Read Biblija - Pe Baltitko Romani čib (Romanes) 2019 Baltic Romani Bible Rimlianenge 5 Bible Online

Rimlianenge 5 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 5

¹I pal-dová so amen priĥalyne pal čačunende pir patiaibén, aménde isyn ramánjo (miro) Devlésa pir amaré Raste-Devléste, Isusóste Xristosóste,

²pir Savéste ame sam domekne pir patiaibén ke davá bahtiakiribén, dre savó ame kakaná dživasa, i ame radynasape, so aménde isyn nadiéia pe Devléskiri sláva.

³Ne na dre jekh davá isyn amarí rádyma, a ame adiáke-pac' radynasape dre amaré pharipena, pal-dová so ame džinása, so pir pharipén barjola amaró vyrikiriben.

⁴Pir vyrikiriben ame jačasape tvardedyr dro xaraktiero, a xaraktiero duredýr déla nadiéia.

⁵I amarí nadiéia na podlydžala amen, pal-dová so Devléskiri láska pir Svénto Dúho (Fáno) pherdiakirdiá amaré ile laskasa, saví dyný aménge:

⁶pal-dová so Xristóso, kiéli ame sámas grehítka, dro časo, Savó Devél uphendia, myjá pal nadevlytkonende.

⁷Ci meréla vari-kon pal čačuné manušéste? Saštý (moginéla) te javél, so pal vari-savé lačheste, vari-kon i skedéla muršypen te merél,

⁸ne Devél dophenéla Péskire laskasa ke ame, so Xristóso myjá pal aménde, kiéli ame iščo (inké) sámas grehítka.

⁹Paldavá kakaná, kiéli ame sam pridžindle čačunenca Léskire ratésa, ame butýr patiása dre dová, so ame zrakhasape pir Léste Devléskire xoliátyr.

¹⁰Kóli angledýr ame sámas vérgi Devléske i kakaná ame jaciám dro ramánjo (miro) Lésa pir Léskire Čhavéskiro meribén, tedy butýr saréstyr kakaná, syr ame jaciám dro ramánjo, ame nadieinasape te zrakhaspe Léskire džiibnasa.

¹¹I na jekh davá, ne ame i radynasape pir amaré Raste-Devléste, Isusóste Xristosóste, pir Savéste ame doresciam (dolyjam) kakaná ramánjo Devlésa.

¹²Paldavá, syr pir jekhe manušéste grého zagijá dro svéto, i pal davá grého jaciá meribén, adiáke meribén jaciá pe saré manušénde, pal-dová so saré kerdé grého:

¹³pal-dová so grého sys dro svéto angledýr Zakonóstyr, ne grého na ginelape, kóli nane Zakóno;

¹⁴ne meribén rikirdia zor pe manušénde Adamostyr ke Mójza, adiáke-pac' i pe odolénde, kon na kerdiá dasavo grého, syr Adamo, savó sys, syr óbrazo Odoléske, Konéske treindiá te javél.

¹⁵Ne Devléskiro taláno pir bahtalypén, davá nane ž dová-pac', syr Adamoskiro grého? Pal-dová so, kóli pir jekhe-manušéskiro proštaviben but manušá myné, tedy ci pe but butýr manušá doreséna Devléskiro bahtalypén i taláno pir bahtalypén jekhe Manušéstyr Isusóstyr Xristosostyr délape vaš sarénge.

¹⁶Ne Devléskiro taláno isyn na sýrby séndo pal jekhe manušéste, savó kerdiá grého; pal-dová so grého, savó kerdiá jekh manúš, lydžála ke séndo, ne Devléskiro taláno pir bahtalypén isyn sýrby čačipnáskiro pridžinyben pal buténgire-manušéngire gréhi?

¹⁷A kóli pir jekhé-manušéskiro proštaviben meribén lyjá te rikirél lofo (zor), tedy ci pe but butedýr vól'no čačipnáskiro dáro i but but bahtalypén javéna te kralinen dro odolengiro džiibén, savé priléna len pir Jekhéste Isusóste Xristosóste:

¹⁸paldavá, syr jekheskiro manušéskiro grého jandiá séndo saré manušénge, adiáke-pac' jekhe Manušéskiro čačunó réndo pridžinela saré manušén čačunenca vaš džiibén, savó déla džiibén sarénge.

¹⁹Pal-dová so, syr pal jekhe manušéskiro nakandypen kerdépe but manušá grehitkonenca, adiáke-pac' i pal Jekhe Manušéskiro kandypen but manušá jačénape čačunenca.

²⁰A Zakóno sys dynó, sob (kaj) te javél butýr i bicialedyr grehoskiro ĥalyibén; ne odój, kaj sys butýr grého, odój sys i butýr bahtalypén;

²¹pal-dová so, syr grého rikirdia zor pe meribén, adiáke-pac' i bahtalypén javéla te lydžál te rikirél lófo (zor) pe čačipén, savó janéla ke viéčno džiibén pir Isusóste Xristosóste, amaré Raste-Devléste.