Read Biblija - Pe Baltitko Romani čib (Romanes) 2019 Baltic Romani Bible Rimlianenge 9 Bible Online

Rimlianenge 9 - Biblija - Pe Baltitko Romani čib (Romanes) 2019 Baltic Romani Bible bible

Rimlianenge 9

¹Me rakiráva čačipén dre Xristosóste i me na xohavava, mirí patýv dophenéla pal davá Sventoné Duhósa;

²so isyn mánde baró piridživiben, i na pirijačéla te dukhal miro iló;

³pal-dová so me kamamas kokoró te javav tel Devléskiri prokošybena (armaniá), sob (kaj) man te čhuvén dre rig Xristosostyr pal miré pšalénde, savé isyn seménca mánge pir rat;

⁴ĥáda, jone isyn Izrailjoskire manušá, lénge sys dynó te jačen Devléskire čhavénca te prilén mištypén, isyn dynó i sláva i zavieto, i Zakóno te prilén, i mangipén Devléske, i lav angíl;

⁵jone isyn čhavé péskire dadengíre, savéndyr pir loč i vygijá Xristóso, Jov isyn Devél pe saré manušénde, Jov isyn bahtiakirdó pe saré beršá. Amín'.

⁶Ne adiáke davá na moginéla te javél, sob (kaj) Devléskiro lav te xasiakirél zor; pal-dová so na saré manušá, savé dživéna ke Izrailjo, isyn Devléskire manušá;

⁷i na saré Avraamóskire čhavé, savé isyn bijandle Avraamóskire rodóstyr, jekh davá na keréla len Avraamóskire čhavénca; a syr isyn čhindló: “Isaakostyr délape túke ródo!”

⁸Javire lavénca, na saré kadalé čhavé, savé bijandle Avraamóskire rodóstyr, isyn Devléskire čhavé: ne kodolé isyn čhavé, pal savénde Jov dyjá lav.

⁹Ne lav, savó Devél dyjá, isys dasavo: “Dro dasavo časo (momiento) Me javáva i javéla čhavó Sarate.”

¹⁰I na jekh davá; ne adiáke-pac' sys i Rieviekasa, kiéli joj pharija dro jekh časo blizniatenca Isaakostyr, amaré dadéstyr,

¹¹i angíl léngiro bijanypén, kiéli jone iščo (inké) na kerdé nisavó lačhipén ci fuipén, Devél kerdiá péskiro vykedyiben,

¹²i davá na sys sphandlo rendénca, a saró keréla Odová, Kon prikhardia, tedy Rieviekake sys phendló: “Phuredýr pšal javéla te dynarinél tyknedyreske”:

¹³i, syr isyn čhindló pal davá: “Mánge jaciá drógo Jakovo, a Isavos Me drieván na kamdjom te dykháv.”

¹⁴So ame tedy phenása pe davá? Naúšto načačipén isyn Devléste? Nad.

¹⁵Devél rakiréla Mojzáske: “Me primangava odolénge, konés trej te primangav, i konés trej te tanginav, Me potanginava.”

¹⁶Tedy džinén, so primangipen manušéske na pir léskiro iló ci starinyben, a pir Devléskiro tangipén.

¹⁷Svénto ž Čhinybén rakiréla Faraonóske: “Vaš dová Me tut i čhudjom rása, sob (kaj) te sykavav pe túte Mirí zor, i sob (kaj) te javél džindló Miro lav pir sarí phuv.”

¹⁸Tedy džinén, so Devél tanginela odolés, konés Jov kokoró vykedéla, i Jov pharjakirela iló odoléske, kon isyn drógo Léske.

¹⁹Vari-kon tuméndyr moginéla te phenél mánge tedy: “Pal so, Devél bangiakirela amen? Pal-dová so, kon moginéla te javél proti Léskiri vólia?”

²⁰A kon tu san adasavó manúš? Sob (kaj) túte te javél otphenybén Devléske? Ci moginéla dová, so isyn kerdó, te phenél odoléske, kon kerdiá les: “Sóske tu kerdián man dasavesa?”

²¹Ci nane pravo odolé manušéste, savó keréla pirja ĥlejátyr (glinátyr), sob (kaj) jekhe zamiesostyr te kerél pirí vaš svenkitko dyvés, i javír vaš kažno dyvés?

²²I kóli Devél kaméla te kerél čačunó séndo i te sykavél Péskiri zor, Jov tanginela ĥará manušén, savé isyn sozdyne vaš xasibén;

²³sob (kaj) ty sykavél Péskiro barvalypén dre sláva tangipnasa pe manušénde, savén Jov vykedyjá vaš sláva,

²⁴i pe aménde, savén Jov adiáke-pac' khardiá na jekhe Judendyr, ne i Najudendyr?

²⁵I Jov adiáke-pac' phendiá Osijaske: “Na Miré manušén Me javáva te kharav Miré manušénca, i odolja, savjá Me na pokerdjom (saví na jaciá pir iló Mánge), Me javáva te kharav ‘miré drogonasa.’

²⁶I javéla pe dová štéto, kaj sys phendló lénge: ‘Tumé san na Miré manušá, odój jone javéna te kharenpe džidé Devléskire čhavénca.’”

²⁷Isajo rakiréla roibnasa pal Izrailjo: “Mek Izrailjoskire čhavé te javén adákicy but, kicý isyn morjoskiro (derjavéskiro) práho, a usajékh nabari paš léndyr zrakhélape:

²⁸pal-dová so Devél zrikirela Péskiro lav ke kónco (ke jagóro); Jov keréla dalé phuvjása dová, so Jov phendiá.”

²⁹Syr i angledýr Isajo phendiá pal davá: “Kóli bolybnáskire-jangoléngiro Raj Devél te na jačkirel aménge ródo, to aménca javéla dová-pac', so jaciá Sodomóskire i Gomorakire manušénca.”

³⁰So ame tedy kakaná phenása? Náiudy, savé na kamlé te rodén čačipén, doresné (dolyne) čačipén pir péskiro patiaibén.

³¹A Izrailjo, savó rodyja Zakóno pir čačipén, adiáke jov na dogijá ke Zakóno.

³²Sóske? Paldová so jone na dykhné pe patiaibén, a pe Zakonóskire réndy. Jone obštadepe pal bar, savó len na domekela,

³³syr i isyn čhindló pal davá: “Ĥáda, Me čhuváva pe Sióno bar, pal savó but manušá obštavenape i peréna: i kažno, kon patiála dre Léste, odová nijékhvar na javéla te ladžal.”