Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 24 Bible Online

Apostolengiri Butý 24 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 24

¹Pir pandž dyvesá rašángiro barydyró Ananija javdiá godephurénca, i vari-savé slavutnone pharé-lavéskirésa (oratorosa/ritorosa) Tiertulosa, i jone phendlé pal Pavliskiri bang angíl balunitkoneste Fieliksoste.

²Kiéli jone jandlé Pavlís, o Tiertulo lyjá te dophenel Pavliskiri bang, rakirí: “Parikirasa túke, so, syr tu jacián balunitkonesa, amarí rig jaciá ramanjonó (mirnoo) i jaciá mištó te dživél i amaré-manušéngiro džiibén jaciá fededýr, pir tyré paruibena.

³Save ame prilasa, Naj Fedydyr Fielikso, dro saró i pir saró svéto saré parikiribnasa.

⁴Ne, sob (kaj) tut ĥará (dlúges) te na khiniakiras, me mangáva Tut te vyšunes nabaró mangipén pir tyró kovlo iló.

⁵Ame džinása, so adavá manúš isyn sýrby fránso i jov ĥazdéla búnto maškír saré Judénde i pir saró svéto, jov isyn šeraló pir Nazariejoskiri siekta;

⁶jov kamdiá te magirel amarí Khangirí, paldavá ame les zarikirdiam i kedyjampe te sendiakiras pir amaró Zakóno;

⁷ne tysjoncengiro barydyró Liso javdiá i otlyja zorjása les amaré vasténdyr i bičhadiá ke tu,

⁸i jov priphendiá aménge te džas i angíl túte te dophenas léskiri bang, a kiéli tu dophučesa léstyr, tu kokoró javésa te džinés, so amaró dophenybén pe léste isyn čačunó”

⁹I Judy podrikirde léngiro dophenybén, rakirí, so saró davá, so jone rakirdé pe léste, sys čačipén.

¹⁰Kiéli balunitko sykadiá vastésa Pavliske te rakirél, jov otphendiá: “Pal-dová so Me džinóm, so tu san sendári but berš pe adalé manušénde, me ginava davá pal bari baht i drieván som rado, so mánge saštý te otphenav angíl túte pal miro réndo (diélo).

¹¹Syr tu moginésa davá saró te propatias, dešudúj dyvesá pale me javdjom vaš mangipén Devléske dro Jerusalimo,

¹²i adalé manušá, savé angíl túte dophenena mirí bang, jone nijékhvar man na dykhné ni dre Khangirí ni dre sinagoga, sob (kaj) me vari-konesa te lydžav čingárd, ci te ĥazdav manušén pe búnto dro fóro,

¹³adiáke-pac' jone na moginéna te dophenen mirí bang pir réndo, dro savó jone kakaná bangiakirena man.

¹⁴Ne me dre jekh mogináva te priĥaljovavpe túke, so me dynarinava amaré-dadengíre Devléske i džáva pir davá Drom, savó jone kharéna “ieries' (siekta),” me patiáva sareske, so isyn čhindló dro Zakóno i Proróki;

¹⁵i mánde isyn lačhó užakiribén Devléstyr, so javéla otdžidiakiriben muléndyr, syr čačunen, adiáke-pac' i načačune manušén, dová-pac' jone i kokoré užakiréna.

¹⁶Vaš davá me kokoró dykháva pal dová, sob (kaj) mánde ŭsády (sak) te javél žužy patýv angíl Devléste i manušénde.

¹⁷Korigedýr (pozže), syr giné beršá, me javdjom dro Jerusalimo, vaš dová, sob (kaj) te otdav skedyibnytko dyibén miré manušénge, i sob (kaj) te janav svénto dyibén Devléske;

¹⁸tedy jone i lathné man, kiéli me kerdjom žužakiriben pir Zakóno dre Khangirí, i na sys manušá pašýl mánde, na sys ni savó búnto.

¹⁹Ne adáj ža treindiá te javén Judénge Asijatyr, te javén ke tu i te dophenen mirí bang, kóli vari-so isyn lénde proti mánde;

²⁰ci mek jone kokoré te phenén, dre so jone lathné mirí bang, kiéli me javdjom angíl sendoskiro skedyibén,

²¹a sys jekh davá lav, savó me zoralés phendjom, kiéli me sómas terdó maškír lénde: “Pal otdžidiakiriben muléndyr tumé sendinena adadyvés man!”

²²I Fielikso, savó mištés džindiá davá Drom, otčhudia Pavlískiro réndo i phendiá: “Kiéli javéla tysjoncengiro barydyró Liso, me rozdykhava tyró réndo”;

²³i priphendiá šelengire barydyréske te rakhén Pavlís, ne te del léske butýr vólia, i te na zaphenel nikonéske léskire pašatunendyr te dynarinén léske.

²⁴Pir vari-kicý dyvesá Fielikso javdiá péskire romniása Judycasa, savjá khardé Druzila, i jov bičhadiá pal Pavliste, sob (kaj) te džinén butýr pal léskiro patiaibén dre Isusóste Xristosóste.

²⁵I pal-dová so Pávli rakirdiá pal čačipén, i pal-dová, sob (kaj) te obrikirel pes dro džiibén angíl séndo, savó angíl javéla, o Fielikso strahadyja i phendiá: “Kakaná džá, ne syr javéla mánde časo, me kharáva tut”;

²⁶léste sys lačhó užakiribén, so Pávli déla léske lové: pal-dová jov bičhavelas adiáke-pac' pal léste butýr i jov rakirdiá lésa.

²⁷Ne proginé (nakhle) duj beršá, i Porcyjo Fiesto parudia Fieliksos, a Fielikso zakamdiá te javél kuč Judenca, paldavá mekciá Pavlís dro štaribén.