Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 2 Bible Online

Apostolengiri Butý 2 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 2

¹Kiéli javdiá Duhóskire-svenkitko dyvés (Dúho), saré sykliaibnýtka skedynépe khetané.

²I jekhátyr (srázu) bolybnástyr jaciá šundlo ĥlumo, savó sys sýrby zoralý balvál, so zoralés phurdela, i pherdiakirdiá saró kher, kaj jone sys.

³I sykadyne sykliaibnytkonénge čibá (čibjá), savé xačine jagása, jone rosčhudepe i zgine pir jekh pe kažnonéste léndyr.

⁴I Svénto Dúho (Fáno) pherdiakirdiá sarén i jone lyné te rakirén pe javír čibá (čibjá), syr Dúho (Fáno) dyjá vólia lénge.

⁵Ke Jerusalimo dživdé Judy, savé sys devlýtka manušá; jone javné kažnoné rigéndyr saré parné svetóstyr.

⁶Kiéli mavlýn (malva) progijá (nakhciá) pal davá, skedynépe but manušá, i saré jačné dro na ĥalyibén, pal-dová so kažno manúš léndyr šundiá, syr vari-kon devlytkonendyr rakirdiá pe léngiri čib.

⁷Saré manušá sys kokoré, syr na dre péste dalé divostyr, i rakirdé maškír péste: “Adalé manušá, savé rakiréna, so jone isyn na Galilejani?

⁸Syr da kažno améndyr manúš šunéla, syr jone rakiréna pe každoneskiri améndyr rodno čib.

⁹Maškir aménde isyn adáj Parfiani, i Midiani, i Jelamity, manušá, savé dživéna ke Miesopotamija; Judejátyr i Kapadokijatyr, Pontijatyr i Asijatyr,

¹⁰Frigijatyr i Pamfilijatyr, Jegiptóstyr, adiáke-pac' sys manušá Livijakire štetóstyr, savó sys nádur Kirinijatyr, javné manušá Rimostyr, Judy i prozielity.[1]

¹¹Kritiani i Araby i ame saré šunasa len, syr jone rakiréna pal baré Devléskire réndy pe kažnoné — manušéngire čibá (čibjá)?”

¹²I divindlépe saré, i na ĥalyné nisó i rakirdé jekh jekhéske: “So dasavo saštý (moginéla) te javél?”

¹³Ne javír rakirdé saindoj: “Jone vypine but gudly mol (vino).”

¹⁴Ne Pétri uštyjá khetané péskire dešudujenca Apostolenca ĥazdyjá péskiri zan, i zoralé zaniása phendiá lénge: “Judy i saré manušá, kon dživéla dro Jerusalimo! Mek te javél davá džindló tuménge, i rakhibnýtkes šunén miré lavá.

¹⁵Kadalé manušá isyn na mate, syr davá tuménge zdelape, pal-dová so kakaná jeniá (bijekhéskiro deš) mardé (štundy) dyvesé.

¹⁶Ne davá isyn dová, so phendiá proróko Ioiljo:

¹⁷“I dre palatuné (posliednia) dyvesá, — rakiréla Devél, — Me čhuváva Miro Dúho (Fáno) pe kažno loč (plot'), tumaré čhavé i čhaja javéna te angilphenen i terné manušá javéna te dykhén dová, so Devél déla lénge, a phuré manušá javéna te dykhén suné;

¹⁸i pe Miré pishar'jende, syr pe muršende adiáke-pac' i pe džuvliende, Me čhuváva Miro Dúho (Fáno) dre dolé dyvesá, i jone javéna te angilphenen.

¹⁹I Me sykaváva dívy uprál pe bolybén i znamiénii (ĥiertyká) telál pe phuv, rat, jag i óbloko thuvesa.

²⁰Kham kerélape dro kalypén, i čhon dro rat, angíl syr javéla Devléskiro dyvés, bahtaló i lačhó.

²¹I javéla adiáke: kažno, kon kharéla Devléskiro lav, zrakhélape. Isusóskire réndy dophenena, so Jov isyn Devél.

²²Manušále Izrailjoskire! Šunén adalé lavá: Isusóskire Nazariejoskire, Manušés, Saves Devél vykedyjá vaš tuménge, i dophendia tuménge baré Léskire rendénca (dielenca), ĥiertykénca maškír tuménde, savé tumé kokoré džinéna, i davá sys angíl tumaré jakhá.

