Read Biblija - Pe Baltitko Romani čib (Romanes) 2019 Baltic Romani Bible Rimlianenge 1 Bible Online

Rimlianenge 1 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 1

¹Pávli, Isusóskiro Xristosóskiro pishári (rabo), savés Devél khardiá ke Pe te javél Apostolosa i vykedyjá te rosphenel Devléskiri bahtalý zan (zvies'),

²pal savéste Devél angledýr dyjá lav pir Péskire prorokénde dre Svénta Čhinybena,

³pal Péskire Čhavéste, Savó pir Péskiro manušýtko bijanypén jaciá Davidóskire rodóstyr,

⁴otdžidyjá muléndyr, amaró Raj Devél Isúso Xristóso, Savó sys svénto bijanypnastyr i dophendia baré zorjása, so Jov isyn Devléskiro Čhavó;

⁵pir Léste ame doresciam (dolyjam) Devléskiro bahtalypén te javas Apostolénca, sob (kaj) dre Léskiro lav te sykliakiras patiaibnáske i kandypnáske saré nácyi,

⁶maškír savénde i tumé san, konés khardiá Isúso Xristóso:

⁷sarénge, kon dživéla ke Rimo, savé jačné dróga Devléske i savé isyn khardé te javén Léskire sventonenca: bahtalypén i ramánjo (miro) tuménge Devléstyr Dadéstyr amarestyr, i Rástyr-Devléstyr, Isusóstyr Xristosostyr.

⁸Anglydyr saréstyr me parikirava Devléske Miréske pir Isusóste Xristosóste pal sarénde tuménde, pal-dová so patiaibén tumaró isyn džindló saré svetoske.

⁹Pal-dová so Devél isyn jakhítko (svidietieljo) mánge, Savéske me dynarináva (služynáva) miré duhósa i rosphenava bahtalý zvies' pal Léskire Čhavéste, so me saró časo dre péskiro mangipén Devléske ripirava pal tuménde,

¹⁰me ŭsády (sak) mangavape, sob (kaj) te javél Devléskiri vólia, vari-kiéli te javav ke tumé.

¹¹Pal-dová so me drieván kamám te dykháv tumen, i te podrikirav tumen Duhósa i rozdielinav tuménca duhovno taláno: javén zoraledýr dre patiaibén;

¹²sob (kaj) fedýr saréstyr ame te pomoginas i te podrikiras jekh jekhés dro amaró patiaibén.

¹³Ne me kamám, miré pšála, sob (kaj) tumé te džinén, so me but móly skedavaspe te javav ke tumé, ne vari-so man na domekelas, sob (kaj) mánge te dykháv mištypén miré butiátyr i maškír tuménde, adiáke-pac' syr i maškír javír nácyi.

¹⁴Me som bangó syr Elinenge (Griekénge), adiáke-pac' i nasykle manušénge, savé na šundlé, adiáke-pac' god'varenge i bigodiakirenge:

¹⁵adiáke-pac' i me užakirava, kóli saštý, sob (kaj) te rosphenav bahtalý zan (zvies') i tuménge, kon dživéla ke Rimo.

¹⁶Me na ladžava te rosphenav bahtalý zan (zvies'), pal-dová so joj isyn Devléskiri zor vaš zrakhibén kažnonéske devlytkoneske: angledýr Judénge, ne korigedýr (tén'či) Elinénge (Griekénge/Balaménge):

¹⁷pal-dová so dre Jevángielija otčhakirelape Devléskiro čačipén patiaibnastyr dro patiaibén: syr pal davá isyn čhindló: “Manúš čačuné patiaibnása javéla te dživél.”

¹⁸Pal-dová so bolybnástyr zdžála Devléskiri xolý pe kažno bidevlytkima i pe manušéngiro xohaibén, savé péskire načačipnasa xasiakirena čačipén.

¹⁹Saró, so saštý džindló te džinén pal Devléste, jone džinéna, pal-dová so Devél sykadiá davá lénge.

²⁰Pal-dová, syr Devél sozdyjá svéto, Léskiri viekoskiri zor i Devlytkima biciale dre Léskire réndy (diély), kiéli manúš šukár duminéla pal davá; adiáke so manušénge nane primangipen, kóli jone rakirna, so jone na džinéna Devlés.

²¹Jone džindlé Devlés, ne jone na slavindle Les, syr Devlés, i na parikirenas Léske: jone jačné te košenpe, kiéli pirirakirenas, i léngire nagod'vare ile tasadyne dro kalypén:

²²kiéli jone gindlé pes god'varenca, ne syr vygijá, jačné dylynenca,

²³i jone parude bimeribnaskiri Devléskiri sláva pe manušýtko óbrazo, savó meréla, i čiriklytko, i murdalytko i odolengiro, savé polzynena.

²⁴Paldavá Devél otdyjá len pir léngire-grehengiro kamiben dro iló i jone lyné te magirén péskire masá jekh jekhésa:

²⁵kadalé manušá parude Devléskiro čačipén xohaibnasa, jone mangénape i dynarinena (služynena) odoléske, konés jone vydumindle kokoré, butýr syr Kodoléske, Savó kerdiá davá saró, Savó isyn mol viečnone slavake. Amín'.

²⁶Paldavá Devél otdyjá len biladžaipnytkone kamibnaske: i léngire džuvliá parudyne te dživén péskire romenca adiáke, syr natrej;

²⁷adiáke-pac' i muršá, pirijačne te dživén džuvliénca, syr trej, a jone xačonas kamibnasa jekh pe jekhéste, i lyné te kerén magiripén murš muršesa, i jone doreséna (dolena) kokoré dre péste kára pal péskiro bléndo.

²⁸I pal-dová, syr jone na kamlé te džinén pal Devléste, tedy Devél i mekciá len, sob (kaj) jone te kerén pir nalačhi godý, ne so lénge kamelape;

²⁹i jone isyn pherdé kažnoné načačipnasa, zlydnimasa, bokhasa ke lové, čoripnasa, zevlynypnasa, rozmaribnasa, vyprobinena jekh jekhés, obrakiribnasa, pljotkenca;

³⁰jone xohavena jekh jekhés, i jone na rikiréna syr Drógima Devlés dro péskiro iló; biladžaipnytka, phut'kirdé, šaribnytka; jone usá keréna nevó fuipén, na kandéna peskiren daden.

³¹Jone isyn bigodiakire, naštý lénge te patias, nane lénde ni láska, ni tangipén;

³²jone džinéna čačunó Devlýtko séndo, so manušá, savé keréna dasavé réndy isyn mol meribnáske, ne jone na, so kokoré duredýr keréna grého, ne jone i šarena javirén, kon keréla dová-pac'.