Read Biblija - Pe Baltitko Romani čib (Romanes) 2019 Baltic Romani Bible Rimlianenge 12 Bible Online

Rimlianenge 12 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 12

¹Paldavá, pšalále, me mangáva tumen Devléskire tangipnasa, te otdén pes sarésa syr svénto džidó otdyibén i savó trej Devléske vaš tumaró god'varó dynaribén (služenije) Léske godiása i ilésa.

²Na dživén adiáke, syr adalé-viekoskire manušá dživéna, ne paruven pes, neviakiren tumarí godý, sob (kaj) tuménge te džinén, so Devléskiri vólia isyn lačhí, bidošengiri i čačuný.

³Paldavá me rakiráva kažnonéske tuméndyr: na duminen pal péste butedýr, syr trej te dumines; ne duminen god'vares pir tumaró patiaibén, savó Devél dyjá kažnonéske tuméndyr.

⁴Paldavá, syr manušéste isyn jekh masá i but pašá dre léste, ne na saré pašá, so ke jekh, keréna dová-pac';

⁵adiáke-pac' i ame saré khetané sam sýrby jekh masá dre Xristosóste, a kóli ame na sam khetané, tedy ame sam pašá jekh jekhéske.

⁶Ne paldová, syr aménde isyn rázna talany pir bahtalypén, savó isyn dynó aménge, tedy javása te dynarinás Devléske lénca, konéske isyn dynó taláno: te javél proróko, mek te rakirél pir patiaibén, savó isyn léste:

⁷kóli vari-konéske dynó te pomoginel javirénge, mek odová manúš te pomoginel; ci, kóli vari-konéske dynó te javél sykliakiribnáskiro, mek odová manúš te sykliakirél.

⁸Ci, kóli vari-konéske dynó te podrikirél manušén, mek odová manúš te podrikirél; kóli vari-konéske dynó te rozdel čororenge, mek odová manúš te na tanginél, mek te del saré iléstyr; ci kóli vari-konéske dynó te javél rása, mek odová manúš te kerél mištés péskiri butý. Kóli vari-konéske dynó te dykhél pal javirende, mek odová manúš te kerél davá radymása.

⁹Mek te javél čačuný tumarí pšalýtko patýv; risjon krig fuipnastyr i kerén lačhipén:

¹⁰sykavén patýv jekh jekhéske pšalytkone patyvása i tanginen jekh jekhés: kutiakiren (važynen) jekh jekhés;

¹¹na javén kirné-maséngire, xačon duhósa, kiéli tumé dynarinena Devléske.

¹²Radynénpe dro tumarí nadiéia: javén zoralé (tvarda) dro piridživipen; ŭsády (sak) mangénpe Devléske;

¹³pomoginen (poden vast) Devlytkoné manušénge, kiéli lénde isyn trébima, dykhén ilésa pal odolé manušénde, savé javéna ke tumé.

¹⁴Bahtiakiren odolé manušén, savé tradéna tumen; bahtiakiren, a na košen.

¹⁵Radynénpe khetané odolé manušénca, savé radynénape, i rovén khetané odolé manušénca, savé rovena.

¹⁶Dživén syr malá (drúgi) maškír péste; na phutjon, a javén kandune; na duminen pal péste, so tumé san drieván god'varé:

¹⁷na kerén čoripén pale pal xolý nikonéske, kerén lačhipén saré manušénge;

¹⁸kóli davá saštý tumaré rigátyr, dživén dro ramánjo (miro) saré manušénca.

¹⁹Miré malá, na kerén nisavó čoripén nikonéske pal péste, pšála miré, fedýr jačkiren štéto vaš Devléskiri xolý; pal-dová so, syr isyn čhindló: “Jačkiren davá Mánge, Me keráva”, — rakiréla Raj Devél.

²⁰I kóli tyró vérgo (vrogo) isyn bokhalo, čarav les; kóli jov kaméla te p'jel, de te p'jel léske; pal-dová so, kóli tu kerésa adiáke, tu kedesa léske pe šeró xačkirdé vangara.

²¹Na domek, sob (kaj) xolý te lel lófo (zor) pe túte, ne kokoró pirizorjakir xolý lačhipnása.