Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 27 Bible Online

Apostolengiri Butý 27 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 27

¹Kiéli sys prilyno te plyvinas (das plíma) dre Italija, tedy Pavlís i javirén štaribnaskiren zdyne tysiencengire-xaladéngire barydyréske, savés khardé Julijo, jov isyn Augustoskire polkostyr.

²Ame besciam pe Adramitoskiri párma (korabljo), savéske treindiá te tradel pašýl Azijakire štéty i tradyjam, aménca sys Aristarho, Makiedonianino Fiesalonikendyr.

³I pe javír dyvés ame pritradyjam dro Sidono. Julijo otlydžalaspe ilésa ke Pávli, délas vólia léske te psirél ke drúgi (malá), sob (kaj) jone te dykhén pal léste.

⁴I tradyi odothýr, ame tradyjam pašýl Kipro balvaliakire rigátyr, pal-dová so jaciá bari balvál mamúj (priames) dre amarí rig.

⁵Kiéli ame piriplyvindiam (dyjam plima) mórjo (derjáv) Kilikijakire i Pamfilijakire bregostyr, ame pritradyjam dre Likijakire Miry:

⁶odój xaladéngiro barydyró, lathiá Alieksandrijakiri párma, saví tradyjá ke Italija, i čhudiá amen pe láte te tradas.

⁷Ame but dyvesá i pe nábut plyvinasas (dasas plima), i pir bari zor ame dogijam ke Knido adiáke, so pir bari balvál ame na mogindiam te plyvinas duredýr, i ame podtradyjam ke Krito Salmonoskire rigátyr.

⁸I baré pharipnasa ame tradasas pašýl Kiproskiro brégo, i javdiám ke jekh štéto, savó kharenas Lačhé Pristani (Zatoki), nádur odothýr sys fóro Laseja.

⁹Ne adiáke, syr progijá drieván but časo, i te plyvines sys darano, pal-dová so i posto progijá, tedy Pávli lyjá te patiakirel len,

¹⁰i jov rakirdiá lénge: “Muršále! Me dykháva, so davá plyvinyben javéla bidasa i baré xasiakiribnasa na jekh vaš jekh pharipen (gruzo) i párma, ne i vaš manušéngiro džiibén.”

¹¹Ne xaladéngiro barydyró butedýr patiandyja manušéske, savó lydžalas párma i léskire xuláske, a na Pavliskire lavenge.

¹²I pal-dová so, syr kadavá zatoko na poddžalas, sob (kaj) odój te javas saró/í ivant (zima), i but manušá sys pal dová, sob (kaj) te tradas krig odothýr, i, kóli te javél saštypen te dokedaspe ke Finika i odój te dživás ivante (zimakiro), Finika sys Kritoskiro porto, karik mogindlé te zadžán pármy, i sys začhakirdo balvaliatyr paš-dyvesytkoné-zapadnonengire i paš-ratitkoné-zapadnone rigéndyr.

¹³I kiéli jaciá nabari balvál paš-dyvesytkoné rigátyr, jone podumindle, so jone doresné dová, so lénge trej, ĥazdyné jakorjo te plyvinen (te den plima) nádur bregostyr pašýl Krito.

¹⁴Ne syg ĥazdyjápe pe Krito baró štormo, savó kharélape Jevroklidono.

¹⁵I pal-dová, so amarí párma poduhtyldia balvál, joj na mogindiá te plyvinel (te del plima) duredýr proti balvál, ame mekciam párma te plyvinel (del plíma) balvaliasa i amen čhurdelas dre saré rigá.

¹⁶A kiéli ame sýrby piriurniandyjam mamúj nabaró kotér phuv, savó kharéna Klavda, odój ame baré pharipnasa pirizorjakirdiam (zbierdyndiam) te rikiras parmakiri bárka (lodka),

¹⁷savjá ĥazdyné pe párma, kiéli protyrdyne šole trusciál i tel párma i obphandlé la; jone darándyne, sob (kaj) te na javén vyčhurdyne balvaliasa pe práho dre Sirto, paldavá jone zmekne balvaluné (párusy) i duredýr jone adiáke tradenas.

¹⁸Ne pal baró štormo, savó zoralés čhurdelas amarí párma dre saré rigá, pe javír dyvés ame lyjam te vyčhurdas pharipén (gruzo) dro paní,

¹⁹a pe tríto dyvés jone péskire vasténca vyčhurdyne saró parmakiro mištypén (osnaščenijo) dro paní.

²⁰I syr but dyvesá na sys bicialó ni kham, ni čergeniá, i štormo na pirijačelas te štyljol; ame xasiakirdiam kažno nadiéia te zrakhaspe.

