Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 25 Bible Online

Apostolengiri Butý 25 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 25

¹I paldavá, kiéli Fielikso javdiá pe daja rig, jov pir trin dyvesá gijá Kiesarijatyr dro Jerusalimo.

²Dro Jerusalimo rašángire barydyrá i Judéngire šeralé javné bangiakiribnasa pe Pavliste ke jov i mangné les,

³sob (kaj) jov te otphenel pe léngiro mangipén i te vykharel Pavlís dro Jerusalimo; a kokoré jone kamlé te podrakhen les pir drom i te zamarén.

⁴Ne Fiesto otphendiá lénge, so Pávli sys beštó dro štaribén dre Kiesarija, i so jov syg kokoró džála odorík.

⁵“Paldavá, — phendiá jov, — kon tuméndyr isyn barydyrá, mek te džán khetané mánca, i te dophenen odój léskiri bang, kóli jov kerdiá savó fuipén.”

⁶Jov jaciápe maškír lénde eftá (bitrinéngiro deš) ci deš dyvesá, a tedy risijá dre Kiesarija, i pe javír dyvés besciá pe sendariskiro štéto i phendiá te janén Pavlís.

⁷Kiéli Pávli javdiá, Judy, savé javné Jerusalimóstyr, terdiné trusciál léste i lyné te čhuvén pe Pavliste drieván bari bang, ne te dophenen la jone na mogindlé.

⁸Tedy Pávli otphendiá pal péskiro čačipén: “Me na kerdjom ni savó čoripén ni proti Judýtko Zakóno, ni proti Khangirí, ni proti khieningóste (kiesarjoste).”

⁹O Fiesto kamdiá te zadžál dre patýv Judénge, i paldavá phuciá Pavlístyr: “Ci tu kamésa te džas dro Jerusalimo, sob (kaj) me odój te sendinav tut dre dová, dre so tut bangiakirena?”

¹⁰Ne Pávli phendiá: “Me som terdó angíl khieningoskiro séndo, i adáj man isyn bangé te sendinén; me na kerdjom nisavó čoripén Judénge, syr i tu kokoró šukár džinésa mištó davá.

¹¹Tedy, kóli me som bangó i kerdjom vari-so, pal so me som mol meribnáske, tedy me na davape pale meribnástyr; ne kóli nisó davá nane, dre so jone bangiakirena man, tedy nikón na moginéla te vydel man lénge. Me trebinava khieningoskiro séndo.”

¹²Tedy Fiesto pirirakirdia péskire manušénca skedyibnástyr i otphendiá: “Tu mangdian, sob (kaj) tut te sendinel khieningo, ke khieningo tu i džása.”

¹³Pir vari-kicý dyvesá králi Agrípa i Vierienika javné dre Kiesarija te den “paklono” Fiestoske.

¹⁴I adiáke, syr jone sys odój but dyvesá, Fiesto rosphendiá pal Pavlískiro réndo kralíske: “Adáj isyn jekh manúš, savés Fielikso čhudiá dro štaribén,

¹⁵pe savéste, kiéli me sómas dro Jerusalimo rašángire barydyrá i Judéngire godephuré javné bangiakiribnasa pe léste; jone mangné, sob (kaj) me les te sendinav:

¹⁶a me otphendjom lénge, so Rimlianende adiáke na lydžalape, sob (kaj) te vydes vari-savé manušés pe meribén; ke/žýko dová časo, paka léske javéla dophendly léskiri bang muj ke muj i javéla saštý (možno), sob (kaj) jov te rakirél pal péskiro čačipén.

¹⁷I kiéli jone javné adarík khetané mánca, i me tedy na otčhudjom, ne pe javír dyvés, bescjom pe sendariskiro štéto i phendjom te janén adalé manušés:

¹⁸les obštade manušá, savé javné te bangiakiren les i nikón léndyr na dophendia dre dolé nalačhé réndy, pal savé me dumindjom;

¹⁹a lénde sys phučibena ke jov pal léngire patiaibnaskiri štáma (svódo), i pal vari-savé Isusóste, savó myjá, ne pal Savéste Pávli dophenelas, so Jov isyn džidó.

²⁰Me na džindjom, syr mánge roskedavpe dre davá réndo, me phucjom léstyr, ci kaméla jov te džal dro Jerusalimo i te javél sendindlo odój?

²¹Ne adiáke, syr Pávli mangdiá, sob (kaj) les i léskiro réndo jačkirav pe Avgustoskiro rozdykhiben, me priphendjom te rikirén les dre štaribén, paka mánge javéla saštý te bičhavav les ke khieningo.”

²²Agrípa phendiá Fiestoske: “Me i kokoró kamám te šunav kadalé manušés.” Odová otphendiá: “Atasiá šunesa les.”

²³Pe javír dyvés, kiéli Agrípa i Vierienika baré phut'kiribnasa giné andré sendoskiro kher khetané tysjoncengire barydyrénca i patyvalé manušénca, pir Fiestoskiro priphenybén jandlé Pavlís.

²⁴I Fiesto lyjá te rakirél: “Králjo Agrípa! Saré manušá, kon isyn khetané aménca, tumé dykhéna kadalé manušés, pal savéste but Judy javénas ke me dro Jerusalimo i adáj godlása i mangipnasa, so kadavá manúš na mol butýr te dživél.

²⁵Ne me roskedyjompe, so jov na kerdiá nisó dasavo, sob (kaj) te javél mol meribnáske, i syr jov kokoró mangdiá Avgustoskiro séndo, me kedyjompe te bičhavav les ke jov;

²⁶ne me na dykháva nisó dasavo, so te čhinav pal adalé manušéste miré Ráske. Paldavá me jandjom les ke tumé, ne butýr saréstyr ke tu, králjo Agrípa, sob (kaj) korigedýr (pozže), syr tu léstyr dophučesa, mánge te džináv, so mánge te čhinav.

²⁷Mánge zdelape, so naštý te bičhaves štaribnaskires, kóli me te na uphenav pe léskiri bang.”