Read Biblija - Pe Baltitko Romani čib (Romanes) 2019 Baltic Romani Bible Rimlianenge 6 Bible Online

Rimlianenge 6 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 6

¹So ž ame phenása? Ci te jačaspe aménge dro grého, sob (kaj) te barjol Devléskiro bahtalypén?

²Nad. Ame myjam vaš grého, syr ame moginasa duredýr te dživás dre léste?

³Ci tumé na džinéna, so saré ame, kon boldiape dre Isusóste Xristosóste, dre Léskiro meribén boldiampe?

⁴I adiáke ame myjam khetané Lésa pir boldyipen dre meribén, sob (kaj), syr Xristóso sys otdžidiakirdo muléndyr Devléskire slavása, adiáke i aménge te dživás dre nevó džiibén.

⁵Pal-dová so, kóli ame khetaniakirdiampe Lésa dro Léskiro meribén, tedy ame sam bangé (musinasa) te javas adasavé-pac', syr jekh Lésa i dro Léskiro otdžidyiben,

⁶i ame džinása, so manúš, savó angledýr sýrby dživdiá dre aménde, sys primardo pe trušúl Lésa vaš dová, sob (kaj) amaré grehítka masá te xasiakirén péskiri zor vaš čoripén, i sob (kaj) ame te na javas butýr dynárja grehóske.

⁷Pal-dová so, kon myjá, butýr na moginéla te kerél grého.

⁸Kóli ame myjam Xristosósa, tedy ame patiása, so i te dživás javása Lésa,

⁹i ame džinása, so Xristóso otdžidyjá muléndyr, i kakaná butýr meribén na rikiréla zor pe Léste.

¹⁰Pal-dová so, kiéli Jov myjá, tedy Jov myjá jékhvar vaš grého, ne Jov kakaná dživéla vaš Devléske.

¹¹Adiáke-pac' i tumé ginen pes mulénca vaš grého, ne tumé ginen pes džidénca vaš Devléske dre Isusóste Xristosóste.

¹²Pal-dová so, mek te na dživél grého dre tumaré masá, savó dživéla na viéčnes, sob (kaj) tuménge te na poddenpe léskire tyrdypnaske.

¹³I na otdén tumaré masá grehóske sýrby dre vastá vaš načačipén, a tumé otdén fedýr pes Devléske, syr tumé sýrby otdžidyne muléndyr dre džiibén, i otdén tumaré masá dre Devléskire vastá vaš čačipén.

¹⁴Pal-dová so grého na javéla butýr pe tuménde te xulainél: pal-dová so tumé kakaná san na tel Zakóno, a tel bahtalypén.

¹⁵I tedy, ci javása ame te kerás grého, pal-dová so kakaná ame sam na tel Zakóno, a tel bahtalypén? Nad.

¹⁶Ci na džinéna tumé, so konéske tumé otdena pes syr dynári dre kandypen, tumé san i dynárja odoléske, konés tumé kandéna: ci te javél davá grého, savó lydžála ke meribén, ci te javél davá grého pir kandypen, savó lydžála ke čačipén?

¹⁷Ne parikirasa Devléske, so tumé ž sánas angledýr butiarné vaš grého, a tumé kakaná lyné te šunén saré iléstyr dová sykliaiben, savéske tumé otdyné pes.

¹⁸A kiéli tumé giné krig grehostyr, i tedy tumé jačné pisharjonca vaš čačipén.

¹⁹Me rakiráva tuménge pal davá manušytkoné lavénca, vaš dová, sob (kaj) tumé te ĥaljon. Adiáke, syr tumé angledýr otdenas tumaré ločakire masá dre magirdó pishariben i proti Zakóno, to kakaná otdén tumaré masá dre pishariben čačipnaske pe svénta réndy.

²⁰Pal-dová so, kóli tumé i sánas grehoskire pishárja, tedy tumé sánas vol'na čačipnastyr.

²¹Save lačhé réndy tumé tedy kerdé? Dolé, savéndyr tumé kakaná kokoré ladžana, pal-dová so léngiro kónco (jagóro) isys meribén.

²²Ne kakaná, kiéli tumé san vol'na grehostyr i jačné Devléskire pishar'jénca, tuménde isyn svénto otdyibén Léstyr i tuménde isyn kónco (jagóro) pe davá, savó isyn viéčno džiibén.

²³Pal-dová so pleskiriben pal grého isyn meribén, a Devléskiro taláno pir bahtalypén isyn viéčno džiibén dre Isusóste Xristosóste, amaré Raste-Devléste.