Read Biblija - Pe Baltitko Romani čib (Romanes) 2019 Baltic Romani Bible Rimlianenge 4 Bible Online

Rimlianenge 4 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 4

¹So ame phenása, pal amaré pradadeste pir loč (plot') Avraamoste, so ž léste sys, syr jov isys džidó.

²Pal-dová so, kóli Avraámo isys pridžindlo čačunesa rendénca (dielenca), jov mogindiá te šarelpe angíl manušénde, ne na angíl Devléste;

³paldavá so rakiréla Svénto Čhinybén? “Avraámo upatiandyja dre Devléste, i pir davá Devél zlyjá saré léskire gréhi, i léskiro upatiaiben zagindiape dro čačipén léske.”

⁴Devléskiro pridžindlypen čačunesa na zaginelape odolé manušéske, savó keréla lačhé réndy na pir bahtalypén, a pir vužlypén;

⁵a odoléske, kon na keréla lačhé réndy, a kon patiála dre Odoléste, Kon pridžinela čačunenca grehitkoné manušén, léskiro patiaibén javéla zagindlo léske dre čačipén.

⁶Adiáke-pac', syr i Davído rakiréla pal bahtiakiribén, savó doreséla (dolela) manúš, savés Devél ginéla čačunesa, na dykhí pe léskire réndy:

⁷“Bahtalé isyn odolé, koneskire nalačhé réndy isyn primangne i konéske gréhi isyn čhakirde;

⁸bahtaló isyn odová manúš, konéske Devél na zaginela grého.”

⁹Ci otlydžalape davá bahtiakiribén ke občhindlé manušá, ci ke naobčhindle manušá? Ame ž rakirasa pal dová, so Avraamóske sys zagindlo patiaibén dro čačipén.

¹⁰Syr tedy davá sys zagindlo? Angíl občhinyben ci paló (poslie) občhinyben, ne na korigedýr (pozže) občhinybnastyr, a angíl občhinyben.

¹¹I jov doresciá (dolyja) občhinybnaskiri špéra (znako) syr dophenybén doléske, so jov sys čačunó patiaibnáske angíl léskiro občhinyben, sob (kaj) jov te javél dad vaš saré patiaibnáskirénge, savé isyn dasavé bi občhinybnaskire, sob (kaj) i lénge te javél zagindlo léngiro patiaibén dro čačipén;

¹²i sob (kaj) te javél dad i vaš občhindlenge, ne féni, savé isyn občhindlé, ne i odolénge, savé džána patiaibnáskiré dromésa, savésa gijá amaró dad Avraámo angíl, syr jov na sys občhindlo.

¹³Paldová so na pir Zakóno Avraámo i léskiro ródo doresciá (dolyja) Devléstyr lav te javél svetóskire xulása, a pirdál patiaibnaskiro čačipén.

¹⁴Kóli te javén svetóskire xulanca odolé, kon dživéla pir Zakóno, tedy patiaibén javéla čhučó (pusto) i lav nisó na javéla mol.

¹⁵Pal-dová so pir Zakóno javéla Devléskiri xolý, kaj nane Zakóno, odój i nane grého.

¹⁶Patiaibén vaš dová trej, sob (kaj) aménge Devél te primangel pir tangipén, i sob (kaj) dynó lav te javél jekh vaš saré Avraamóskire rodóske, a vaš jekhe odolénge, kon otlydžalape ke jone pir Zakóno, ne i vaš sarénge, kon isyn Avramoskire čhavé pir patiaibén i savó isyn dad aménge sarénge,

¹⁷i syr isyn čhindló: “Me čhudjom tut dadésa vaš buté-manušéngire nácyi” angíl Devléste, dre Savéste Avraámo upatiandyja, Savó otdžidiakirela mulen, i rakiréla pal dolé réndy, so kakaná nane, ne adiáke sýrby jone isyn;

¹⁸kiéli na sys nisaví nadiéia Avraamóske, usajékh jov na xas'kirdia nadieinyben i patiandyja, paldavá jov i jaciá dadésa buté manušéngire nacyiénge, syr léske sys phendló: “Adiáke javéla baró tyró ródo.”

¹⁹I léskiro patiaibén na tyknyja, xoc' jov džindiá, so dre léskire masá nane ni saví džiibnytko zor, pal-dová so léske isys pašýl šel berš i romný léskiri Sara sys drieván phuri vaš davá, sob (kaj) te bijanél,

²⁰i jov na kunindiape dre Devléskiro dynó lav, a jov sys tvardo dro patiaibén i slavindia Devlés,

²¹Jov drieván patiandyja, so Devléste isyn zor, i jov keréla dová, pal so Jov dyjá lav;

²²davá i sys zagindlo léske dro čačipén.

²³A lavá, savé isys čhindlé pal léste, otlydžanape na ke jekh Avraámo.

²⁴Ne jone adiáke-pac' otlydžanape i ke ame, savénge javéla zagindlo čačipén, kon patiála dre Odoléste, Kon otdžidiakirdiá muléndyr, amaré Ras-Devlés, Isusós,

²⁵Savó sys zdyno pal amaré gréhi i Savó otdžidyjá, sob (kaj) te pridžinel amen čačunenca bangipnastyr angíl Devléste.