Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 7 Bible Online

Apostolengiri Butý 7 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 7

¹Tedy pérvo rašángiro barydyró phuciá Stiehvanostyr: “Ci saró davá isyn čačipén, dre so jone tut bangiakirena?”

²I jov otphendiá: “Pšalále miré, dadole! Vyšunen man. Slavútno Devél sykadyjá amaré dadéske Avraamóske dre Miesopatamija angíl léskiro piritradypen dro Xarano,

³i phendiá léske: ‘Mek péskiri phuv i péskiro ródo, i džá dre doiá rig, saví Me túke sykaváva’.

⁴Tedy Avraámo mekciá Xaldiejengiri phuv i piritradyja dro Xarano; korigedýr, syr léskiro dad myjá, Devél pirikhardia les pe daja phuv, pe saví tumé kakaná dživéna.

⁵Jov na dyjá léske meknó mištypén ni pe jekh piró (stopa) gerjakiro baripnasa, ne Jov dyjá lav léske te del daja phuv syr léskiri i so léskire-čhavéngire rodóske čhavé javéna xulaja pe adáia phuv, kiéli dro dová časo Avraamoste sarésa na sys čhavorén.

⁶I ĥáda, Devél phendiá léske: ‘So léskire-čhavéngiro ródo javéla čúžo pe kodoia phuv i léndyr skerena pishar'jén i javéna te pritasaven štaršelá berš;

⁷ne Me, — phendiá Devél, — javáva te sendiakirav pharés odolé — nacyjakire manušén, vaš konéske jone javéna pishárja; i pale davá jone vydžána dolé phuvjátyr i javéna te dynarinén Mánge pe davá štéto.

⁸I Devél kerdiá Zavieto Avraamosa te občhinenpe; i adiáke Avraámo jaciá dadésa Isaakóske i jov občhindia les pe eftáto dyvés; a Isaáko jaciá dadésa Jakovóske, i Jakovo jaciá dadésa dešudujenge patriarhenge.

⁹I patriarhi pir zevlynypén bikindle Jozas syr pisharís dro Jegípto; ne Devél sys lésa,

¹⁰i pomoginelas léske dre saré léskire pharipena, i dyjá léske godý i Faraonóskire-Jegiptóskire kralískiri patýv, savó i čhudiá les balunitkonesa pe Jegípto i pe saró léskiro kher.

¹¹Ne bokh pyjá pe sarí Jegiptóskiri i Xanaanóskiri phuv, i sys bari bída; i amaré dadá na lathenas péske xabén.

¹²Ne kiéli Jakovo šundiá pal dová, so dre Jegípto isyn maró, jov bičhadiá odorík jekh mólo amaré daden;

¹³a kiéli jone javné javír mólo, Joza (Iosifo) priĥalyjape péskire pšalénge, i Faraóno udžindiá, savé rodóstyr sys Joza.

¹⁴Paló davá Joza bičhadiá pal peskireste dadéste Jakovoste i pal sarí péskiri semencate, a sys len eftadešá pandždžine.

¹⁵Jakovo javdiá dre Jegípto, kaj jov myjá kokoró i adiáke-pac' amaré dadá;

¹⁶i pirilydžine léngire trúpy dro Sihiemo i čhudé dre koplíca, saví kindia Avraámo dro Sihiemo Jemorengire čhavéndyr pal rup.

¹⁷Kiéli lyjá te poddžál davá časo te kerélpe phendló lav, pal savó dyjá lav Devél Avraamóske, i Judy barjonas dro Jegípto i jačné butydyr,

¹⁸paka javír králi javdiá, savó na džindiá Jozas.

¹⁹Jov xohaibnasa otlydžalaspe ke amaré manušá i jov na délas džiibén amaré dadénge; jov začhuvelas len te vyčhurden peskiren tykné bijatén, sob (kaj) odolé te na dživén.

²⁰Dro dasavo časo bijándyja o Mójza (Moisiejo), savéste sys šukaripén Devléstyr, trin čhoná les barjakirdé dre léskire-dadéskiro kher.

