Read Biblija - Pe Baltitko Romani čib (Romanes) 2019 Baltic Romani Bible Rimlianenge 7 Bible Online

Rimlianenge 7 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 7

¹Ci na džinéna tumé, pšalále, so (me rakiráva odolénge, kon džinéla Zakóno): Zakóno rikiréla zor pe manušéste, paka jov isyn džidó?

²Pal-dová so paloromitko džuvlý isyn sphandly Zakonosa džidé romesa; ne, kóli lákiro rom meréla, joj iačéla vól'no paloromitkone Zakonóstyr.

³Kiéli džuvlý vydžála paloróm pal javiréste, kóli lákiro rom isyn džidó, la javéna te kharén biladžakuniása; ne kóli lákiro rom meréla, tedy joj isyn vól'no Zakonóstyr, i joj na javéla te ginelpe biladžakuniasa, kiéli joj vydžála paloróm pal javiréste.

⁴Adiáke i tumé, pšála miré, tumé na san tel Zakonoskiri zor, pal-dová so tumé san paš Xristosóskire maséndyr, sob (kaj) tumé te javén trej Javiréske, Savó otdžidyjá muléndyr, i sob (kaj) ame te janas vari-savó lačhó dyibén Devléske.

⁵Pal-dová so, kiéli ame dživdiam pir ločakiro tyrdypén, tedy Zakóno džangavelas aménde grehítka kamibena, savé sys dre amaré masengire pašá i dalésa ame janasas dyibén meribnáske;

⁶a kakaná, ame jaciám vol'na Zakonóstyr, kiéli ame myjam vaš davá Zakóno, savésa ame sámas sphandle, sob (kaj) te dynarinás aménge Devléske pir nevó Dúho (Fáno), a na pir phuranó Zakonoskiro čhinybén.

⁷So ž ame phenása? Naúšto Zakóno isyn grého? Nisyr nad! Ne me na džinavas, so davá dasavo isyn grého, kóli te na javél Zakóno: me na som Zakonoskiro, so davá isyn dasavo te pričhuves iló ke dová, so na trej, kóli Zakóno te na rakirél: “Na kam.”

⁸Ne grého lathiá saštypen pir zaphenyben i podmardia dre mánde kažno tyrdypén, savó na trej, pal-dová so bi Zakonoskiro grého isyn muló.

⁹Me vari-kiéli dživdjom bi Zakonoskiro: a kiéli javdiá zaphenyben, tedy i grého otdžidyjá,

¹⁰a me myjom. I vygijá, so zaphenyben, savó isyn dynó vaš džiibén, jandiá mánge meribén:

¹¹pal-dová so grého pir zaphenyben xohadia man i muliakirdiá lésa man.

¹²Paldavá Zakóno isyn svénto, i zaphenyben isyn svénto, i čačunó i lačhó.

¹³Ci adiáke vygijá, so lačhipén jaciá vaš mánge meribnasa? Nad. Ne grého, sob (kaj) te javél bicialó syr grého, jov jandiá mánge meribén pir lačhipén, sob (kaj) grého pir zaphenyben te javél daranes grehitkedyr, so isyn butýr.

¹⁴Ame džinása, so Zakóno isyn svénto, a ame sam grehítka, i amaré masá isyn bikindlo grehoske dro dynaribén.

¹⁵Me kokoró na ĥaljovava, so me keráva; pal-dová so me kamám, me dová na keráva, ne so me drieván na kamám, me dová keráva.

¹⁶A kóli me keráva dová, so mánge na pir iló, tedy me som dro jekhipén Zakonosa, so jov isyn lačhó.

¹⁷Paldavá, ake na me kokoró keráva, a davá grého keréla, savó dživéla dre mánde.

¹⁸Paldová me džinóm, so nisavó lačhipén na dživéla andrál mánde; pal-dová so me kamám te keráv lačhipén, ne me na mogináva.

¹⁹Pal-dová so me keráva na dová lačhipén, savó me kamám, a čoripén, savó me na kamám, a me dová keráva.

²⁰Kóli me keráva dová, so me na kamám, tedy davá na me keráva, a grého, savó dživéla dre mánde.

²¹I adiáke me ĥalyjom, so dasavo isyn Zakóno, kóli me kamám te keráv lačhipén, a mánde vydžála čoripén.

²²Paldavá me radynavpe Devléskire Zakonóstyr, savó dživéla dre manušéste:

²³ne dre miré masengire pašá, me dykháva javír Zakóno, savó isyn proti Zakóno miré godiákiro i savó keréla man grehoskire pisharisa, savó isyn dre miré-masengire pašá.

²⁴Savó bedo me som manúš! Kon te zrakhelas man dalé meribnaskire maséndyr?

²⁵Parikirava Devléske pir Isusóste Xristosóste, amaré Raste-Devléste. I ĥáda, me kokoró godiása dynarináva Devléskire Zakonóske, ne masenca me dynarináva (služynava) grehóskire Zakonóske.