Read Biblija - Pe Baltitko Romani čib (Romanes) 2019 Baltic Romani Bible Rimlianenge 13 Bible Online

Rimlianenge 13 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 13

¹Kažno manúš isyn bangó (musinela) te kandel theméskire barydyrén, pal-dová so nane davá, sob (kaj) te na javén jone Devléstyr, i sarén barydyrén, savénde isyn pravo pe manušénde, čhudiá Devél.

²Paldavá odová, kon isyn proti barydyrende, isyn proti odoléste, savés čhudiá Devél; i kon adiáke keréla, odová kokoró janéla séndo pe péste.

³Pal-dová so barydyrá isyn darane na vaš odolénge, kon keréla lačhipén, na vaš odolénge, kon keréla fuipén. Ci kamésa tu te na dares barydyrendyr? Ker lačhipén i túke javéla léngiro šaribén;

⁴pal-dová so barydyró isyn Devléskiro dynári vaš dová, sob (kaj) túke te javél lačhipén. A kóli tu kerésa fuipén, tedy dáro, pal-dová so léste na ivjá (na naprásnes) isyn kurtála; pal-dová so jov isyn Devléskiro dynári, savés Devél čhudiá vaš kára odolé manušéske, savó keréla fuipén.

⁵Paldavá trej te kandes na pal jekh dar angíl kára, ne i pal patýv.

⁶Paldavá tumé i pleskirena namirja (podati): pal-dová so jone isyn Devléskire dynárja, i ĥáda, isyn léngiri butý.

⁷Paldavá otdén kažnonéske dová, so léske trej: konéske trej namirja (podati), otdén odoléske namirja; konéstyr trej myto (obroko), otdén odoléske myto; konéstyr trej te darén, darén odoléstyr; konéske trej kutiakiriben, kutiakiren odolés.

⁸Na javén dro vužlypén ni konéste apríč syr vužlypén te sykavén patýv jekh jekhéske: pal-dová so, kon sykavéla patýv péskire pašatuné manušéske, odová spolninela Zakóno.

⁹Pal-dová so priphenybená: “Na ker marki (biladžaipén), na zamar, na čor, na xohav, na zevlyn,” i, kóli isyn vari-savó javír priphenybén, to léskiro smyslo dre dalé lavá: “Sykáv patýv péskire pašatuné manušéske, syr kokoró péske.”

¹⁰Kon sykavéla patýv, odová na keréla čoripén pašatuné manušéske, pal-dová so, kon sykavéla patýv, odová spolninela Zakóno.

¹¹Kerén adiáke, syr tumé te džinén časo, so kakaná javdiá mardó (štúnda) tuménge te uštén soibnastyr; pal-dová so kakaná isyn pašedyr amaró zrakhibén, syr tedy, kiéli ame lyjam te patias.

¹²Rat džála krig syg i dyvés jačéla, paldavá mekasa kalé réndy i urjasape dro parnypen.

¹³Syr i dyvesé, javása te lydžas pes šukár, na javása te xas na pir miéra, i na javása te matjovas, na javása te kerás marki i te kerás ladžave réndy, na javása te vyprobinas jekh jekhés i te zevlynas.

¹⁴Dživén i kerén saró pir Isusóskiro Xristosóskiro čačipén, amaré Ráskire-Devléskiro, na otdén kokoré pes vaš tumarí loč i lákiro tyrdypén.