Read Biblija - Pe Baltitko Romani čib (Romanes) 2019 Baltic Romani Bible Rimlianenge 15 Bible Online

Rimlianenge 15 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 15

¹Ame, savé sam zoraledýr, sam bangé (musinasa) te primangas doša odolé manušénge, savénde nane zor, a na te kerás jekh so pir péskiro iló.

²Kažnoné améndyr trej te duminel pal péskire pašatuné manušéste vaš dová, sob (kaj) jov te barjol dre dúho (fáno).

³Paldavá i Xristóso na kerdiá jekh so pir Léskiro iló, ne, syr isyn čhindló: “Odolé-manušéngiro košybén, savé košena Tut, pyné pe Mánde.”

⁴Paldavá saró, so isys čhindló angledýr, sys čhindló vaš aménge, sob (kaj) ame te sykljovas, sob (kaj) aménde te javél nadiéia vyrikiribnasa i podrikiribnasa Sventoné Čhinybnástyr.

⁵Mek Devél, savó déla vyrikiriben i podrikiribén, te del tuménge, sob (kaj) tumé te javén khetané dro dúho (fáno) maškír péste pir Isusóskire-Xristosóskiro sykliaiben,

⁶sob (kaj) tumé saré khetané jekhe ušténca te slavinén Devlés i amaré Ráskire-Devléskire Dadés.

⁷Paldavá, prilén jekh jekhés, syr i Xristóso prilyjá tumen, vaš sláva Devléskiri.

⁸Paldavá me rakiráva, so Isúso Xristóso jaciá dynári (slúga) občhindlenge vaš Devléskiro čačipén, sob (kaj) Léske te spolninel dynó lav, savó Jov dyjá dadénge;

⁹i sob (kaj) Náiudy te slavinén Devlés pal Léskiro tangipén, syr isyn čhindló: “Pal davá me javáva te slavinav Tut maškír Najudénde, i me javáva te bagáv giliá Tyré lavéske!”

¹⁰I nevéstyr Isajo rakiréla: “Radynénpe Náiudy khetané Léskire manušénca.”

¹¹I nevéstyr phendló: “Šarén Ras-Devlés, saré Náiudy i mek saré manušá te šarén Les.”

¹²I nevéstyr Isajo rakiréla: “Jov javéla Jesiejoskiro rodóstyr i Jov javéla te xulainél manušénca: pe Léste Náiudy javéna te rozginen.”

¹³Devél, Savó déla nadiéia, — mek te pherdiakirel tumen kažnoné radymása i ramanjosa dro tumaró patiaibén, sob (kaj) nadiéia te barjol Sventoné Duhóskire zorjása dre tuménde.

¹⁴Me kokoró džinóm pal tuménde, miré pšála, so tumaré ile isyn pherdé lačhipnása, i tumaró džinybén déla saštypen tuménge te sykliakirén jekh jekhés.

¹⁵Ne me čhindjom tuménge murškanedyr pal vari-savé réndy, sob (kaj) tumé te ripirén pal bahtalypén, savó Devél dyjá mánge,

¹⁶te javav Isusóskire-Xristosóskiro dynári vaš Najudénge i syr rašáske te sykliakirav Devléskiri bahtalý zan, sob (kaj) davá Najudengiro svénto dyibén te janel Devléske rádyma i te javél posvencyndlo Sventoné Duhósa.

¹⁷I paldavá pir Isusóste Xristosóste me mogináva te šaravpe miré dynaribnasa angíl Devléste.

¹⁸Pal-dová so mánde nane muršypen te rakiráv pal vari-so, so na kerdiá Xristóso pir mánde, vaš dová, sob (kaj) te janel Najuden ke patiaibén, lavésa i rendosa, savé Jov kerdiá,

¹⁹ĥertykakire zorjása i divenca, Devléskire Duhóskire zorjása adiáke, so me pherdés rosphendjom Xristososkiri bahtalý zan (zvies') Jerusalimóstyr i pašýl davá fóro ke Ilirika;

²⁰i me pričhudjom zor (starindjompe) te rakiráv na odój, kaj sys phendló Xristosóskiro lav, sob (kaj) te na čhuvav pe davá fundámiento, savó kerdé angíl mánde;

²¹ne syr isyn čhindló: “Odolé, konéske na sys rosphendlo pal Léste, odolé kokoré dykhéna, i odolé, savé na šundlé, udžinena.”

²²Paldavá mánde sys but terdó pe drom, so na délas mánge saštypen te javav ke tumé.

²³Ne kakaná, mánde nane butýr réndy pe dalé phuvjá, ne syr mánde ĥaratuné beršéndyr sys bari láska te javav ke tumé,

²⁴kakaná, kiéli me javáva te tradav dre Ispanija, me zatradava ke tumé, pal-dová so mánde isyn nadiéia te dykháv tumen, i so tumé man prolydžana dre drom korigedýr (pozžedýr) doléstyr, syr Me čaljovava radymása te rakiráv tuménca,

²⁵ne kakaná me džáva dro Jerusalimo te dynarinav sventonenge;

²⁶pal-dová so Makiedonija i Ahiia zakamle te skedén te den lové iléstyr sventonenge Jerusalimóstyr.

²⁷Jone kokoré zakamle davá, pal-dová so jone isyn vužle angíl lénde, kóli Náiudy jačné khetané Judenca dro Duhoskiro bahtiakiribén, tedy lénge trej te pomoginen lénge i pe džiibén.

²⁸Syr me keráva davá, me otdáva lénge, so skedynó, tedy me džáva pirdál tumaré štéty dre Ispanija.

²⁹Me džinóm, so kiéli me javáva ke tumé, me javáva dro pherdó Xristosóskiro bahtiakiribén.

³⁰Ne, akaná me mangáva tumen, pšála, amaré Rása-Devlésa, Isusósa Xristosósa i Duhóskire patyvása te javén mánca dro xor mangipén pal mánde ke Devél;

³¹sob (kaj) mánge te zrakhavpe Judendyr, savé na patiána dre Isusóste i, sob (kaj) miro dynaribén dro Jerusalimo te javél šukár prilyno sventonenca;

³²sob (kaj) mánge dre rádyma, kóli Devléske davá javéla trej, te javav ke tumé i khetané tuménca te otkinjovav.

³³Mek Devél, Savó déla ramánjo, te javél sarénca tuménca. Amín'.