Read Biblija - Pe Baltitko Romani čib (Romanes) 2019 Baltic Romani Bible Rimlianenge 16 Bible Online

Rimlianenge 16 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 16

¹Me kamám te phenáv tuménge lav pal amarjate pheniate Fivate, joj isyn diakonisa dre Kienhriejengiri khangirí;

²sob (kaj) tumé te prilén la syr Devléskirja manušniá, syr trej te priles sventonen, i pomoginen láke, dre so joj iavéla te mangél tumen, pal-dová so joj kokori pomoginelas butenge, adiáke-pac' i mánge.

³Piridén “ramánjo” (miro) Priskiloske i Akiloske, adiáke-pac' miré manušénge, savé khetané mánca kerdé butý vaš Isusóske Xristosóske,

⁴savé pal miro džiibén otdenas kokoré péskiro šeró; me parikirava lénge najekhdžino ne i saré Najudengire khangirja,

⁵adiáke-pac' piridén “ramánjo” i khangirjake, saví skedelape dre léngiro kher. Piridén “ramánjo” Jepienietoske, adiáke-pac' miré drogoné maléske, savó angledýr saréndyr upatiandyja dre Xristosóste dre Asija.

⁶Piridén “ramánjo” Marijake, saví kerdiá adiáke but lačhipén vaš tuménge.

⁷Piridén “ramánjo” Andronikoske i Junijoske, miré semencake, savé sys bešté khetané mánca dro štaribén; jone isyn džindlé maškír Apostolende i angledýr mándyr upatiándyne dre Xristosóste.

⁸Piridén “ramánjo” Amplijaske, savó isyn drieván drógo mánge syr pšal pir patiaibén dre Raste-Devléste.

⁹Piridén “ramánjo” Urbanoske, savó khetané aménca keréla butý vaš Xristosóske, i miré drogoné maléske Stahijoske.

¹⁰Piridén “ramánjo” Apieliesoske, savó sykadiá, so jov čačunó patiaibnaskiro dre Xristosóste, sarénge Aristovuloskire kheréstyr.

¹¹Piridén “ramánjo” Irodionoske, miré semencake, “ramánjo” patiaibnaskirenge dre Raste-Devléste Narkisoskire kheréstyr.

¹²Piridén “ramánjo” Trifienake i Trifosake, savé keréna butý vaš Devléske. “Ramánjo” drogoné Piersidake, saví but kerdiá vaš Devléske.

¹³Piridén “ramánjo” Rufaske, savés Devél vykedyjá, i léskire dáke, saví sys syr daj i vaš mánge.

¹⁴Piridén “ramánjo” Asinkritoske, Fligontoske, Jermaske, Patrovoske, Jermijaske i javire pšalénge, savé isyn khetané lésa.

¹⁵Piridén “ramánjo” Filologoske i Julijaske, Niriejoske i léskire pheniake, i Olimpanoske i saré devlytkonenge, savé isyn khetané Lésa.

¹⁶Den “dobridim” jekh jekhéske Sventoné čamudypnasa. Saré Xristosóskire khangirja piridena “ramánjo” tuménge.

¹⁷Ne me mangáva tumen, pšalále, te rakhénpe odolé manušéndyr, savé keréna dre khangirja roskeribena i pharipena, i kaména te lydžán krig tumen dalé sykliaibnastyr, savéske tumé vysyklyne.

¹⁸Paldavá adasavé manušá dynarinena na amaré Ráske-Devléske, Isusóske Xristosóske, a péskire nalačhé kamibnaske; jone xahavéna (déna dukhá) lačhé-ilytkone manušén gudlé i xohané lavénca.

¹⁹Tumaro kandypen patiaibnaske isyn džindló sarénge; paldavá me som drieván rado pal tuménde, me kamám, sob (kaj) tumé te javén god'varé dro lačhipén i te na javén bangé dro fuipén.

²⁰Ne Devél, Savó déla ramánjo, xasiakiréla nalačhés tel tumaré ĥerá. Mek te javél bahtalypén amaré Ráskire-Devléskire, Isusóskiro Xristosóskiro tuménca! Amín'.

²¹Piridela “ramánjo” tuménge Xima (Timofiejo), savó keréla butý khetané mánca, i Lucyjo, Iasono, i Sosipatro, mirí seménca.

²²Me, Cercyjo, savó čhindjom davá lyl, piridava “ramánjo” tuménge, syr pšal pir patiaibén dre Raste-Devléste.

²³Piridela “ramánjo” tuménge Gajo, savó prilyjá man i sarí khangirí. Piridela “ramánjo” tuménge Jerasto, rakhibnári pe forítko tyknorí (sokroviščýtko) i pšal Kvarto.

²⁴Mek bahtalypén Ráskire-Devléskire, amaré Isusóskire Xristosóskiro te javél sarénca tuménca. Amín'.