²³Isúso sys otdynó dre tumaré vastá pe mén'ki pir Devléskiro zaduminyben, i tumé grehitkoné vasténca muliakirdé Les i primarde pe trušúl;

²⁴ne Devél otdžidiakirdiá Les meribnástyr, i otlyja zor meribnástyr, pal-dová so jov na mogindiá Les te rikirél.

²⁵Pal-dová so Davído rakiréla pal Léste: “Me ŭsády (sak) dykhcjom angíl péste Ras-Devlés, Jov isyn pir čačí (pravo) rig mándyr, sob (kaj) me te na kuninavpe;

²⁶daléstyr obradyndiape miro iló, mirí čib kažno mólo šarela Tut i dre miré masá isyn nadiéia.

²⁷Pal-dová so Tu na jačkiresa miro dúho (fáno) dre liúno (ado), i Tu na désa sventoné Tyréske te dykhél meribén;

²⁸Tu dyján mánge džiibnytko drom; i me javáva te radynavpe angíl Túte.”

²⁹Manušále-Pšalále! Mek te javél mánge saštypen (vozmožnost') te phenáv tuménge pal dadéste Davidóste, so jov myjá i sys garadó, i léskiri koplíca isyn aménde ke/žýko davá dyvés.

³⁰Jov sys proróko i džindiá pal dová, so Devél sovlahadiá léske, so jekhe manušés léskire rodóstyr čhuvéla pe léskiro trono,

³¹jov ž, Davído, angledýr phendiá pal Xristosóskiro otdžidyiben, so i Jov na sys jačkirdo dro liúno i trúpo Léskiro na kirnjola.

³²Devél otdžidiakirdiá Isusós meribnástyr, i ame saré sam jakhítka daleske.

³³Devél ĥazdyjá Les Péskire naj zoraledýr vastésa, i Jov prilyjá Léstyr Svénto Dúho (Fáno), pal savó dyjá lav Dad; Devél kerdiá dová, so tumé kakaná šunéna i dykhéna.

³⁴Davído na ĥazdyjápe pe bolybén; ne jov kokoró rakiréla: ‘Phendia Devél miréske Devléske, beš pir čačí rig Mándyr.

³⁵Paka Me čhuváva vergén Tyrén ke ĥerá’.

³⁶I paldavá džin mištés, saró kher Izrailjoskiro, so Devél kerdiá Kadalé Isusósa, Rása-Devlésa i Xristosósa, Saves tumé primarde pe trušúl.”

³⁷Kiéli manušá šundlé saró davá, jone ĥalyné péskire ilenca bang i phendlé Petriske i javire Apostolenge: “So aménge te kerás, Manušále-Pšalále?”

³⁸Pétri phendiá lénge: “Riskirén péskiro džiibén ke Devél, mek kažno manúš tuméndyr te bolelpe dro Isusóskiro Xristosóskiro lav, sob (kaj) te otmekenpe tumaré gréhi, i tuménge javéla otdyibén Devléstyr-Svénto Dúho (Fáno).

³⁹Pal-dová so pal davá grehengiro otmekiben ĥará sys dynó lav tuménge, čhavénge tumarenge i sarénge, adiáke-pac' i odolénge, kon dživéla dur tuméndyr, konés kharéla ke Pe Raj Devél amaró.”

⁴⁰I buté javire lavénca Pétri dophenelas i mangdiá len, rakirí: “Rakhénpe adalé rozmekne manušytkoné rodóstyr.”

⁴¹I odolé, kon ilésa prilelas léskiro lav, boldepe, i dro dová dyvés upatiándyne pašé trin tysjoncy manušá.

⁴²I jone ŭsády (sak) javénas khetané pir Apostolengiro sykliakiribén te rakirén jekh jekhésa, te phagiren maró i te mangénpe Devléske.

⁴³Sys dar kažnoné manušéste angíl Devléste; i but dívy i ĥiertyká kerdé Apóstoly dro Jerusalimo.

⁴⁴I saré, kon patiandyja, sys khetané, i saró, so lénde sys, sys pe sarénde;

⁴⁵jone biknenas felatiniá i saró péskiro barvalypén, so lénde sys, i rozdenas sarénge pir dová, kon so trebindia.

⁴⁶I kažno dyvés jone kedenaspe khetané dre Khangirí, phagirenas maró i xanas khetané radymása i čačipnása dro iló,

⁴⁷i jone šarenas Devlés i saré manušá sykade patýv lénge; i Raj Devél kažno dyvés janelas zrakhné manušén dre Khangirí.