²¹Ne kiéli les tyknin'kones čhurdyné javrí, Faraonoskiri čhaj i lyjá les ke pe i barjakirdia les, syr péskires čhavés.

²²I Mójza sys sykliakirdo dro saró Jegiptóskiro god'varipen, i jov sys zoraló dre lavá i pir réndy.

²³I kiéli léske jaciá štardešá berš, jov zakamdiá te dykhén péskire pšalén, Izrailjoskire čhavén;

²⁴i, dykhí, syr jekhéske léndyr kerdé fuipén, jov zaterdija pal léste i othaja pale (otomstindia) pal léste, so pekadiá Jegiptianinos i zamardiá les.

²⁵Jov dumindia, so léskire pšála ĥaljona, so Devél léskire vastésa déla lénge zrakhibén; ne jone na ĥalyné.

²⁶Kiéli pe javír dyvés jov dykhciá, syr duj Izrail'tiáni čingardepe maškír péste, jov kamdiá te ramaniakirél (zmirinel) len, phení lénge: “Tumé san pšála, palsó tumé keréna fuipén jekh jekhéske?

²⁷Ne jekh léndyr špuldia (pihnindia) Mojzás dre rig i phendiá: “Kon čhudiá tut sendarisa i rása pe aménde?”

²⁸Ci na kamésa tu te zamares i man adiáke-pac', syr tu zamardian atasiá Jegiptianinos?”

²⁹Kiéli Mójza šundiá davá otphenybén, jov nascia ke Midija, i jaciá odój te dživél syr čúžo manúš, kaj bijándyne léste duj čhavé.

³⁰Kiéli progijá (nakhciá) štardešá berš, Mojzáske sykadyjá Devléskiro Jangólo xrustostyr, savó xačija jagása pe čhučí phuv, nádur bergátyr, saví khardé “Sinajo.”

³¹Mójza sys drieván divindlo, kiéli jov dykhciá davá, Jov podgíia pašyledýr te rozdykhel, i šundiá Ráskire-Devléskiri zan:

³²“Me som Devél tyré dadéngiro, Devél Avraamóskiro, Isaakoskiro i Jakovóskiro.” Mójza izdrandyja darátyr i léste na sys muršypen te ĥazdel jakhá.

³³I Raj Devél phendiá léske: “Suri ĥerá, pal-dová so štéto, pe savó tu san terdó, isyn svénto phuv.

³⁴Me dykhcjom dro Jegípto, syr pritasade Miré manušén i Me šundjom, syr jone pharés déna ĥondiá i Me javdjom te mekav pe vólia len: džá, kakaná, Me bičhaváva tut pale dro Jegípto.”

³⁵Adalé samone Mojzás, savés jone na prilyné i phendlé léske: “Kon čhudiá tut sendarisa i rása?” Kokoró Devél bičhadiá les, sob (kaj) jov te jačél sendarisa i vyrakhibnarisa Jangoloskire vastésa, savó sykadyjá léske dro xrústo.

³⁶Adavá Mójza vylydžijá manušén Jegiptóstyr, jov kerdiá dívy i ĥiertyká dro Jegípto pašýl Loló mórjo (derjáv), i štardešá berš pe čhučí phuv.

³⁷Ĥáda, odová-pac' Mójza, savó phendiá Izrailjoskire čhavénge: “Devél tumaró bičhavéla tuménge Prorokós, tumaré pšaléndyr, syr Jov bičhadiá man; kandén Les.”

³⁸Ake, jov rosphenelas manušénge, savé sys kedyne pe čhučí phuv pal dová, so Jangólo léske rakirdiá pe bérga Sinajo, i jov sys amaré dadénca; jov isyn odová-pac', savó lyjá džidé lavá, sob (kaj) te piridel len tuménge;

³⁹Saves amaré dadá na zakamle te kandén, i na prilyné les, a risiné péskire ilenca ke Jegípto,

⁴⁰i phendlé Aronoske: “Ker aménge devlen, savé lydžánas amen, pal-dová so Mójza, savó vylydžijá amen Jegiptóskire phuvjátyr, ame na džinása, so lésa kerdiápe.”

