Read Biblija - Pe Baltitko Romani čib (Romanes) 2019 Baltic Romani Bible Apostolengiri Butý 9 Bible Online

Apostolengiri Butý 9 - Biblija - Pe Baltitko Romani čib (Romanes) 2019 Baltic Romani Bible bible

Apostolengiri Butý 9

¹Ne Pávli usá butedýr strahakirdia i kamdiá te muliakirél Isusóskire sykliaibnytkonén i javdiá ke pérvo rašángiro barydyró.

²I vymangdia léstyr lylá vaš Damaskoskire sinagogi, so kóli jov lathéla odój manušén, savé sykliakiréna Isusóskiro lav, muršén ci džuvlién, jov mogindiá len te zakedel i te janel dro Jerusalimo.

³Kiéli jov sys pir drom i džálas ke Damásko, pe léste jekhátyr (srázu) zasvencyndia baró dud (svéto) bolybnástyr,

⁴i, syr jov pyjá pe phuv, šundiá zan, saví rakirdiá léske: “Sávlie, Sávlie! Sóske tu Man tradesa?”

⁵Jov phuciá: “Kon Tu san, Rajo Dévla?” “Me som Isúso, Saves tu tradesa”, — otphendiá zan,

⁶“Uštý i džá dro fóro, i javéla phendló túke, so trej te kerés.”

⁷A manušá, savé sys khetané lésa, na mogindlé nisó te ĥaljon; jone šundlé zan, ne nikonés na dykhné.

⁸Savlo uštyjá phuvjátyr i, kiéli léskire jakhá otčhakirdepe, jov nisó sarésa na dykhciá; i lydžiné les pal vast dro Damásko.

⁹I jov sys odój trin dyvesá na dykhí; i nisó na xaja, i na pija

¹⁰Sys jekh sykliaibnýtko dro Damásko, savés khardé Ananija. Devél dro dykhibén phendiá léske: “Ananije! Jov otphendiá: “Ĥáda, me som Rajo Dévla.”

¹¹I Raj Devél phendiá léske: “Uštý i džá pe vulíca (gása), saví kharéna “Mamuítko (Priámo)” i zadžá dro Judáskiro kher, phuč Tarsianinostyr, savés kharéna “Savlo”; jov kakaná mangelape Devléske,

¹²i jov dykhciá dro dykhibén manušés, savés khardé “Ananija”, savó sýrby javdiá ke jov i čhudiá péskire vastá pe léskire jakhá, sob (kaj) jov te dykhél.

¹³I Ananija otphendiá: “Rajo Dévla! Me butendyr manušéndyr šundjom pal léste, syr but fuipén jov kerdiá sventonenge dro Jerusalimo;

¹⁴i adarík jov javdiá pravosa pervoné-rašángire barydyrestyr te zakedel sarén, kon javéla te rakirél pal Tyró lav.

¹⁵I Raj Devél phendiá léske: “Džá, pal-dová so Me vykedyjom les, sob (kaj) jov te lydžál Miro lav angíl manušénde Najudénde, i Izrailjoskire kral'jénde čhavénde:

¹⁶pal-dová so Me sykaváva léske, ci but jov javéla te menčynelpe pal Miro lav.”

¹⁷I gijá Ananija i zagijá dro dová kher, i čhudiá vastá pe léste, phení: “Pšála, Sávlie! Raj Devél Isúso bičhadiá man, Savó sykadyjá túke pe drom, Savésa tu gíian adarík, sob (kaj) tu nevéstyr te les te dykhés i te javes pherdó Sventoné Duhósa.”

¹⁸Dre dová-pac' časo, sýrby šulupa pyjá telé léskire jakhéndyr, i jov jaciá te dykhél: i, syr jov uštyjá, boldiape;

¹⁹i korigedýr (pozžedýr), syr léske dyné xabén, ke jov risijá zor. I Pávli jaciápe vari-kicý dyvesá dro Damásko.

²⁰I jov jekhátyr lyjá te phenél lav pal Isusóste dre sinagogi, so Jov isyn Devléskiro Čhavó.

²¹I saré, kon šundiá les, divindlépe i rakirdé: “Ci davá isyn na odová-pac' manúš, savó xasiakirelas dro Jerusalimo odolé manušén, kon mangdiápe Isusóske, i adarík jov javdiá vaš dová, sob (kaj) te zakedel len i te janel len sphandlenca ke rašángire barydyrá?”

