Read Biblija - Pe Baltitko Romani čib (Romanes) 2019 Baltic Romani Bible Rimlianenge 8 Bible Online

Rimlianenge 8 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 8

¹Tedy, nane kakaná nisavó obrakiriben vaš odolénge, savé dživéna dre Isusóste Xristosóste na pir loč (plot'), a pir Dúho (Fáno).

²Pal-dová so džiibnáskiro Duhoskiro Zakóno pir Isusóste Xristosóste kerdiá man vol'nonesa grehoskire Zakonóstyr i meribnástyr.

³Pal-dová so, syr Zakóno na mogindiá te pirizorjakirel manušeskiri loč, i xasiakirdiá péskiri zor, tedy Devél bičhadiá Péskires Čhavés, Savó sys dre loč (plot'), syr grehítko manúš, sob (kaj) Jov te javél syr svénto dyibén (žértva) pal grého i te sendiakirél grého dre manušéste,

⁴vaš dová, sob (kaj) dová čačipén, savó Zakóno trebinela, te spolninélpe pherdés dre manušénde, savé dživéna na pir loč, a pir Dúho (Fáno).

⁵Pal-dová so, kon dživéla pir ločákiro tyrdypén, odová i duminéla pal loč, a kon dživéla pir Dúho (Fáno), odová duminéla i pal Dúho (Fáno).

⁶Pal-dová so ločákire-grehóskire Manušéskiro tyrdypén lydžála ke meribén, a Duhoskiro tyrdypén déla džiibén i ramánjo (miro).

⁷Pal-dová so ločakire-grehoskire-manušéskiro tyrdypén isyn proti Devléste: jone ž na kandéna Devléskiro Zakóno, i jone na moginéna te kandén;

⁸i kodolé, kon dživéla pir péskire-grehoskiro tyrdypén, na moginéna te javén lačhé Devléske.

⁹Ne kóli tumé dživéna na pir ločákire-grehóskiro tyrdypén, tedy, čačes, Devléskiro Dúho (Fáno) dživéla dre tuménde; a, kóli vari-konéste nane Xristosóskiro Dúho (Fáno), odová isyn na Léskiro:

¹⁰kóli Xristóso dživéla dre tuménde, to tumarí loč isyn muly vaš grého, ne Dúho (Fáno) isyn džidó pirdál čačipén.

¹¹A kóli Odoleskiro Dúho (Fáno), Kon otdžidiakirdiá muléndyr Isusós, dživéla dre tuménde, tedy Odová, Kon otdžidiakirdiá Xristosós muléndyr, otdžidiakirela i tumaré masá, savé isyn na viečna, Péskire Duhósa, savó dživéla dre tuménde.

¹²I tedy, pšalále, ame na sam bangé grehóskire ločáke, sob (kaj) te dživás pir ločakiro tyrdypén;

¹³pal-dová, so kóli tumé dživéna pir ločakiro tyrdypén, tedy tumé ž meréna, ne kóli tumé muliakirena tumaré svetytka réndy Duhósa, tumé javéna te dživén:

¹⁴pal-dová so saré, kon keréla pir Devléskiro Dúho (Fáno), isyn čačuné Devléskire Čhavé.

¹⁵Paldová so tumé na prilyné Dúho (Fáno), Savó keréla tumen pishar'jénca, sob (kaj) nevéstyr te dživén dre dar, a tumé prilyné Dúho (Fáno), Savó kerdiá tumen péskire čhavénca, savésa ame kharasa Devlés: “Avva, Dádo!”

¹⁶Devléskiro Dúho (Fáno) dophenéla khetané amaré duhósa pal dová, so ame sam Devléskire čhavé.

¹⁷Ne kóli ame sam Léskire čhavé, tedy aménde isyn paš dro meknó mištypén Devléskiro i paš dro Xristosóskiro meknó mištypén, kóli ame čačunés Lésa menčynasape, sob (kaj) khetané Lésa adiáke-pac' te proslavinaspe.

¹⁸Paldavá me duminava, so adadyvesatuno amaró piridživiben nisó na mol angíl daja sláva, saví otčhakirelape aménge.