⁴¹I kerdé jone guruvóres dre dolé dyvesá, jone jandlé svénta dyibená idoloske, i radyndlepe pašýl péskire-vastengire butiá.

⁴²I Devél otrisija léndyr i jačkirdiá len te mangénpe bolybnáskire čergenienge, syr pal davá isyn čhindló dre prorokengiri lylvarí: “Manušále Izrailjoskire! Ci janénas tumé mánge čhindlé murdalén i svénta dyibená pal dalé štardešá berš pe čhučí phuv.

⁴³Tumé lydžánas pésa tumaré — devleskiri Molohoskiri šátra, Riemfanoskiri čergen i ídoly, savén tumé kerdé, sob (kaj) te mangénpe lénge; i Me bičhaváva tumen duredýr Vavilonóstyr.”

⁴⁴Daja šátra sys tumaré dadende pe čhučí phuv sýrby dorakiribén, so phendiá Devél Mojzáske, te čhuvél dasaví šátra, saví jov dykhciá;

⁴⁵saví amaré dadá khetané Isusósa (Johošuasa) lyné Pésa šátra dre daja rig, saví jone zauhtylde i savjátyr Devél vytradyjá amaré dadengíre jakhéndyr manušén, savé dživdé odój ke Davidóskire dyvesá;

⁴⁶adavá Davído jaciá drógo Devléske i jov mangdiá Léstyr te kerél šátra Jakovóskire Devléske;

⁴⁷ne Solomóno čhudiá Léske Kher.

⁴⁸Ne Sámo Vučedýr Devél na dživéla dre kherá, savé kerdé manušýtka vastá, adiáke, syr rakiréla pal davá proróko:

⁴⁹“Bolybén isyn Miro trono, i phuv isyn tel Miré ĥerá: savó kher tumé moginéna Mánge te kerén? — rakiréla Devél, — ci kaj moginéla te javél štéto Mánge vaš otkhinyben?

⁵⁰Ci na Miré vastésa kerdó davá saró?”

⁵¹Tumé san pharé-ilytka manušá, savé šunéna Devléskiro lav, a sýrby kašuke usajékh keréna pir péskiro! Tumé san adasavé-pac', syr i tumaré dadá, tumé ŭsády (sak) (usiegda) sánas proti Svénto Dúho (Fáno).

⁵²Konés prorokendyr na tradyne tumaré dadá? Jone zamardé (umarde) odolén, kon angíl rakirdiá pal Xristosóskiro javiben, ne tumé kakaná jačné Léskire zdyibnarja i zamaribnarja!

⁵³Tumé, savé doresné (lyné) jangolendyr Zakóno, i savé na zrakhné les.”

⁵⁴Kiéli jone šundlé davá, léngire ile pharadyne xoliátyr i jone skriežyndle dandenca pe léste.

⁵⁵Ne Stiehvano, savó sys pherdó Sventoné Duhósa, dykhcia upré pe bolybén i dykhciá Devléskiri sláva i Isusós, savó sys terdó pir čačí rig Devléstyr,

⁵⁶I phendiá jov: “Dykhén! Me dykháva otčhakirdo bolybén i Manušéskire Čhavés, Savó sys terdó pir čačí rig Devléstyr.”

⁵⁷Ne jone zadyne gódla i zakerde péskire kaná, i saré khetané čhurdynepe pe léste;

⁵⁸i jone tyrdyne les pal fóro i domardé les barénca. A jakhítka čhudé péskire ídi pašýl terné-manušéskire ĥerá, savés khardé Savlo.

⁵⁹Jone iščo (inké) mardé Stiehvanos barénca, a Stiehvano mangdiápe Devléske i rakirdiá: “Rajo Dévla, Isúsie! Prilé miro dúho (fáno).”

⁶⁰I jov pyjá pe čangá i zoralé zaniása phendiá: “Rajo Dévla! Na gin davá grého pal lénde.” I dalé lavénca Stiehvano myjá.