Read Biblija - Pe Baltitko Romani čib (Romanes) 2019 Baltic Romani Bible Rimlianenge 2 Bible Online

Rimlianenge 2 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 2

¹Nane túke primangipen, kažno manúš, savó sendinela javirés, odolé-pac' sendosa tu kokoró javésa sendindlo, pal-dová so, kóli tu sendinesa javire manušés, tu kerésa dová-pac' kokoró péske.

²Ne ame džinása, so pe adalé manušénde, kon keréla dasavo-pac', isyn čačunó Devléskiro séndo.

³Manúš, tu so duminesa, so obdžala Devléskiro séndo, kiéli tu sendinesa manušén, savé keréna dasavé réndy i kokoró dová-pac' kerésa?

⁴Ci tu na ginesa Devléskiro lačhipén, vyrikiriben i užakiribén, i, xaj, tu na ĥaljosa, so Devléske trej, sob (kaj) tu te riskires péskiro džiibén ke Jov?

⁵A pir tyró nakandypen i naporiskirdo ke Jov iló, tu kokoró péske kedesa butýr xolý pe dyvés vaš Devléskiri xolý, kiéli Jov otkerela Péskiro séndo,

⁶kiéli Devél otdéla kažnoné manušéske phenéla pal léskire réndy:

⁷odolénge, kon saró časo keréla lačhé réndy i pir davá rodéla sláva, čačipén i bimeribnaskiro kónco (jagóro), Jov déla viéčno džiibén.

⁸Ne odolén, kon keréla pir péskiri godý i na priĥaljola čačipén, a keréla fuipén, kodolés užakiréla xolý i xoliamipen Devléstyr,

⁹túga i kalypén javéna kažnoné (svakone) manušéskire ileske, savó keréla fuipén, angledýr Judénge, i adiáke-pac' i Elinénge (Griekénge/Balaménge):

¹⁰a sláva i patýv, i ramánjo kažnoné manušéske, savó keréla lačhipén, angledýr Judénge, i adiáke-pac' i Elinenge (Griekénge):

¹¹Pal-dová so Devél kutiakirela šerá (rávnes) saré manušén.

¹²Odolé manušá, savé na džindlé Zakóno i kerdé gréhi, jone na pir Zakóno i xasjona; ne odolé, savé džindlé Zakóno i kerdé gréhi, jone pir Zakóno i javéna sendindle;

¹³pal-dová so, na odolé manušá isyn čačuné angíl Devléste, savé šunéna Zakóno, a kodolé, savé keréna pir Zakóno, jone javéna zrakhné.

¹⁴Pal-dová so, kiéli Najudénde nane Zakóno, jone keréna kokoré péstyr, sýrby pir Zakóno, tedy jone, savénde nane Zakóno, isyn Zakóno kokoré péske;

¹⁵jone i sykavéna, so Zakóno isyn sýrby čhindló dre léngiro iló, léngiri patýv i godý dophenéla pal davá, jekh mólo jone zaterdjona jekh pal jekhéste, a javír mólo bangiakirena jekh jekhés;

¹⁶dro dová-pac' dyvés, kiéli Devél pir bahtalý zan (zvies'), saví me rosphendjom, javéla te sendiakirél saré čorahane manušéngire réndy pir Isusóste Xristosóste.

¹⁷Kóli tu pes ginesa Judosa i rozginesa pe Zakóno, i šaresape Devlésa,

¹⁸i džinésa Léskiri vólia, i ĥaljosa, so isyn fededýr, syklyi Zakonóstyr;

¹⁹i tu san tvardo, so tu san lydžaibnaskiro kororenge i tu san dud vaš odolé manušénge, savé psiréna dro kalypén (ciamlypén);

²⁰tu san sykliari (nastavniko) vaš dylynenge i sykliakiribnáskiro bijatorenge, konéste isyn dro Zakóno saró, so dasavo isyn džinybén i čačipén:

²¹Syr tu sykliakiresa javire manušén, a angledýr tu kokoró na sykljosa?

²²Tu rakirésa te na kerén biladžaipén, a tu kokoró kerésa biladžaipén? Túke, xaj, drieván na pir iló ídoly, a kokoró tu občoresa léngire khangirja?

²³Tu, savó šaresape, so tu džinésa Zakóno, a kokoró kerésa na pir Zakóno, — dalésa tu ladžakiresa Devlés?

²⁴Paldavá isyn čhindló: “Pal tuménde Náiudy javéna te teliakiren Devléskiro lav.”

²⁵Paldavá občhinyben janéla túke lačhipén, kóli tu rakhesa Zakóno: ne kóli tu kerésa na pir Zakóno, tedy tyró občhinyben nisó na mol.

²⁶I kóli manúš, savó isyn naobčhindlo, keréla saró, so isyn čhindló dro Zakóno, ci na javéla léskiro naobčhinyben te ginelpe léske dro občhinyben?

²⁷I manušá, savé bijanypnastyr na sys občhindlé, a keréna pir Zakóno, ci jone javéna te sendinén tut, savó na keréla pir Zakóno i džinéla Svénto Čhinybén?

²⁸Pal-dová so, na odová isyn Judo, kon isyn Judo javriestyr, i na dová občhinyben, savó isyn kerdó pe masá javriestyr;

²⁹ne odová isyn čačunó Judo, savó andrál isyn dasavo, i dová isyn občhinyben, savó isyn dro iló, pir dúho (fáno), a na pir Zakóno, dasaveske manušéske javéla šaribén na manušéndyr, a Devléstyr.