Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 4 Bible Online

Apostolengiri Butý 4 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 4

¹Kiéli Pétri i Iáno rakirdé manušénge, ke jone podginé rašaja i rakhibnar'jengire barydyrá pir Khangirí i Sadukiei,

²lénge sys pharó pe iló, so Apóstoly sykliakirenas manušén, i phenenas lav pal otdžidiakiriben meribnástyr, syr sys Isusósa;

³i jone zakedyne Petris i Ianos, i pal-dová so davá sys bel'velié, jone čhudé len dro štaribén ke javír dyvés.

⁴But manušá, savé šundlé léngiro phenybén, upatiándyne; i manušén, savé lyné te patián, jaciá butýr, syr pandž tysjoncy.

⁵I pe javír dyvés skedynépe dro Jerusalimo léngire barydyrá, godephuré i lylvarítka (knížniki),

⁶odój sys pérvo rašángiro barydyró Anna, i Kaiáfa, i Iáno, i Lieksandro (Alieksandro) i javír pervoné-rašaskiri semencatyr;

⁷jone jandlé Petris Ianosa, čhudé len maškirál, i lyné te dophučen léndyr: “Save zorjása ci savé lavésa tumé keréna saró davá?”

⁸Tedy Pétri, savó sys pherdó Sventoné Duhósa, phendiá lénge: “Barydyrale theméskire i Izrailjoskire godephuré!

⁹Kóli tumé phučena améndyr pal lačhó réndo vaš nasvaleske, syr jov sys vysastiakirdo,

¹⁰mek te javél džindló tuménge sarénge i saré Izrailjoskire manušénge, so Isusóskire-Xristosóskire lavésa, Savó sys Nazariejo, i Saves tumé primarde pe trušúl, Saves Devél otdžidiakirdiá meribnástyr, ĥáda, adavá manúš isyn terdó sastó angíl tuménde.

¹¹Isúso isyn sýrby ‘dová Bar, savó na prilyné butitka pe kher, savó jaciá vengloskire šeralé Baresa.’

¹²I nane butýr ni dre konéste javiréste zrakhibén, nane tel bolybén javír lav, savó dynó manušénge, savésa ame moginasas te zrakhaspe.”

¹³Judéngire-Siniedrionoskire šeralé divindlépe pe Petriskiro Ianosa muršypen, i ĥalyné, so Pétri i Iáno sys nasykle manušá, savé nikaj na syklyne, i jone ĥalyné, so jone sys khetané Isusósa.

¹⁴I dykhí, so vysastiakirdo manúš sys terdó khetané lénca, jone nisó na mogindlé te phenén proti lénde;

¹⁵ne jone priphendle Apostolenge te džán javrí Siniedrionostyr, a kokoré lyné te obrakiren maškír péste,

¹⁶i rakirdé: “So aménge te kerás adalé manušénca? Pal-dová so saré manušá džinéna, so jone kerdé dívo, i ame na moginasa davá te na priĥaljovas.

¹⁷Ne sob (kaj) butedýr te na rozdžalpe maškír javirende manušénde pal davá, trašavasa len, sob (kaj) jone te na rakirén nikonesa manušéndyr pal Isusóskiro lav.”

¹⁸Jone nevéstyr khardé Apostolen i šylales priphendle lénge, sob (kaj) jone sarésa te na rakirén i te na sykliakirén pal Isusóskiro lav.

¹⁹Ne Pétri i Iáno otphendlé lénge: “Ne den godý peské (poduminen) kokoré, ci čačunés davá javéla angíl Devléste, te kandes tumen butedýr Devléstyr?

²⁰Aménge naštý te na rakiras pal dová, so ame kokoré dykhciam i šundiám.”

²¹Siniedrionoskire šeralé šylales priphendle Apostolenge, i otmekne len; jone na džindlé, saví kára te čhuvén pe Apostolende, pal-dová so saré manušá slavindle Devlés pal kaliekaskiro vysastiakiriben;

²²pal-dová so butýr, syr štardešá berš sys odolé manušéske, pe savéste kerdiápe davá divno vysastiakiriben.

²³Kiéli otmekne Petris i Ianos, jone javné ke péskire manušá i rosphendlé lénge pal saró, so lénge rakirdé rašángire barydyrá i godephuré.

²⁴I kiéli jone vyšundle pal saró davá, tedy lyné te mangénpe zoralé zaniása saré khetané Devléske i phendlé: “Rajo Dévla! Tu san Xuláj pe sarénde, Tu, Savó sozdyjan bolybén i phuv i paniá i saró, so isyn dre lénde:

²⁵Tu, Savó rakirdian Duhósa Sventonesa pir Tyré pishariste i amaré dadéste Davidóste: ‘Sóske Náiudy dynepe šumosa te xoliason i manušá zadumindle nalačhipen?

²⁶Phuvitka králja ĥazdynépe i thagárja (kniázi) skedynépe khetané pe Devléste i pe Léskire Xristosóste.’

²⁷Irodo i Pontijo Piláto Najudenca i Izrailjoskire manušénca skedynépe khetané dro davá fóro, sob (kaj) te kerén zrakiribén proti Sventoné Čhavéste Isusóste.

²⁸Sob (kaj) te spolninel dová, te javél pir Tyró vast i vólia.

²⁹I kakaná, Rajo Dévla, Tu dykhésa, so jone amen strahakirena i de aménge, pishar'jénge, muršypen te na daras te phenas Tyró lav;

³⁰sob (kaj) Tu te protyrdes Tyró vast te sastiakiren, vaš ĥiertyká i dívy Isusóskire lavésa, Sventoné Čhavésa.”

³¹I kiéli jone pirijačne te mangénpe Devléske, tedy dová štéto, kaj jone skedynépe, zatrinskirdiape, i gijá pe sarénde lénde Sventoné-Duhoskiri zor i jone phendlé Devléskiro lav muršypnasa.

³²Patiaibnaskire manušá sys khetané ilésa i godiása; i nikón nisó péskire mištypnástyr na gindia pal péskiro, a saró, so lénde sys, sys pe sarénde;

³³a Apóstoly baré zorjása dophenenas pal Devléskiro, Isusóskire-Xristosóskiro otdžidiakiriben muléndyr; i baró bahtiakiribén Devléstyr sys pe lénde sarénde.

³⁴Na sys nikonés maškír lénde; sob (kaj) léske treindiá vari-so, pal-dová so saré, konéste sys pes-kiri phuv ci kherá, biknenas len i janénas saré lové,

³⁵i čhuvénas len ke Apostolengire ĥerá; i dénas lové kažnonéske, dykhí ci but léske trej.

³⁶I, ĥáda, Joza (Iosifo), savés Apóstoly prokharde “Varnava”, so značynéla: ‘Tangipnariskiro čhavó’, Lievito, savó bijándyja pe Kipro,

³⁷i savéste sys péskiri phuv, bikindia la, jandiá lové i čhudiá ke Apostolengire ĥerá.