Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 18 Bible Online

Apostolengiri Butý 18 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 18

¹Paló davá Pávli gijá Afinendyr, i javdiá dro Korinfo;

²kaj jov strenindia (pirilyja) Judos, savés khardé Akila, i savó bijándyja dre Pontija, i jov naĥara javdiá Italijatyr péskire romniása Priskilasa (pal-dová so Klavdio priphendiá saré Judénge te džán Rimostyr); ke jone i javdiá Pávli,

³a syr lénde sys jekh butý Pavlisa, jone sude šátry, i paldavá Pávli jaciápe lésa te kerél butý.

⁴I kažno sávato (subóta) jov rakirdiá dre sinagoga i dophenelas, syr Judénge, adiáke i Griekénge (Balaménge).

⁵Ne kiéli Sila i Xima javné Makiedonijatyr, Pávli otdyjá saró péskiro časo, sob (kaj) te dophenel Judénge, so Isúso isyn Xristóso.

⁶Ne pal-dová so jone sys proti i košne les, tedy jov trinskirdia péskire ídi i phendiá lénge: “Rat tumaró mek te javél pe tumaré šeré: me som žužó; i kakaná me džáva ke Náiudy.”

⁷I Pávli gijá odothýr i javdiá dro devlytkoné — manušéskiro kher, savés khardé Justa, kon dživdiá pašýl sinagoga.

⁸A Krispo, sinagogakiro barydyró, patiandyja dre Devléste sarénca péskire kheritkonenca; i but Korinfiani, savé šundlé Pavlís, patiandyné i boldepe.

⁹iékhvar ratý dre dykhibén Raj Devél phendiá Pavliske: “Na andyrša, a rákir, i na jav štyl te rakirés,

¹⁰paldová so Me som túsa, i nikón na keréla túke čoripén; Mánde isyn but čačuné manušá dre davá fóro.”

¹¹I Pávli sys odój berš i šov čhoná, sykliakiri Devléskiro lav lénge.

¹²Kiéli dre Ahaia sys balunitko (prokonsulo) Galiono, Judy ĥazdynépe proti Pavliste i jandlé les pe séndo,

¹³rakirí: “Adavá manúš sykliakiréla te patián Devléske na pir Zakóno.”

¹⁴Kiéli Pávli kedyjape te otkerel muj, tedy Galiono phendiá Judénge: “Kóli kadavá manúš te kerél vari-savó sendytko proštaviben (priestuplienijo) ci čoripén, tedy, Judy, me vyšunavas tumen;

¹⁵a, kóli maškír tuménde džála košybén pal lavá i kharibena i pal tumaró Zakóno, tedy roskedenpe kokoré, me na kamám te javav sendári dro davá réndo.”

¹⁶I jov tradyjá len krig sendostyr.

¹⁷I saré uhtyldé Sosfienos, sinagogakires barydyrés, i mardé les angíl séndo. Galionoske ž na sys ke davá nisavó réndo.

¹⁸Pávli sys but dyvesá dro Korinfo, tén'či jov roziaciape pšalénca i tradyjá ke Sirija, a khetané lésa giné Priskila i Akila, ne angíl tradypen Pávli občhindia balá dre Kienhreja, sob (kaj) te kerél pir sovláh;

¹⁹tedy jone javné dre Jefieso, odój Pávli jačkirdiá Priskila i Akilas. Jov kokoró ž gijá dre sinagoga i lyjá te rakirél Judenca.

²⁰Jone mangné les, sob (kaj) jov butýr te jačélpe khetané lénca, ne jov otphendiape,

²¹a roziaciape lénca i phendiá: “Mánge trej te javav pe svénko, savó syg javéla, dro Jerusalimo; me risjováva ke tumé, kóli pe davá javéla Devléskiro vólia, i kokoró tradyjá Jefiesostyr.”

²²Kiéli Pávli javdiá dre Kiesarija, jov zagijá dro Jerusalimo, phendiá “ramánjo” devlytkonenge dre štetýtko khangirí, i gijá dre Antióhiia.

²³Jov sys vari-savó časo dre Antióhiia, i gijá odothýr pir sarí Galatijakiri rig i Firgija, i podrikirelas patiaibnaskiren.

²⁴Dre dová časo javdiá dro Jefieso jekh Judo, Alieksandrijatyr i les khardé Apoloso, jov mištó rakirdiá i mištó džindiá Svénto Čhinybén.

²⁵Jov džindiá Ráskire-Devléskiro Drom i rakirdiá baré Duhóskire patyvása, jov rosphenelas i sykliakirdiá saró čačipén pal Isusóste, a kokoró jov džindiá jekh Ianoskiro boldeipen.

²⁶Apoloso murškanés lyjá te rakirél dre sinagoga. Kiéli Akila i Priskila šundlé les, jone khardé les ke pe, i piridyne fededýr lav dro lav Devléskiro Drom.

²⁷I kiéli jov kedyjape te džal dre Ahaiia, pšála bičhadé lyl dolé štetoskire sykliaibnytnytkonenge, sob (kaj) jone les te prilén; kiéli Apoloso javdiá odorík, jov pomogindia (dyja vast) but odolénge, kon patiandyja pir Devléskiro bahtalypén.

²⁸Pal-dová so jov baré zorjása i angíl sarénde patiakirelas Judén i dophenelas Sventoné Čhinybnástyr, so Isúso isyn Xristóso (Miesija).