Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 28 Bible Online

Apostolengiri Butý 28 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 28

¹I kiéli ame zrakhciampe i gijam pe brégo, tedy ame udžindiam, so davá štéto khardiape Mielita.

²A čúža štetytka manušá sykade aménge drieván bari pšalýtko patýv: jone kerdé bari jag i prilyné amen, pal-dová so sys šylalo i gijá baró bryšýnd.

³I kiéli Pávli skedyjá but xrústy (kusty) i čhudiá pe jag, tedy vyuhtia sap jagatyr i uhtyldiape pal léskiro vast.

⁴Kiéli adalé štetytka manušá dykhné, so pe Pavlískiro vast sys ublado sap, jone lyné te rakirén jekh jekhéske: “Čačó, kadavá manúš isyn rozmaribnari, paló davá, syr jov zrakhciape morjostyr (derjavestyr), Devléskiro séndo na déla léske te dživél.”

⁵Ne jov strinskirdia pestyr sapes dre jag, i jov na kerdiá léske nisavó fuipén.

⁶A jone užakirde, so jov javéla te šuljol ci syg peréla muló; ne adiáke, syr jone užakirde ĥará i dykhné, so nisavó fuipén na kerdiápe lésa, tedy jone pirijačne fujes te duminen pal léste, i lyné te rakirén, so jov sys Devél.

⁷Pašýl dová štéto sys felatiniá jekhe barydyreste, savó sys xuláj pir davá óstrovo (džip), konés khardé Publijo; jov prilyjá amen i ame dykhciam léskiro lačhó iló.

⁸Léskiro dad sys paštó dro čhuibén nasvaló, léste sys xačkiribén i dukhandyne vindyrja; a Pávli gijá ke jov, pomagdiape Devléske, čhudiá vastá pe léste i vysastiakirdiá les.

⁹Paló (poslie) dová, syr davá kerdiápe, saré nasvale dalé štetóstyr javénas i sys vysastiakirde:

¹⁰jone sykade bari patýv aménge, i kiéli ame skedyjampe te tradas durydyr, jone dyné aménge pésa dro drom saró, so aménge treindiá.

¹¹I pir trin čhoná ame tradyjam pe Alieksandrijakiri párma, saví sys terdy odój ivante (zimakiro) i saví khardé Diaskury.

¹²Ame javdiám dre Sirakuzy, i jaciampe odój trin dyvesá.

¹³Odothýr ame plyvindiam (dyjám plíma) trusciál i dre Rigija, i pal-dová so, syr pir dyvés ĥazdyjápe paš-dyvesýtko balvál, ame pe javír dyvés zatradyjam dre Putieoly,

¹⁴kaj ame lathiam pšalén, i jone mangné amen te javas pašýl lénde eftá dyvesá. Tén'ci ame gijam dro Rimo.

¹⁵I kiéli pšála dro Rimo šundlé pal aménde, jone giné amen te streninen ke Apijoskiro Forumo i ke Trin Kirčymy, a kiéli Pávli dykhciá len, jov parikirdia Devléske i jaciá murškanedyr.

¹⁶Kiéli ame javdiám dro Rimo, tedy tysjoncengiro barydyró dyjá vólia Pavliske te dživél péske khetané bahtaledyr péskire xaladesa-rakhibnarisa.

¹⁷Pir trin dyvesá Pávli khardiá khetané patyvalé Judén, i, kiéli jone skedynépe, jov phendiá lénge: “Manušále-Pšalále! Me sómas zakedyno dro Jerusalimo i otdynó dre Rimlianengire vastá, xoc' me nisavó čoripén na kerdjom proti amaré manušénde ci amaré dadengíre sykliaibena;

¹⁸savé dophučne mándyr i kamlé te otmeken, pal-dová so jone na lathné pal mánde nisaví bang, sob (kaj) me te javav mol meribnáske.

¹⁹Ne paldová, syr Judy rakirdé pe mánde, mánge butýr ničý na jačelaspe, syr te mangav séndo, i me kerdjom davá na vaš dová, sob (kaj) te bangiakirav miré manušén.

²⁰Paldavá me i khardjom tumen, sob (kaj) te dykháv i te rakiráv tuménca; pal-dová so pal Izrailjoskiri nadiéia kadalé zandirjá (cépi) isyn pe mánde adadyvés.”

²¹I jone phendlé léske: “Ame nisave lylá na doresciam pal túte Judejátyr, i nikón pšaléndyr, savé javénas ke ame, na rakirdiá nisavó čoripén pal túte.

²²Ne ame kamasa kokoré tútyr te šunas, syr tu duminesa, pal-dová so ame šundiám pal dová sykliaiben, pal savó maškír butende manušender džána čingardá.”

²³Jone dorakirdepe Pavlisa pal dyvés, i drieván but manušá javné ke jov kheré; jov zlokostyr ke/žýko bel'vél' rakirdiá lénge pal Devléskiro Kralipén, i dophenelas lénge pal Isusóste Mojzáskire Zakonóstyr, i prorokéngire čhinybnastyr.

²⁴Pávli upatiakirdia vari-savén manušén dro dová, so isyn phendló, a javír na patiandyné.

²⁵Jone na sys dre jekh godý maškír péste, i lyné te džán péske korigedýr doléstyr, syr Pávli phendiá lénge jekh lav: “Čačipén phendiá Svénto Dúho (Fáno) tumaré dadénge pir prorokoste Isajoste, rakirí:

²⁶“I džá ke adalé manušá i phen: ‘Tumé javéna kanenca te šunén i na ĥaljona, i tumé javéna te dykhén i nisó na dykhéna.

²⁷Pal-dová so kadalé manušéngiro iló jaciá pharó te ĥaljol, i jone nábut šunéna kanenca, i jone začhakirde jakhá péskire, sob (kaj) te na dykhén jakhénca i te na šunén kanenca, i jone na ĥaljona ilésa i na javéna ke Me, sob (kaj) Me te vysastiakirav len’.

²⁸Paldavá me kamám, sob (kaj) tumé te džinén, so Devléskiro zrakhibén sys bičhadó Najudénge; jone i ušunena.”

²⁹Kiéli Pávli phendiá dalé lavá, Judy lyné te džán péske, i jone drieván košnepe jekh jekhésa.

³⁰Pávli dživdiá ke Rimo duj berš dro kher, savó jov zlyjá, prilelas sarén, kon javélas ke jov,

³¹i jov murškanés i psirés (otkerdés) phenelas lav pal Devléskiro Kralipén i sykliakirdiá manušén, rakirí lénge pal Raste-Devléste, Isusóste Xristosóste.