Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 17 Bible Online

Apostolengiri Butý 17 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 17

¹Kiéli Pávli i Sila proginé pir Amfipoljo i Apolonija, tedy javné jone dre Fiesalonika, kaj sys Judengiri sinagoga.

²Pávli, syr jov prisyklyja te kerél, zagijá dre sinagoga i trin sávaty (suboty) rakirdiá lénca Sventoné Čhinybnástyr,

³jov obrakirelas i dophenelas lénge, so Xristosóske treindiá adiáke te javél, sob (kaj) Jov te pirilydžal saré mén'ki i te otdžidjol muléndyr, i so: “Kadavá-pac' Xristóso isyn Isúso, pal Savéste me rosphenava tuménge.”

⁴I vari-savé léndyr patiandyné i javné ke Pávli Silasa, i but devlytkoné Griekéndyr (Balaméndyr) i adiáke-pac' but džuvliá barvalendyr javné.

⁵Ne Judy, savé na patiandyné, xoliasyne i lyné javriestyr vari-savé pirangačen foruniátyr (ploščátyr) i kedynepe saré khetané i ĥazdyné saré manušén dro fóro: i jone giné pe Jasonoskiro kher, sob (kaj) te vylydžan len ke manušá;

⁶a kiéli odój jone na lathné Pavlís Silasa, tedy lydžiné zorjása Jasonos i javire pšalén ke foritka barydyrá, dyi gódla: “Kadalé manušá keréna bizlado pir saró svéto, a kakaná javné i adarík;

⁷a Jasono prilyjá len dro péskiro kher; i saré jone isyn proti khieningoskire uphenybená i rakiréna, so isyn javír králi, Isúso.”

⁸Manušá i foritka baré raja, kiéli šundlé saró davá, xoliasyne.

⁹Jone lyné Jasonostyr i javirendyr symadý (zalogo) i otmekne len.

¹⁰Pšála dre dová-pac' časo (momiento) ratiákiro otbičhade Pavlís i Silas dre Vierija, a odolé, syr javné odorík, giné dre Judengiri sinagoga.

¹¹Adalé manušá sys patyvaledyr Fiesalonikiicendyr, jone baré jakhénca šundlé phenybnytko lav, kažno dyvés jone roskedenas Svénto Čhinybén, sob (kaj) te džinén, ci čačipén Pávli rakirdiá.

¹²I but Judendyr patiandyné; adiáke-pac' patiandyné barvalé Griekítka (Balamítka) džuvliá i muršá.

¹³Ne kiéli Judy Fiesalonikatyr udžindlé, so i dre Vierija Pávli rosphenelas Devléskiro lav, jone javné i odorík te podrakiren manušén.

¹⁴I tedy pšála dre dová-pac' časo (momiento) bičhadé Pavlís dre rig ke morjoskiro (derjavéskiro) brégo; a Sila i Xima jačnépe odój.

¹⁵A manušá, savé lydžánas Pavlís, doginé lésa ke Afiny, i Pávli dyjá priphenybén lénge vaš Silaske i Ximoske, syr saštý (možna) sygedýr te javén ke jov.

¹⁶I paka Pávli užakirdia len dre Afiny, jov divindiape i piridživelas, dykhí, so dro fóro sys pherdó ídoly.

¹⁷Paldavá jov rakirdiá Judenca dre sinagogi i Najudenca (devlytkoné manušénca), i pe foruný (plóšča), kažno dyvés rakirdiá manušénca, savén jov streninelas (pirilelas).

¹⁸A vari-savé Epikurieine i Stoikone filosofendyr giné te xanpe lésa dro rakiribén. I vari-savé phučné: “So davá balvalitko manúš kaméla te phenél?” A javír rakirdé: “Jov, zdelape, rosphenéla pal čužoné naamare devlende?” — pal-dová so Pávli rosphenelas lénge bahtalý zan (zvies') pal Xristosóste i Léskiro otdžidyiben muléndyr

¹⁹I jone jandlé Pavlís dro Arieopago i phendlé: “Ci saštý (možna) te džinas aménge, savó davá isyn dasavo nevó sykliakiribén, so tu rosphenesa?

²⁰Pal-dová so dová, so tu rakirésa, ame nijékhvar na šundiám; i ame kamasa te džinas, so davá saró značynéla?”

²¹Saré Afiniani i manušá, savé dživdé odój javire rigéndyr, nisosa na zalenaspe dre péskiro vól'no časo, apríč dová, so rakirénas, ci šunenas vari-savé nevipená.

²²I, ĥáda, Pávli uštyjá maškirál Arieopago i phendiá: “Afinianiále! Pir saró me dykháva, so tumé drieván kutiakirena péskire devlen:

²³kiéli me psirdjom i dykhcjom tumaré svénta štéty, me lathjom altárjo, pe savó sys čhindló: “Nadžindle Devléske.” Pal Adaleste, Saves tumé na džiný, priĥaljona, me i kamám tuménge te rosphenav.

²⁴Devél, Savó sozdyjá svéto i saró, so isyn dre léste, Jov, Savó isyn Devél bolybnaske i phuvjake; Jov na dživéla dre khangirja, savé kerdé manušýtka vastá.

²⁵Léske na trej, sob (kaj) manušá te dynarinén (te služynen) Léske péskire vasténca; Jov Kokoró déla sarénge džiibén i saró;

²⁶i Jov kerdiá saró manušýtko ródo jekhe manušéstyr, sob (kaj) manušá te dživén pir sarí phuv; Devél vykedyjá vaš saré manušénge časo i štéto vaš džiibén pe phuv,

²⁷sob (kaj) manušá te rodén, te kamen te javén pašyledýr ke Jov i te lathén Les, pal-dová so Jov isyn nádur améndyr:

²⁸so ame dre Léste dživasa i psirasa i ame sam, syr vari-savé i tumaré poety phendlé: ‘Ame adiáke-pac' bijandyjam Léstyr’.

²⁹I kóli ame bijandyjam Léstyr, tedy aménge na trej te duminas, so davá isyn Devél, ci savó isyn kerdó suvnakástyr ci rupéstyr, ci barestyr, savó isyn kerdó manušytkoné vasténca i pir manušýtko godý.

³⁰Paldavá Devél promekcia dová časo, kiéli ame na džindiam čačipén, a Devél kakaná rakiréla saré manušénge pir saró svéto, sob (kaj) jone te riskirén péskiro džiibén ke Devél,

³¹pal-dová so Jov vykedyjá dyvés, kiéli Jov javéla te sendiakirél svéto čačuné sendosa pir Manušéste, Saves Jov vykedyjá, Jov sykadiá davá vykedyiben saré manušénge, kiéli otdžidiakirdiá Les muléndyr.”

³²I kiéli jone šundlé pal otdžidiakiriben muléndyr, vari-savé léndyr sandlepe, a javír phendlé: “Ame javása te šunas pal davá tut javír mólo.”

³³I Pávli gijá krig léngire skedyibnástyr.

³⁴A vari-savé manušá piriginé pe Pavliskiri rig i patiandyné; maškír lénde sys Dionisijo, Arieopagoskiro barydyró, i džuvlý, savjá khardé Damar', i javír manušá.