Read Biblija - Pe Baltitko Romani čib (Romanes) 2019 Baltic Romani Bible Rimlianenge 11 Bible Online

Rimlianenge 11 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 11

¹Paldavá me phučava: “Ci Devél mekciá Péskire manušén?” Nad. Me kokoró som Izrail'tianino, Avraamóskire rodóstyr, Vieniaminóskire rigátyr.

²Devél na mogindiá te mekel Péskire manušén, savén Jov angledýr pridžindia. Ci tumé na džinéna, so rakiréla Svénto Čhinybén pal Ilijaste, syr jov tanginelape (žalinelape) pe Izrailjo angíl Devléste?

³“Rajo Dévla! Jone zamardé (umarde) Tyré prorokén, rosphagirdé Tyré Sventoné-dyibnytka štéty i me jacjompe jekhdžinó, i jone rodéna te zamarén man.”

⁴Ne so rakiréla Devlykano otphenybén? “Me rakhcjom Péske eftá tysjoncy manušén, savé na terdiné pe čangá angíl Vaaloste.”

⁵Adiáke-pac' i dro amaró časo pir Devléskiro vykedyiben pir bahtalypén isyn vykedyny paš.

⁶Kóli pir bahtalypén-davá nane butýr pal réndy, to bahtalypén pirijačelas te javél bahtalypnasa, syr Devléskiro dyibén.

⁷Ne so ž tedy? So Izrailjo rodyja, odová jov na lathja (lastia), ne odolé, savé sys vykedyné, lathné, a javír sýrby kororine xoliátyr.

⁸Syr i sys čhindló pal davá: “Devél dyjá lénge dasavo dúho (fáno), so léngiri godý isyn suty, léngire jakhá na dykhéna i kaná na šunéna ke adadyvesatuno dyvés.”

⁹I Davído rakiréla: “Mek te javél skamindengiro pibén lénge syr khudý (siet'), syr mirieža, syr felý (pietlia) te poperenpe i pharó otdyibén vaš lénge:

¹⁰mek te korjon léngire jakhá, sob (kaj) jone te na dykhén, i mek te javén zband'kirde léngire dume pe saró džiibén.”

¹¹Tedy me phučava: Naúšto jone obštadepe, sob (kaj) sarésa te perén? Sarésa nad: Dová, so jone pyné, jandiá Najudénge zrakhibén, sob (kaj) te vykharen zevlynypén dro Izrailjo.

¹²Kóli davá, so jone pyné, janéla svetoske barvaló bahtiakiribén, i kóli léngiro xasiakiriben janéla barvaló bahtiakiribén Najudénge, tedy ci pe but butýr Judénge kokorende javéla barvaló bahtiakiribén pe kónco (pe jagóro).

¹³Paldavá me rakiráva, tuménge, Najudénge: syr me som tumaró Apostolo, me drieván kutiakirava miro dynaribén (služenijo);

¹⁴ci na ĥazdáva me zevlynypén dre miré pšalénde, savé isyn mánge pir rat, sob (kaj) te zrakhav vari-savé léndyr?

¹⁵Kóli léngiro otgiiben janéla svetoske ramánjo (miro) Devlésa, tedy so ž javéla, kiéli Devél priléla len nevéstyr? A davá javéla sýrby otdžidyiben muléndyr.

¹⁶Kóli isyn svénto anglatunó xumer (tiasto), tedy svénto javéla i saró maró. Kóli isyn svénto kokoró kašt (drévo), tedy svénta javéna i léskire randiá (vétki).

¹⁷A kóli vari-savé randiá otphadine, a tut syr xrustengiri maslina pribarjakirdy pe léngiro štéto, i kakaná adiáke-pac', syr i jone, tu čaravésaspe (xahavésaspe) javire randiénca thulé-olivitkoné kaštéstyr,

¹⁸to na šarpe angíl javír randiá; a kóli tu šaresape, tedy na bistyr, so na tu čaravesa (xahavésa) kašt, a jov xahavela tut.

¹⁹Tu moginésa te phenés kakaná: “Randiá otphadine vaš dová, sob (kaj) man te pribarjakiren.”

²⁰Mištó: jone otphadine pal péskiro napatiaiben, a tu rikiresape pal péskiro patiaibén. Rakh kokori pes, ne dar:

²¹pal-dová so, kóli Devél na potangindia randien, savé vybarine kadalé kaštéstyr, tedy dykh, Jov na javéla te tanginél i tut.

²²I adiáke, dykh Devléskiro tangipén i strogima: ke odolé, kon otpyja, — strogima, ne ke tu — Devléskiro bahtaló lačhipén, kóli tu javésa te dživés Léskire bahtalé lačhipnása, pal-dová so, kóli na adiáke, tedy i tu javésa čingirdo krig.

²³Ne i adiáke-pac' odolé, savé na javéna te dživén duredýr péskire patiaibnása, javéna nevéstyr pribarjakirde; pal-dová so Devléste isyn zor nevéstyr te pribarjakirel len.

²⁴Paldavá so, kóli tu sánas čingirdo krig olivitkoné kaštéstyr pir bijanypén, i na pir péskiro bijanypén, i tut pribarjakirde ke lačhí olivítko raslina, to fedýr saréstyr pribarjona dolé randiá ke péskiro olivítko kašt (drévo), savéstyr jone sys otčingirde.

²⁵Paldavá me na kamám, pšalále, te jačkirav tumen dre nadžinyben pal čorahanyben, sob (kaj) tumé te na duminen vučés pal péste, vari-savé Judy jačné phareilytka i davá javéla ke odová časo, paka, kicý trej Najuden, risjona ke Devél;

²⁶i adiáke saró Izrailjo zrakhélape. I syr isyn čhindló pal davá: “Zrakhibnari javéla Sionóstyr; i Jov otriskirela bidevlytkima Jakovostyr.

²⁷I davá Mándyr lénge dorakiribén, kiéli Me zlava gréhi léndyr.”

²⁸Dro otlydžaiben ke bahtalý zan (zvies'), jone jačné vergenca vaš tuménge; ne so otlydžalape ke vykedyiben, jone isyn Devléskire naj drogedyr manušá pir léngire dadende.

²⁹Devléskire talany i Léskiro prikhariben na parudjona.

³⁰Paldavá adiáke-pac', syr i tumé vari-kiéli na kandyné Devlés, ne kakaná Devél potangindia tumen, pir dová so Judy na lyné te kandén,

³¹adiáke-pac' i jone kakaná na kandyné vaš dová, sob (kaj) i lénge te javél láska pir Devléskiro tangipén, savó adiáke-pac' sys dynó tuménge.

³²Devél prolydžija sarén manušén pir nakandypen, sob (kaj) te sykavél Péskiro tangipén pe lénde.

³³Ake, savó baró barvalypén i godý, i džinybén Devléste! Syr naštý te ĥaljos, syr Jov sendinela i naštý te džinés Léskire dromá!

³⁴Kon udžindiá, so Devél duminéla? Ci mogindiá vari-kon Léske te radinel?

³⁵Ci dyjá vari-kon pérvo Léske dro vužlypén, sob (kaj) jov te moginel te doresel (te dolel) pale?

³⁶Pal-dová so saró džála Léstyr i pir Léste i vaš Léske. Mek te javél sláva Léske dre viéki! Amín'.