Read Biblija - Pe Baltitko Romani čib (Romanes) 2019 Baltic Romani Bible Rimlianenge 14 Bible Online

Rimlianenge 14 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 14

¹Manušés, savéste nane zoraló patiaibén, prilén bi phučibnaskiro.

²Pal-dová so jekheskiro patiaibén déla vólia léske saró te xal, a manúš, savéste nane zoraló patiaibén, mek féni jov te xal šaha (ovoščy).

³Odová, kon xála, na sendiakir odolés, kon na xála; i kon na xála, na sendiakir odolés, kon xála, pal-dová so Devél prilyjá i les.

⁴Kon tu adasavó san, so tu sendiakiresa javire — xuláskire pisharís? Jov isyn terdó ci peréla angíl péskire xulaste. I jov nevéstyr uštéla, pal-dová so Devél moginéla te čhuvél les, sob (kaj) jov te javél terdó.

⁵Jekh manúš ginéla, so jekh dyvés isyn butýr svénto, syr javír, a javír manúš ginéla jekh dyvés adiáke-pac', syr i javír. Mek kažno manúš te kerél saró pir péskiro patiaibén.

⁶Odová, kon ginéla, so jekh dyvés isyn glavnedyr javirestyr, ginéla vaš Devléske. I odová, kon xála, xála vaš Devléske, pal-dová so jov parikirela Devléske pal davá; i odová, kon na xála, jov keréla davá vaš Devléske, i parikirela Devléske.

⁷Pal-dová so nikón améndyr na dživéla vaš péske i nikón na meréla vaš péske.

⁸Paldavá, kóli ame dživasa, ame dživasa vaš Devléske; a kóli ame merasa, ame merasa vaš Devléske: a paldavá, ci ame merasa, ame ŭsády (sak) sam Devléskire.

⁹Vaš davá i myjá Xristóso, i otdžidyjá, sob (kaj) Léske te javél Rása-Devlésa i pe džidende i pe mulende.

¹⁰Ne so tu sendiakiresa péskire pšalés? Ci i tu, so tu obrakiresa péskire pšalés? Pal-dová so ame saré javása te terdjovas angíl Devléskiro séndo.

¹¹Paldavá isyn čhindló: “Me dživáva, — rakiréla Raj Devél, — angíl Mánde terdjona pe čangá manušá kažnoné rodóstyr i manušá pe kažna čibá (čibjá) pridžinena, so Me som Devél.”

¹²Tedy kažno améndyr javéla te otphenel kokoró pal péste angíl Devléste.

¹³Na javása butýr te sendiakiras jekh jekhés; ne fedýr javása te duminas pal dová, syr te na domekas pšaléske te zmarelpe droméstyr, te na zlydžas pšalés ke grého.

¹⁴Me džinóm i patiáva dre Raste-Devléste Isusóste, so nane nisó, sob (kaj) te javél nažužo kokoró pir péste; ne kóli manúš ginéla vari-so nažužesa, tedy vaš léste dová isyn nažužo.

¹⁵Kóli tyró pšal xoliasóla pal xabén, tedy tu kerésa na pir iló. Na xasiakir tyré xabnasa odolés, pal konéste Xristóso myjá.

¹⁶Mek manušá te na rakirén čoripén pal tumaró lačhipén;

¹⁷pal-dová so Devléskiro Kralipén-davá isyn na xabén i pibén, a čačipén, ramánjo i rádyma pir Svénto Dúho (Fáno).

¹⁸Pal-dová so, kon adiáke dynarinela Xristosóske, odová isyn dre rádyma Devléske i jov isyn mol šaribnaske manušéndyr.

¹⁹Tedy javása te pričhuvas zor te kerás dová, so lydžála ke ramánjo (miro) i ke jekh jekheskiro ĥalyibén.

²⁰Na xasiakir Devléskire réndy vaš xabén. Saró xabén isyn žužó (čysto); ne fujes odolé manušéske, kon xála i dalésa lydžála javire manušés ke grého.

²¹Fedýr te na xas mas, i te na p'jes mol i te na kerés nisó dasavo, sóstyr tyró pšal moginéla te zmarelpe droméstyr, sob (kaj) te na zlydžas pšalés, ci te na kerás dová, sóstyr jov na moginéla te zrikirelpe.

²²Patiaibén, savó isyn túte, isyn vaš péske angíl Devléste. Bahtaló isyn odová manúš, kon na sendiakiréla pes pal dová, so jov vykedyjá.

²³Ne odová, kon piriduminela, kóli jov xála, javéla sendiakirdo, pal-dová so jov keréla na pir patiaibén; a saró, so na pir patiaibén, isyn grého. [

²⁴A Devléske, savó déla zor tuménge te patias pir mirí bahtalý zan (zvies') i pir phenybén pal Isusóste Xristosóste pir čorahanybnaskiro otkeriben, Savó sys garadó ĥaratuné beršéndyr,

²⁵ne Savó akaná dynó tuménge pir prorokengiro čhinybén i pir Devléskiro viéčno uphenybén i sys rosphendly saré nacyiénge, sob (kaj) saré mogindlé te upatian i te kandén,

²⁶Jekhdžinéske i Naj God'varedyre Devléske, pir Isusóste Xristosóste te javél sláva pe saré viéki. Amín'.-r.s.]