svénto i čačunó bahtiakiribén, savó sys dynó Davidóske.”

³⁵Paldavá Jov rakiréla i javír štéto: “Tu na désa Sventoneske te dykhél meribén.”

³⁶Ne Davído kerdiá saró dro péskiro časo, syr léske phendiá Devél, jov myjá, i les garadé léskire dadénca i trúpo léskiro kirnyja.

³⁷Ne Odová, Konés Devél otdžidiakirdiá, na kirnyja.

³⁸Paldavá, Manušále-Pšalále, me kamám, sob (kaj) tumé te džinén, so tuménge phenélape lav pal grehengiro otmekiben pir Isusóste Xristosóste,

³⁹i dre saró, dre so tumé na mogindlé te javén zrakhné Mojzáskire Zakonosa, kažno manúš, kon patiála, jačéla čačipnáskiro pir Isusóste Xristosóste.

⁴⁰Dykhén, sob (kaj) i tuménge te na javél adiáke, syr rakirdé proróki:

⁴¹“Rakhénpe tumé, kon dykhéla bipatyvakires pe javír manušénde, tumé zdivinenape i xasjona; pal-dová so Me keráva dasavo réndo vaš tuménde dre tumaré dyvesá, savéske tumé nijékhvar na patiána, kóli vari-kon rosphenéla tuménge pal davá.”

⁴²Kiéli Pávli i Varnava džánas javire sinagogatyr, len khardé, sob (kaj) jone te javén dro javír sávato i te rakirén dová-pac'.

⁴³Kiéli manušá, savé sys pe skedyibén, lyné te rozdžanpe, tedy but Judy i javír, savé prilyné Judýtko sykliakiribén, giné pal Pavliste Varnavasa, savé rakirdé lénca i mangenas, upatiakirenas len te javén duredýr dro Devléskiro bahtalypén.

⁴⁴Dro javír sávato saré manušá foróstyr javné te šunén Devléskiro lav.

⁴⁵Kiéli Judy dykhné, so skedynépe adákicy but manušá, jone lyné te zevlynen i rakirdé drieván nalačhé lavá pe saró dová, so rakirdiá Pávli.

⁴⁶A Pávli i Varnava rakirdé murškanés i bidarakires phendlé: “Aménge trej angledýr saréndyr tuménge te rosphenas Devléskiro lav: ne syr tumé na priĥaljona les, tumé dalésa sendinena kokoré pes, so tuménde na javéla viéčno džiibén, paldavá ame kakaná riskirasa Devléskiro lav Najudénge;

⁴⁷paldavá, so adiáke aménge rakirdiá Raj Devél, syr Jov phendiá: “Me keráva Tut, sob (kaj) tu te javes dud Najudénge, sob (kaj) pir Túte manušá te javén zrakhné pir sarí phuv.”

⁴⁸Náiudy, kiéli šundlé davá, radyndlepe i slavindle Devléskiro lav, i upatiándyne saré, savé sys vykedyné ke viéčno džiibén;

⁴⁹I Devléskiro lav rozdžalaspe pir sarí doiá rig.

⁵⁰Ne Judy, podrakirde devlytkoné i barvalé rodóstyr džuvlién i foróskire barydyrén, i ĥazdyné manušén proti Pavliste i Varnavaste, i tradyne krig len péskire rigátyr.

⁵¹Tedy Apóstoly trinskirde pe lénde práho péskire ĥerendyr i giné dre Ikonija.

⁵²Sykliaibnýtka sys pherdé radymása i Sventoné Duhósa.