Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 22 Bible Online

Apostolengiri Butý 22 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 22

¹“Muršále, pšalále, dadole! Šunén kakaná miro lav te čačakirav (te opradynav) pes angíl tuménde.”

²Kiéli manušá šundlé, so jov lyjá te rakirél lénca Judytkes, jone lyné te javén štyledyr.

³I jov phendiá: “Me som Judo, bijandyjom dro Kilikijakiro Tarso, a vybarijom me dre davá fóro, me som lačhés vysykliakirdo dre amaré dadéngiro i vystalindjompe pašýl Gamaliiloste dro Zakóno, i adiáke-pac' me patiáva dre Devléste, syr i saré tumé adadyvés;

⁴me kerdjom bipatyv (zdiekindjompe) pe manušénde, savé giné dalé dromésa, phandavas i čhuvavas dre štaribén muršén i džuvlién;

⁵davá sareske isyn jakhítka, pérvo rašángiro barydyró, saró phurydyrengiro skedyibén, savéndyr me dorescjom (lyjom) lyl pšalénge, savé dživéna ke Damásko, me gijom odorík vaš dová, sob (kaj) te zakedav kodolén manušén dre sastyrá i te janav len dro Jerusalimo pe mén'ki.

⁶I sys davá saró adiáke: kiéli me gijom pir drom odorík i pašýl podgijom ke Damásko, sys davá dro pašdyves, syr bolybnástyr zaziaindia pašýl mánde baró dud (svéto).

⁷Me pyjom pe phuv i šundjom zan, saví rakirdiá mánge: “Sávlie, Sávlie! Sóske tu Man tradesa?”

⁸I me otphendjom: “Kon Tu san, Rajo Dévla?” I Jov otphendiá mánge: “Me som Isúso Nazariejo, Saves tu tradesa.”

⁹Manušá, savé sys mánca, dykhné svéto, ne jone na šundlé zan Odoleskiri, Kon mánge rakirdiá.

¹⁰I me phendjom: “Rajo Dévla! So mánge te keráv?” Raj Devél phendiá mánge: “Uštý i džá dro Damásko i odój túke phenéna saró, so javéla trej túke te kerés.”

¹¹Ne syr me odolé jarkone dudéstyr kororijom, tedy manušá, savé sys mánca, jandlé pal vast man dro Damásko.

¹²I odój sys jekh manúš, savés khardé Ananija, jov darelas Devléstyr pir Zakóno, a saré Judy, savé dživdé odój, kutiakirde les,

¹³i jov javdiá ke me i phendiá mánge: “Sávlie, Pšála, dykh!” I dre dová-pac' časo (momiento), me jacjom te dykháv i dykhcjom les.

¹⁴I jov phendiá mánge: “Devél amaré dadéngiro vykedyjá tut, sob (kaj) tu te udžines Léskiri vólia i te dykhés čačunés i te šunés lavá, savé Jov kokoró túke phenéla,

¹⁵pal-dová so tu javésa jakhítko Léske angíl saré manušénde pal dová, so tu dykhcián i šundián.

¹⁶I so tu kakaná užakiresa? Uštý, džá te priles boldeipen, i sob (kaj) te morenpe krig gréhi tyré, kiéli pomangesape Devléske vaš Ráskire-Devléskiro, Isusóskiro lav.”

¹⁷I kiéli me risijom dro Jerusalimo i mangdjompe dre Khangirí, me javdjom dro divno piridživiben i mánge sys dykhibén,

¹⁸kiéli me dykhcjom Ras-Devlés, Savó phendiá mánge: “Sygedýr džá krig Jerusalimóstyr, pal-dová so adáj na priléna tyró dophenybén pal Mánde.”

¹⁹I me phendjom: “Rajo Dévla! Adalé manušá džinéna, so me čhudjom dro štaribén i mardjom dre sinagogi odolén, kon patiála dre Túte;

²⁰i kiéli čhuvelaspe rat tyré-jakhitkoneskire Stiehvanoskiro, me kokoró odój sómas terdó, i podrikiravas léskiro maribén, me adiáke-pac' rakhcjom léskire — umaribnar'jengire ídi.”

²¹I Jov phendiá mánge: “Džá, pal-dová so Me bičhaváva tut dur ke Náiudy.”

²²Ke davá lav manušá šundlé Pavlís, ne syr jov adiáke phendiá, jone lyné te godlen: “Les trej te zlydžas svetóstyr, adasaveske naštý te dživél.”

²³I kiéli jone dénas gódla, jone trinskirde péskire idienca i čhurdenas upré práho dro fáno (vozduho).

²⁴I tysjoncengiro barydyró phendiá te lydžán Pavlís dro štaribén i priphendiá te marén les čhupniasa, sob (kaj) te džinén, sóske manušá adiáke pe léste isyn xoliamé.

²⁵Kiéli les priphandenas, sob (kaj) te marén, Pávli phendiá šelengire barydyréske, savó sys terdó pašýl: “Ci saštý tuménge te marén Rimóskire manušés bi sendoskiro?”

²⁶Kiéli davá šundiá šelengiro barydyró, jov gijá i rosphendiá tysjoncengire barydyréske, phení: “So tu kedesape te kerés? Kadavá isyn Rimoskiro manúš.”

²⁷Tedy tysjoncengiro barydyró vygijá ke Pávli i phuciá léstyr: “Phen mánge, ci čačó, so tu san Rimoskiro manúš?” Jov phendiá: “Čačó.”

²⁸I tysjoncengiro barydyró phendiá: “Sob (kaj) te jačav Rimóskire manušésa, mánge prijavdiape te pleskirav baré lové.” Pávli otphendiá: “A me bijandyjom Rimóskire manušésa.”

²⁹Tedy odolé manušá, savé kedynepe te dophučen léstyr, uraz giné; a tysjoncengiro barydyró strahadyja, syr udžindiá, so jov zaphandia dre sastyrá kodolés, savó sys Rimoskiro manúš.

³⁰I pe javír dyvés, jov zakamdiá te džinél, dre so Judy bangiakirenas les i jov zlyjá léstyr sastyrá i priphendiá vaš davá saré rašángire barylyrenge i sendar'jenge (Siniedrionoske) te skedénpe, i kiéli jandiá Pavlís, čhudiá les angíl lénde.