Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 23 Bible Online

Apostolengiri Butý 23 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 23

¹Pávli dykhcia mamúj pe manušénde, savé kedynepe, i phendiá: “Muršále, pšalále, dadole! Me lačhé i čačuné ilésa dživdjom péskiro džiibén angíl Devléste ke/žýko adadyvesatuno dyvés.”

²Ne rašángiro barydyró Ananija priphendiá manušénge, savé sys terdé pašýl Pavliste te marén les pir uštá.

³Tedy Pávli phendiá léske: “Devél javéla te marel tut, vánta podmakny tu san! I beštó tu san odój, vaš dová, sob (kaj) te sendiakires man pir Zakóno, a kokoró tu kerésa na pir Zakóno, kóli priphenesa te marén man?”

⁴Odolé, kon sys terdó pašýl Pavliste, phendlé léske: “Tu košesa Devléskire-rašángire barydyrés.”

⁵I Pávli otphendiá: “Me na džindjom, pšalále, so jov isyn rašángiro barydyró, pal-dová so dro Svénto Čhinybén rakirelape: ‘Na koš manušéngire barydyrés.’”

⁶Ne Pávli džindiá, so jekh paš léndyr sys Sadukiei, a javír paš Farisiéi, paldavá jov lyjá zoralés te rakirél Siniedrionoske (sendoskire skedyibnaske): “Pšalále miré! Me som Farisiejo, čhavó Farisiejoskiro; i sendinena man pal miro lačhó užakiribén dro otdžidyiben muléndyr.”

⁷Kiéli jov phendiá davá, maškír Farisiejende i Sadukiejende vygijá košybén, i manušá Skedyibnastyr rozginepe pe duj rigá.

⁸Pal-dová so Sadukiei rakiréna, so nane otdžidyiben muléndyr, ni Jangolen, ni dúho (fáno); a Farisiéi patiána dre saró davá.

⁹I ĥazdyjápe bari gódla, i uštyné lylvarítka Farisiejengire rigátyr i lyné te rakirén: “Ame nisavó čoripén na lathiam dre adalé manušéste; kóli dúho (fáno) ci Jangólo rakirdiá léske?”

¹⁰Ne adiáke, syr košybén jaciá baredýr, tedy tysjoncengiro barydyró strahadyja, sob (kaj) jone te na roskušen Pavlís, i priphendiá xaladenge te džán i te len les odothýr zorjása i te otlydžan dro štaribén.

¹¹Dre javír rat ke jov javdiá Raj Devél i phendiá: “Jav murškanó; pal-dová so syr tu sánas Miro jakhítko dro Jerusalimo, adiáke-pac' tu javésa jakhítko i dro Rimo.”

¹²Kiéli jaciá dyvés, Judy zrakirdepe maškirál péste i dyné sovláh, te na xan i te na p'jen, paka jone zamarena Pavlís.

¹³Dro davá zrakiribén sys butýr, syr štardešá manušá;

¹⁴i jone javné ke rašángire barydyrá i ke godephuré i phendlé: “Ame dyjam péske sovláh te na xas nisó, paka ame zamarasa Pavlís.

¹⁵Tumé i sendoskiro skedyibén mangén tysjoncengiro barydyrés, sob (kaj) te janén les ke tumé, sýrby vaš dová, sob (kaj) fededýr te rozdykhes léskiro réndo, a me javása te terdjovas pe stréga i dása muló (muliakirasa) les angledýr, syr jov dodžála adarík.”

¹⁶Kiéli pal davá zrakiribén šundiá Pavliskire — pheniakiro čhavó, jov javdiá dro štaribén i rosphendiá léske i pal davá.

¹⁷Tedy Pávli khardiá jekhe šelengire barydyrés i phendiá léske: “Lýdža kadales terné manušés ke tysjoncengiro barydyró, pal-dová so jov kaméla vari-so te phenél léske.”

¹⁸Odová lydžijá les ke tysiencengiro barydyró i rakiréla: “Štaribnaskiro Pávli, khardiá man i mangdiá te janav ke tu kadalé terné manušés, savó kaméla vari-so te phenél túke.”

¹⁹Tysjoncengiro barydyró lyjá les pal vast, lydžijá les dre rig i phuciá: “So tu dasavo kamésa mánge te phenés?”

²⁰Jov phendiá: “Judy skedynépe te mangén tut, sob (kaj) atasiá tu te janes Pavlís pe skedyibén, sýrby vaš dová, so jone kaména fededýr te roskedenpe dre léskiro réndo.

²¹Ne tumé na patián lénge, pal-dová so les podrakhena butýr, syr štardešá manušá, savé dyné sovláh te na xan i te na p'jen, paka jone zamarena les; i jone kakaná isyn terdé pe stréga i užakiréna tyró uphenybén.”

²²Tysjoncengiro otmekciá terné manušés, i priphendiá léske: “Nikonéske na rákir pal davá, so tu rosphendian mánge.”

²³I kiéli jov vykhardia dujén péskire barydyrén i priphendiá lénge: “Keden dujšelá xaladén te džán ke Kiesarija, ohtodešá uklisté pe grénde i dujšelá xaladé lukenca pir trin mardé korigedýr (pozžedýr) doléstyr, syr kaljola javrí dre jeniá (bijekhéskiro deš) mardé (časy).

²⁴I den Pavliske oslós, sob (kaj) jov te bešél uklisto/e pe léste i te janén džides les ke balunitko (pravitieljo) Fielikso,

²⁵I jov čhindiá adasavó lyl:

²⁶“Klavdijostyr Lisijostyr Naj Fedydyreske balunitkoneske Fieliksoske, lačhó dyvés!

²⁷Kadalé manušés uhtyldé Judy i kedynepe te muliakirén; me javdjom xaladenca i zrakhcjom les, adiáke syr me udžindjom, so jov bijándyja dro Rimo.

²⁸Pal-dová so me zakamdjom te udžinav, dre so isyn léskiri bang angíl lénde, me jandjom les angíl léngiro sendoskiro skedyibén;

²⁹i me ĥalyjom, so bang léskiri isyn sphandly léngire Zakonosa, i so nane dre léste nisaví bang, sob (kaj) jov te javél mol meribnáske ci te čhuvés les dro štaribén.

³⁰A syr me udžindjom, so Judy zrakirdepe te muliakirén adalé manušés, me dre dová-pac' časo bičhadjom les ke tu i priphendjom manušénge, savé bangiakirena les, te rakirén proti léste angíl túte. Jav sastó.”

³¹Paldavá xaladé pir uphenybén, savó lénge sys dynó, lyné Pavlís i giné ratý khetané lésa dre Ancipatrida,

³²i pe javír dyvés, jone bičhadé xaladén, savé tradyne uklisté pe grénde, te lydžán Pavlís, a kokoré risiné dre kazarma.

³³I odolé, kiéli javné dre Kiesarija, piridyne balunitkoneske lyl i adiáke-pac' čhudé Pavlís angíl léste.

³⁴Balunitko gindia lyl i phuciá Pavlístyr, savé jov sys štetóstyr, i kiéli jov udžindiá, so jov sys Kilikijatyr, tedy phendiá:

³⁵“Me vyšunava tut pherdés, kiéli adarík javéna manušá, savé bangiakirena tut.” I jov priphendiá xaladenge te rikirén les pe Irodoskiri gréda (dvóro).