Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 6 Bible Online

Apostolengiri Butý 6 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 6

¹Ne dre dolé dyvesá, kiéli sykliaibnýtka jačné butýr, vygijá Jelinistendyr xoliamó rakiribén pe Judénde, so jone bistrena pal léngire pivliende (udovende), kiéli rozdena kažnoné-dyvesýtko xabén.

²Tedy dešudúj Apóstoly kedyne khetané sarén sykliaibnytkonén i phendlé: “Namišto aménge te jačkiras Devléskiro lav, a te zalaspe skamindesa.

³Paldavá, pšalále, vykeden tuméndyr eftá džindlé manušén, savé te javén pherdé Sventoné Duhósa i godiása, sob (kaj) lénge i te dykhén pal daja butý;

⁴ame kokoré javása butýr časo te otdas mangipnaske Devléske i te rosphenas Léskiro lav.”

⁵Dasavo rakiribén sys sarénge pir iló; i jone vykedyné Stiehvanos (Stiefanos), manušés, savó sys pherdó Sventoné Duhósa i patiaibnása i Filipos, i Prohoros, i Nikanoros, i Timonos, i Parmienos, i Mikalajos (Nikolajos), nevoné-patiaibnaskires, Najudos Antiohiiatyr,

⁶i savén čhudé angíl Apostolende, i kiéli jone mangnepe Devléske, tedy jone čhudé vastá upré pe lénde.

⁷I Devléskiro lav rozdžalaspe butýr, i sykliaibnýtka dro Jerusalimo jačné drieván but, adiáke-pac' i but rašaja upatiándyne.

⁸Stiehvano (Stiefano), savéste sys pherdó bahtiakiribén Devléstyr i zor, kerdiá baré dívy i znamiénii (ĥiertyká) maškír manušénde.

⁹Ne vari-savé manušá Libiertiicynengire sinagogatyr, i Kirinieicynengirjatyr i Alieksandriicynengirjatyr, i odolé, savé sys Kilikijatyr i Asijatyr, lyné te dophenen Stiehvanoske.

¹⁰Adalé manušá sys bizorjákire angíl Duhoskiri zor i godý, savjása rakirdiá Stiehvano.

¹¹Tedy jone podrakirde manušén te phenén: “Ame šundiám, syr jov rakirdiá nalačhé lavá pe Mojzaste i pe Devléste.”

¹²Lénge udyjape xohaibnasa te podrakiren manušén i godephuren i lylvaritkonen. Odolé pyné i uhtyldé Stiehvanos, i lydžiné les angíl Siniedriono.

¹³I jone jandlé xohané jakhitkonen, savé dophenenas: “Adavá manúš usá rakiréla proti Svénto Khangirí i Zakóno;

¹⁴ame, xaj, šundiám, syr jov rakirdiá, so Isúso Nazarietostyr rosphagirela Khangirí i paruvela prisykliaiben, savó aménge dyjá Mójza.”

¹⁵Saré, kon sys beštó dre Siniedriono, rakhunes dykhné pe Stiehvanoste, i dykhné, so muj léskiro ziainela sýrby muj Jangoloste.