Read Biblija - Pe Baltitko Romani čib (Romanes) 2019 Baltic Romani Bible Rimlianenge 3 Bible Online

Rimlianenge 3 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 3

¹Tedy, saví l'góta (prieimuščestvo) isyn Judénde javire manušéndyr, ci savó lačhipén isyn občhinybnastyr?

²Judénde isyn bari l'góta dro saró: butýr saréstyr dre dová, so lénge sys dopatiakirdo Devléskiro lav.

³I so ž? Kóli but léndyr na upatiándyne dre Devléste, tedy ci moginéla léngiro načačipén te xasiakirél Devléskiro čačipén?

⁴Nad, nisyr. Devél isyn čačunó, a kažno manúš isyn xohanó, syr isyn čhindló: “Čačuné isyn Tyré lavá, i dro séndo Tyró isyn čačipén.”

⁵Ne kóli amaró načačipén sykavéla Devléskiro čačipén, tedy so ame phenása? Naúšto javéla Devél načačuno pe aménde dre Péskiri xolý? Me rakiráva pir manušýtko godý.

⁶Nad, kóli adiáke davá te javél, tedy syr Devél javéla te sendiakirél svéto?

⁷Kóli miro načačipén keréla bicialedyr Devléskiro čačipén i dalésa keréla baredýr Léskiri sláva, tedy pal so iščo (inké) man te sendinén, syr grehitkoné manušés?

⁸Sóske aménge tedy duredýr te na kerás fuipén, sob (kaj) butýr te barjol lačhipén, syr vari-savé manušá košena amen i rakiréna, so ame adiáke sykliakirasa? Čačunó séndo javéla pe kadasavé manušénde.

⁹So ž tedy? Ci isyn aménde vari-saví l'góta angíl javire manušénde? Nisaví; paldová so ame kakaná dophendiam, so syr Judy, adiáke-pac' i Elíny (Griéki/Balamé), ame saré sam tel grehítko zor:

¹⁰syr i isyn čhindló: “Nane nijékh čačunó manúš;

¹¹nane nikón, sob (kaj) te ĥaljol i te rodél Devlés.

¹²Saré mardépe dre rig droméstyr, i so ke jekh isyn xasibnýtka, nane ni jekh manúš, kon keréla lačhipén; nane nikón:

¹³léngiro kirlo isyn otčhakirdy maĥila, jone péskire čibása (čibjasa) rakiréna jekh xohaibén; sapitko truta (jado) isyn pe léngire uštá:

¹⁴léngire lavéndyr isyn jekh košybén i kirkipen;

¹⁵léngire ĥerá lydžána sýges te pročhuven manušéngiro rat;

¹⁶bizlado i xasibén odój, kaj jone giné,

¹⁷jone na ĥalyné drom ke ramánjo (miro).

¹⁸I jone na kutiakirena i na darna Devléstyr.”

¹⁹Ne ame džinása, so dová, so vari-kiéli Zakóno rakiréla, jov rakiréla odolé manušénge, savé isyn tel Zakóno adiáke, sob (kaj) kažna lavá te zaphenen te rakirén, i saró svéto te javél bangó angíl Devléste.

²⁰Kon keréla pir Zakóno, usajékh nijékh na pridžinelape čačunesa angíl Devléste, pal-dová so Zakóno déla aménge te džinas, so da dasavo isyn grého.

²¹Ne kakaná Devél otčhakirela Péskiro čačipén manušénge, savé isyn vol'na Zakonóstyr, a davá džála čačipnastyr, pal savó dophenena Zakóno i Proróki;

²²davá Devléskiro čačipén isyn pir patiaibén dre Isusóste Xristosóste, savó délape saré manušénge bi vykedyibnaskiro, kon patiála.

²³Pal-dová so saré manušá kerdé grého i jone durine Devléskire slavatyr.

²⁴Ne léngire gréhi otmekenape pir Devléskiro bahtalypén, pir vykinybén Isusóskire Xristosóskire ratésa;

²⁵Saves Devél čhudiá angíl syr svénto dyibén vaš tangipén pir patiaibén dro Léskiro rat, kon patiála, adiáke Devél sykadiá péskiro čačipén i primangdia gréhi manušénge, savé jone kerdé angledýr;

²⁶péskire ĥaratuné (dlugone) vyrikiribnasa saró davá časo, sob (kaj) Jov kakaná te sykavél péskiro čačipén, i so Jov kokoró isyn čačunó, i pridžinela čačunenca sarén, kon patiála dre Isusóste.

²⁷Sósa aménge kakaná te šaraspe? Nane sósa. Kóli jekhe Zakonosa? Nad, a patiaibnása pir Zakóno;

²⁸pal-dová so ame ginasa, so manúš pridžinelape čačunesa pir patiaibén, na dykhí, syr jov rakhéla Zakóno.

²⁹Naúšto Devél isyn jekh vaš Judénge? Ci nane Jov Devél i Najudénge? Jov isyn Devél adiáke-pac' vaš saré manušénge pe svéto:

³⁰pal-dová so isyn jekh Devél, Savó pridžinela čačunenca odolén, kon kerdiá občhinyben pir patiaibén i kodolén, savé patiána, ne savé isyn naobčindle.

³¹Ci davá na značynéla, so ame xasiakirasa Zakóno patiaibnása? Sarésa nad, ame kerása Zakóno zoraledýr.