¹⁹Paldavá kažno džidó sozdyiben pe phuv, baré nadejasa užakiréla, kiéli Devléskire čhavé javéna xulaja pir svéto:

²⁰pal-dová so saró džidó sozdyiben pe phuv gijá tel bizladoskiri zor na pir péskiro vykedyiben, ne pir Odoleskiro vykedyiben, Kon kerdiá adiáke i dre Savéste isyn nadiéia pe davá,

²¹so davá saró džidó sozdyiben kokoró javéla vól'no mulykane pisharibnastyr, vaš dová, sob (kaj) te javél dová-pac' slavútno vol'nyma, saví isyn Devléskire čhavénde.

²²Paldavá ame džinása, so saró davá džidó sozdyiben ke davá časo déla gódla dre mén'ki, sýrby angíl dová, syr čhavoró bijandjola.

²³I na jekh jone, ne i ame kokoré, savé udžindiam angledýr javirendyr Duhoskiro taláno, adiáke-pac' ame andrál péste užakirasa i pharés dasa ĥondiá (uzdyhinasa), sob (kaj) Devél te prilel amen pal péskire čhavénde, kiéli amaré masá javéna vykindle meribnástyr.

²⁴Paldavá ame sámas zrakhné nadejasa; ne nadiéia, kiéli isyn bicialy, davá nane nadiéia: pal-dová so, kóli kon vari-so dykhéla, sóske léske adiáke-pac' te nadieinelpe?

²⁵Ne kiéli ame nadieinasape pe dová, so ame na dykhasa, tedy ame ĥará (dlúges) užakirasa.

²⁶Adiáke-pac' i Dúho (Fáno) podrikiréla amen dre amaró bizorjakiriben; ame na džinása, pal so i syr trej te mangaspe Devléske, ne Dúho kokoró mangéla Devlés pal dová, so amaré lavá isyn na dre zor te piridel.

²⁷A Odová, Kon probinela ile, džinéla, pal so Dúho (Fáno) mangéla, pal-dová so Jov mangelape pal sventonende pir Devléskiri vólia.

²⁸Ne ame džinása, so kon rikiréla syr Drógima Devlés dro péskiro iló i konés khardé pir Léskiro uphenybén, odolén Devél lydžála sarén ke baht.

²⁹Paldová so, konés Jov kokoró angledýr vykedyjá, odolén i osvencyndia te kerén, sob (kaj) jone te poddžan pe Léskire Čhavéste, adiáke, sob (kaj) Jov te javél anglatunó maškír butende pšalénde.

³⁰A konés Devél osvencyndia angledýr, odolén Jov i khardiá, ne konés Jov khardiá, odolén i pridžindia pal čačunende, i barjakirdia.

³¹So ame tedy phenása pe davá? Kóli Devél isyn pal aménde, tedy kon isyn proti aménde?

³²Odová, Kon na tangindia Péskire Čhavés, ne Jov otdyjá Les pal sarénde aménde, ci na darinela Jov adiáke-pac' aménge khetané Lésa saró?

³³Kon moginéla te bangiakirel odolén, konés Devél vykedyjá? Devél pridžinela len čačunenca:

³⁴kon javéla te sendiakirél? Isúso Xristóso, Savó myjá, ne i Savó otdžidyjá muléndyr? Jov, Savó kakaná isyn pir čačuný Devléskiri rig? Jov i mangéla pal aménde.

³⁵Kon terdjola maškír aménde i Xristososkiri láska? Piridživiben, ci pharipén, ci tradypen, ci nangipén, ci dar, ci meribén?

³⁶Syr isyn čhindló: “Pal Túte ame sam terdé kažno dyvés muj pe muj meribnasa; i dykhéna pe aménde, syr pe bakrende, savén syg čhinena.”

³⁷Ne saró davá ame pirizorjakirasa Odoleskire zorjása, Konéske adiáke drieván ame jaciám dróga.

³⁸I me mištés džinóm, so ni meribén, ni džiibén, ni Jangóly, ni anglypyna, ni dová, so isyn kakaná, ni dová, so javéla angíl;

³⁹ni vučipén, ni xoripén, nisó javír, so isyn džidó pe saró parnó svéto, na moginéla te terdjol maškír aménde i Devléskiri láska dre Isusóste Xristosóste, amaré Raste-Devléste.