Read Biblija - Pe Baltitko Romani čib (Romanes) 2019 Baltic Romani Bible Rimlianenge 10 Bible Online

Rimlianenge 10 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 10

¹Pšalále! Šuk miré ileskiri i mangipén ke Devél isyn pal dová, sob (kaj) Izrailjo te javél zrakhno.

²Me som léngiro jakhítko (svidietiéljo), so jone zoralés rikiréna syr Drógima Devlés dro péskiro iló ke zevlynypén, ne na pir džinybén.

³Pal-dová so jone na udžindlé Devléskiro čačipén, i čhuvénas zorjása jone péskiro čačipén, pal-dová jone na čhudé pes tel Devléskiro čačipén.

⁴Zakóno končyndiape Xristosósa, sob (kaj) kažno, kon patiála, te javél pridžindlo čačunesa.

⁵Mójza (Moisiejo) čhinela pal čačipén pir Zakóno: “So manúš, savó javéla te kerél pir Zakóno, javéla te dživél Lésa.”

⁶A čačipén, savó isyn patiaibnastyr, rakiréla adiáke: “Na rákir dro péskiro iló: ‘Kon džála upré pe bolybén?’” (Sob (kaj) odothýr te janel telé Xristosós upralypnastyr)

⁷ci ‘Kon moginéla te zmekelpe tel phuv?’ (Sob (kaj) te ĥazdel Xristosós muléndyr).

⁸So rakiréla Svénto Čhinybén? “Lav isyn dynó túke, jov isyn dre tyré uštá i dre tyró iló”, ĥáda, isyn dová lav, savésa ame phenása lav,

⁹pal-dová so, kóli tu priĥaljosa tyré ušténca i javésa te rakirés sarénge, so ‘Isúso isyn Devél’ i javésa te patias tyré ilésa, so Devél otdžidiakirdiá Les muléndyr, tedy tu zrakhesape.

¹⁰Pal-dová so, kon patiála ilésa, davá patiaibén lydžála ke čačipén, a kon priĥaljola ušténca, davá lydžála ke zrakhibén.

¹¹Paldavá Svénto Čhinybén rakiréla: “Kon patiála dre Léste, odoléske na javéla ladžavo.”

¹²Pal-dová so nane nisavó vykedyiben maškír Judénde i Elinénge (Griekénge/Balaménge); pal-dová so jekh Odová-pac' Devél isyn vaš sarénge, i Savó bahtiakiréla barvales sarén, kon prikharela Les.

¹³Pal-dová so so jekh manúš, kon prikharela Devléskiro lav, zrakhélape.

¹⁴Ne syr saštý te prikhares Odolés, dre Konéste jone na upatiándyne? I syr lénge te upatian dre Odoléste, pal Konéste jone nisó na šundlé? I syr jone moginéna te šunén, kóli nikón na javéla te phenél lav lénge?

¹⁵Ne syr vari-kon javéla te phenél lav lénge, kóli jov na javéla bičhadó? Syr isyn čhindló pal davá: “Save bahtalé isyn ĥerá odolé manušéngire, savé psiréna pir svéto i rosphenena bahtalý zan pal ramánjo, pal Léskire lačhé réndy.”

¹⁶Ne na saré Judy prilyné bahtalý zan (zvies'). Paldavá Isajo rakiréla: “Rajo Dévla! Kon patiandyja dre amarí bahtalý zan (zvies').”

¹⁷Patiaibén javéla šunybnastyr, a šunybén javéla Devléskire lavéndyr.

¹⁸Ne me phučava: “Naúšto (nieuželi) jone na šundlé? Šundlé, čačes; léngiri zan progijá pir sarí phuv, i léngire lavá sys šundlé pe svetóskire jagóry (krái).”

¹⁹Ne me nevéstyr rakiráva: “Ci moginéla adiáke te javél, sob (kaj) Izrailjo te na džinél davá? Mójza pérvo rakirdiá: ‘Me džangavava tumen, sob (kaj) tumé te zevlynen pir odolé manušénde, savé na ginenape pal nacyja: me ĥazdáva dre tuménde xolý pir manušénde, savé na džinéna Man.’”

²⁰Isajo murškanés rakiréla: “Man lathné odolé, savé na rodyne Man; Me sykadjom pes odolénge, savé na phučné pal Mánde.”

²¹A Izrailjoske Jov rakiréla: “Saró dyvés Me protyrdavas miré vastá ke adalé manušá, savé na kandéna i keréna proti Mánde.”