²¹Paldavá so drieván ĥará na xané nisó, jone xasiakirdé zor, to Pávli terdijá maškirál lénde, i phendiá: “Tuménge treindiá te kandén man: te na tradas Kritostyr, tedy ame na piridživasas dasaví bída i xasibén.

²²Kakaná Me mangáva tumen, te na darén, pal-dová so ni jekh manúš tuméndyr na xasjola apríč párma.

²³Paldová so dre daja-pac' rat Devléskiro Jangólo javdiá ke me, Konéskiro me som i Konéske me dynarinava,

²⁴i phendiá: “Na andyrša, Pavlie! Tu javésa te terdjos pe séndo angíl khieningóste (kiesarjoste); i, ĥáda, Devél darinela džiibén sarénge, kon plyvinela (dela plima) túsa.”

²⁵Paldavá na darén, pal-dová so me patiáva Devléske, so saró javéla adiáke, syr Jov phendiá mánge.

²⁶Ame sam bangé te javas vyčhurdyne pe vari-savó óstrovo (džip).”

²⁷Ne kiéli jaciá dešuštarto rat, syr amen tradelas balvál pir Adriatikoskiro (Adriatičiesko) mórjo (derjáv), pašýl pašrat manušá lyné te ĥaljon, so syg jone džánas pašyledýr ke vari-saví phuv,

²⁸jone i lyné te sprobinen, ci xor sys paní, i vygijá, so panieskiro xoripén sys pašé štardešá ohtó mietry, tedy jone nádur zmierindle i lathné, so xoripén sys pašé trijánda mietry;

²⁹jone darándyne, sob (kaj) te na poperen pe baruné štéty, i mekné telé parmátyr štar jakori, i jone užakirenas, kiéli jačéla dyvés.

³⁰Kiéli matrosy skedynépe te našén parmátyr i jone mekné telé bárka pe paní, pefromi, so jone sýrby kaména te mekén telé parmakire nakhestyr jakorjo,

³¹ne Pávli phendiá tysjoncengire barydyréske i xaladenge: “Kóli adalé manušá na jačénape pe párma, tedy i tumé na moginéna te zrakhenpe.”

³²Tedy xaladé piričingirde šele, savé rikirde bárka, i joj pyjá dro paní.

³³Angíl sámo dyvés, Pávli lyjá te kharel sarén manušén te xan i phendiá: “Adadyvés dešuštarto dyvés, syr tumé užakiréna, tumé sarésa nisó na xána.

³⁴Paldavá me mangáva tumen te len te xan; davá trej tuménge vaš dová, sob (kaj) tumé te javén džidé; ni konéste tuméndyr ni jekh bal na xasjola tumaré šerestyr.”

³⁵Phení davá, Pávli lyjá maró, parikirdia pal léste Devléske angíl sarénde, rosphagirdiá i jaciá te xal.

³⁶Tedy saré manušá pirijačne te darén i lyné te xan.

³⁷Sarén amen sys pe párma dujšelá ohtodešá šov manušá.

³⁸Kiéli manušá xané čalés, jone lyné te kerén lokhedýr párma, vyčhurdyi giv dro mórjo (derjáv).

³⁹Ne kiéli jaciá dyvés, jone na ĥalyné phuv, a dykhné jekh prahitko brégo, savó sys začhudo paniésa, ke savó jone i skedynépe, kóli javéla saštý (možno), te tradén pašyledýr parmasa.

⁴⁰I jone ĥazdyné jakori, mekné telé len dro paní, dre dová-pac' časo jone rosphandle šole ruliendyr i, kiéli ĥazdyné upratuno balvaluno (paruso) pir balvál, jone tradyne ke brégo.

⁴¹Párma popyja pe prahitko štéto, jone čhudé les odój. Nakh zagijá pharés dro práho i párma terdijá, a korma phadjolas valnengire zorjátyr.

⁴²Haladé kedynepe te zamarén sarén štaribnaskiren, sob (kaj) nikón léndyr te na vyplyvinel (te na del plima peske krig) i te na našél.

⁴³Ne tysjoncengiro barydyró kamdiá te zrakhél Pavlís i na domekcia len te kerén davá i priphendiá odolénge, kon džinéla te plyvinel, te uhten dro paní i te vydžán pe phuv,

⁴⁴a kodolénge, so jačnépe, te vykedenpe ke párma, konéske pe phalia, a konéske pe dová, so jaciápe parmátyr, i adiáke vygijá, so saré zrakhnepe paniéstyr pe phuv.