²²Ne Savlo usá butydyr barija dre zor, i Judy, savé dživdé ke Damásko, na mogindlé nisó proti léste te phenén, kiéli jov dophenelas, so davá isyn Xristóso.

²³Kiéli proginé (nakhle) but dyvesá, Judy zrakirdepe te zamarén les.

²⁴Ne Savlo uĥalyja pal léngiro zrakiribén. Jone rat i dyvés dykhné rakhibnýtkes les pašýl pórta, sob (kaj) te zamarén les;

²⁵ne léskire sykliaibnýtka ratiákiro mekné telé les dro khudo (korzina) pir vánta.

²⁶I kiéli Savlo javdiá dro Jerusalimo, jov kamdiá te javél khetané Isusóskire sykliaibnytkonénca; ne jone darándyne léstyr, i na patiandyné, so jov isyn sykliaibnýtko.

²⁷Ne Varnava lyjá les i jandiá ke Apóstoly i rosphendiá lénge, syr Savlo pir drom dykhciá Ras-Devlés, i so Raj Devél rakirdiá léske, i syr Savlo phendiá murškanés Isusóskiro lav dro Damásko.

²⁸I sys Savlo khetané lénca i psirdiá pir Jerusalimo i murškanés rosphenelas Ráskire-Devléskiro lav.

²⁹I jov rakirdiá i dophenelas lénge; a jone dyné godý peské te zamarén les.

³⁰Kiéli pšála udžindlé pal davá, jone lyné Savlos i otlydžine dre Kiesarija i odothýr otbičhade les dro Tarso.

³¹I sys ramánjo (miro) dre khangirja pir sarí Judéia, Galiliéia i Samárija, jone podrikirenas pes dro patiaibén i darándyne Devléstyr pir Sventoné Duhoskiro tangipén i podrikiribén.

³²Sys adiáke; kiéli Pétri obdžalas sarén, zagijá jov i ke svénta, savé dživdé ke Lida.

³³I jov lathiá odój jekhe manušés, savés kharéna Eneja, savó ohtó berš sys paštó pe čhuibén; sys léste praličo.

³⁴Pétri phendiá léske: “Eniejo! Isúso Xristóso sastiakirela tut: uštý i ker péskiro čhuibén” I jov davá-pac' momiento uštyjá.

³⁵I saré manušá, savé dživdé ke Lida i ke Sarono, kiéli jone dykhné, so jov sys sastó, to i prilyné jone Ras-Devlés

³⁶Dre Iopija (Jopija) sys jekh sykliaibnýtko džuvlý, savjá khardé “Tavifa”, so značynéla: “Sierna.” Joj usady (sak) kerélas lačhipén i pomoginelas (délas vast) čororé manušénge.

³⁷I dro dolé dyvesá joj zanasvalyja i myjá; kiéli la obmorde, čhudé dre upratuny štúba.

³⁸Ne syr Lida sys nádur Iopijatyr, i, kiéli sykliaibnýtka šundlé pal dová, so Pétri isyn dre Lida, jone bičhadiá ke jov duje manušén te mangén les, sob (kaj) jov sygedýr te javél ke jone.

³⁹Pétri uštyjá i gijá lénca. Kiéli jone javné, les lydžiné dre upratuny štúba; saré pivlia (udovy) kedynepe pašýl léste, jone rondlé i sykavenas léske gada i javír ídia, saví “Sierna” sudia lénge, syr joj dživdiá lénca.

⁴⁰A Pétri tradyjá javrí sarén štubatyr, terdijá pe čangá i lyjá te mangélpe Devléske; tedy jov porisija ke muly i phendiá: “Tavifije, uštý!” I joj otčhakirdiá jakhá, dykhciá Petris i besciá.

⁴¹Jov dyjá péskiro vast láke i pomogindia te terdjol pe ĥerá i khardiá sventonen i pivlien (udoven), i čhudiá la džidiasa angíl lénde.

⁴²Davá kerdiápe džindló pir sarí Iopija (Jopija), i but manušá patiandyné dre Raste-Devléste.

⁴³I sys adiáke: Pétri but dyvesá sys dre Iopija ke Símono, savó vykerelas cýpi.