Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 20 Bible Online

Apostolengiri Butý 20 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 20

¹Kiéli košybén štylyja, Pávli khardiá sykliaibnytkonén, oblyja len, a kokoró gijá dre Makiedonija.

²I kiéli jov progijá pir dalé štéty, jov podrikirdia len buté lavénca, i javdiá dre Griécyja (Balámija).

³Pávli sys odój trin čhoná angíl léskiro tradypen ke Sirija, kiéli Judy zrakirdepe proti léste, i jov piridumindia te risjol pale pir Makiedonija.

⁴Les lydžánas Sosipatro, Piroskiro čhavó, Vierijanino, a Aristarho i Siekundo Fiesalonikiicendyr, i Gajo Diervianino i Xima (Timofiejo), Tihiko Trafimosa Asijatyr.

⁵Jone proginé angíl i užakirde amen dre Troada;

⁶ne ame korigedýr (pozžedýr) Apriesnokengire Svenkostyr vytradyjam Filipinendyr, i pir pandž dyvesá javdiám ke jone dre Troada, kaj sámas ohtó (bidujéngiro deš) dyvesá.

⁷Dro pérvo kurkitko dyvés, kiéli ame skedyjampe te phagiras maró, Pávli rakirdiá lénca, a pe javír dyvés jov kedelaspe te džal dro drom. I jov rakirdiá duredýr ke pašrat.

⁸Dre upratuny štúba, kaj ame skedyjampe, xačine but jaga.

⁹Pe fenštra sys beštó ternó manúš, savés khardé o Jevtiho, adiáke syr Pavlískiro rakiribén sys dléngo (gará), Jevtiho zasucia i pyjá telé pe phuv tritone vučypnastyr (etažostyr), i les ĥazdyné phuvjátyr mules.

¹⁰Pávli gijá telé, bandija pašýl léste i oblyja les, phení: “Na piridživen, pal-dová so léskiro dúho (fáno) isyn dre léste.”

¹¹I kiéli Pávli ĥazdyjápe upré, jov phagirdiá maró, xaja, i rakirdiá lénca sarí rat ke/žýko zlóko (ránko), a tedy gijá duredýr.

¹²A terné manušés jandlé džides, i jone saré sys drieván ráda.

¹³Ame gijam angíl pe párma (korablie) i plyvindiam (dyjam plíma) dro Aso, sob (kaj) te las odothýr Pavlís: pal-dová so jov kokoró adiáke kamdiá, jov kedyjape odothýr te džal pezal.

¹⁴Kiéli jov strenindiape (dykhciape) aménca dro Aso, tedy ame lyjam les ke pe i javdiám dre Mitilina,

¹⁵I odothýr pe javír dyvés ame tradyjam duredýr i javdiám dro Xioso, a pe javír dyvés dogijam ke Samoso, i pir javír dyvés pritradyjam dro Milieto:

¹⁶pal-dová so Pávli zadumindia te na zatradel dro Jefieso, sob (kaj) léske te na zarikirelpe dre Asija, pal-dová so jov kamdiá, syr saštý sygedýr te perél odorík angíl Duhoskiro Svénko dúho dro Jerusalimo.

¹⁷Milietostyr jov bičhadiá manušén, sob (kaj) odolé te kharén khangirjákire godephuren.

¹⁸I kiéli jone javné ke jov, jov phendiá lénge: “Tumé džinéna, syr me anglatuné dyveséstyr, kiéli javdjom dre Asija, saró davá časo sómas tuménca,

¹⁹i me kandyjom sareske, i me kerdjom butý jasvénca vaš Devléske, na dykhí pe saró, so mánge prigijape te piridživav pal Judéngiro zrakiribén proti mánde;

²⁰i syr me na promekcjom nisó te phenáv lav pal Isusóste tuménge, so tuménge javéla trej, i rakirdjom angíl sarénde i psirdjom pir kherá,

²¹me i syr rakirdjom Judénge i Griekénge (Balaménge), so jone sys bangé (musindle) te riskirén péskiro džiibén ke Devél i te patián dre Raste-Devléste, amaré Isusóste Xristosóste.

²²I, ĥáda, kakaná me, syr Dúho (Fáno) lydžála man, me džáva ne Jerusalimo, i me na džinóm, so odój mánca javéla;

²³a jekh Svénto Dúho (Fáno) pir saré fórja phenéla mánge pal dová, so man užakiréna mén'ki i štaribén.

²⁴Ne me ni pe so davá na dykháva, i me na darava pal péskiro džiibén, jekh mánge trej te prodžav miro drom i te keráv réndo (diélo), savó dyjá mánge Raj Devél, Isúso Xristóso, te lydžav bahtalý zan (zvies') manušénge pal Devléskiro bahtalypén.

²⁵I kakaná, ĥáda, me džinóm, so butýr tumé na dykhéna man saré, konesa me sómas khetané i konéske me phendjom lav pal Devléskiro Kralipén.

²⁶Paldavá me i rakiráva tuménge davá adadyvés, so nane mirí bang pal rat, kóli kon tuméndyr xasjola,

²⁷pal-dová so me nisó na promekcjom te rosphenav tuménge pal Devléskiri vólia.

²⁸I adiáke rakhén pes i saré devlytkoné manušén, savén Svénto Dúho (Fáno) čhudiá te javén khangirjákire barydyrénca (dykhibnaskirenca), sob (kaj) te rakhén Devléskiri Khangirí, saví Jov doresciá Péske Léskire-Čhavéskire Ratésa.

²⁹Me džinóm, so kiéli man na javéla, ke tumé javéna xoliamé manušá, syr ruvá, savé na javéna te tanginen (žalinen) devlytkonen;

³⁰adiáke-pac' i maškír tuménde javéna manušá, savé javéna te rakirén xohanó sykliaiben, sob (kaj) te zlydžan pal péste sykliaibnytkonén.

³¹Paldavá dykhén i rakhénpe i ripirén, so me na pirijačavas te sykliakirav kažnones tuméndyr saré trin berš a ratý i dyvesé jasvénca.

³²I kakaná, me piridava tumen Devléske i Léskire bahtiakiribnaskire lavéske, savó javéla te zorjakirel tumen i déla džiibén khetané sventonenca.

³³Me nikonestyr na kamdjom te lav ni rup, ni suvnakái, ni ídia.

³⁴Tumé kokoré džinéna, so me péskire vasténca zakeravas pe džiibén péske i odolé manušénge, savé sys mánca.

³⁵Dro saró, so me te na keráv, me sykadjom tuménge, so amarí butý isyn dro dová, sob (kaj) te pomoginas čororenge, i te ripiras Ráskire-Devléskire Isusóskire lavá; savé Jov Kokoró phendiá, so manúš, savó déla, javéla bahtaledyr odoléstyr, savó léla.

³⁶Kiéli Pávli phendiá davá, jov terdijá pe čangá khetané sarénca i mangdiápe Devléske sarénca.

³⁷I jone saré rondlé, oblenas les i občamudenas,

³⁸i jone drieván piridživenas pal léskire lavá, savé jov phendiá, so jone butýr nijékhvar na dykhéna les. I jone lydžiné les pe párma (korabljo).