Read Biblija - Pe Baltitko Romani čib (Romanes) 2019 Baltic Romani Bible 1 Korinfianenge 1 Bible Online

1 Korinfianenge 1 - Biblija - Pe Baltitko Romani čib (Romanes) 2019 Baltic Romani Bible bible

1 Korinfianenge 1

¹Pavlístyr, savés Devél prikhardia te javél Isusóskire Xristosóskire Apostolosa pir Péskiri vólia, i amaré pšalestyr Sosifanostyr,

²Devléskire khangirjake, so isyn dro Korinfo, saré sventoné manušénge, savé isyn prikharde te jačen i te javén Devléskire manušénca pir patiaibén dre Isusóste Xristosóste; sarénge, kon mangelape Isusóskire Xristosóskire lavésa pir saré štéty, Savó isyn léngiro i amaró Raj Devél:

³Mek Devél Dad amaró i Raj Devél, Isúso Xristóso, te den tuménge bahtalypén i ramánjo (miro).

⁴Me ŭsády (sak) parikirava Devléske pal tuménde pal bahtalypén, savó isyn dynó tuménge pir Isusóste Xristosóste.

⁵Pal-dová so pal Léste tumé barvalyne kažnoné lavésa i džinybnasa,

⁶i pal-dová syr amaró dophenybén pal Xristosóste jaciá dasavo tvardo dre tuménde,

⁷paldavá tuménde nane ni savó nauhtylyben ni dro vari-savó taláno (darovanijo), kiéli tumé užakiréna zoralés Xristosós te javél,

⁸Jov adiáke-pac' podrikiréla tumaró zoraló patiaibén ke kónco (ke jagóro), sob (kaj) tumé te javén bidošakire dro dyvés, kiéli amaró Raj Devél, Isúso Xristóso, javéla javír mólo.

⁹Devléske, Savó prikhardia tumen dro khetanyben Léskire Čhavésa, Isusósa Xristosósa, Amaré Rása, trej te patián sarésa.

¹⁰Me drieván mangáva tumen, miré pšalále, Isusóskire Xristosóskire lavésa, amaré Ráskire-Devléskire, te rakirén jekh, i te na javél tuménde rakiribena jekh proti javiréste, sob (kaj) tumé te javén khetané dro jekh dúho (fáno) i dre jekh godý.

¹¹Pal-dová so me udžindjom Xloiakire sem'iatyr, pšalále miré, so maškír tuménde isyn košybena.

¹²Me phenáva pal davá adiáke, so tumé rakiréna: “Me som Pavlískiro”, “me som Apolososkiro”, “me som Kifaskiro”, ne “me som Xristosóskiro”;

¹³so ci rospyjape Xristóso pe grupy? Ci Pávli sys primardo pe trušúl pal tuménde? Ci tumé boldepe dro Pavlískiro lav?

¹⁴Me parikirava Devléske pal dová, so me na boldjom nikonés tuméndyr apríč Krisposte i Gajoste,

¹⁵sob (kaj) nijékh manúš te na phenél, so me boldjom tumen dro miro lav (miré lavésa).

¹⁶Me boldjom adiáke-pac' Stiehvanos (Stiefanos) i léskire sém'ia (irí), ne ci me boldjom iščo (inké) vari-konés, me na džinóm (na džináv).

¹⁷Hristóso na bičhadiá man te bolav. Jov bičhadiá man te rosphenav bahtalý zan (zvies'), i te rosphenav pal davá nazbit god'varé lavénca, sob (kaj) Xristosóskiro meribén pe trušúl te na xasiakirél péskiri zor.

¹⁸Pal-dová so lav (sykliakiribén) pal Xristosóskiro meribén pe trušúl isyn dylnypén vaš odolénge, kon isyn xasibnýtko, a aménge, kon isyn zrakhno, davá déla Devléskiri zor.

¹⁹Dro Svénto Čhinybén rakirlape: “Me xasiakiráva god'varipen god'varengiro i Me otčhuvava dre rig ĥalyibén sykliakirdengiro.”

²⁰Kaj isyn god'variuko? Kaj isyn lylvarítko (knížniko)? Kaj isyn dophenybnari (sporščyko) dro davá viéko? A Devél pirikerdia dalé svetoskiro god'varipen pe dylnypén.

²¹Paldavá Devél pir Péskiro godypén kerdiá adiáke, sob (kaj) manušá te na ĥaljon Devlés péskire godiása bi patiaibnaskiro; Devléske sys lačhó te zrakhél odolén, savé patiána, pir phenybnytko lav, savó isyn sýrby dylnypén.

²²Paldavá Judy phučena pal špéry (znáki), i Griéki (Balamé) rodéna god'varipen;

²³ne ame rosphenása pal Xristosóste, Saves primarde pe trušúl; davá phenybén isyn sýrby bar pe drom, savó propatiakirela Judén i isyn sýrby dylnypén vaš Najudénge,

²⁴ne Xristóso isyn Devléskiri zor i Devléskiro godypén odolénge, savé isyn prikharde: syr vaš Judénge, adiáke-pac' i vaš Griekénge (Balaménge).

²⁵Pal-dová so Devléskiro nagodypen isyn god'varedyr manušytkoné god'varipnastyr i Devléskiro nazoralypen isyn zoraledýr manušytkoné zoralypnastyr.

²⁶Paldavá ripirén, pšalále, kon tumé sánas angíl dová, syr Devél prikhardia tumen: nábut tuméndyr sánas god'varé pir manušýtko godý, nábut tuméndyr sánas baré manušá, nábut tuméndyr sánas slavutnone rodóstyr;

²⁷ne Devél vykedyjá pefromi dová, so svéto ginéla pal dylnypén, sob (kaj) te ladžakirel god'varen, i dová, so svéto ginéla pal nazoralypen, sob (kaj) te ladžakirel zoralypén,

²⁸i Devél vykedyjá butýr dová, so svéto ginéla pal nadžindlypen i dykhéla vučipnástyr i ginéla ni palsó, te čhuvél telé svetoskiro raipen,

²⁹sob (kaj) nijékh manúš te na šarelpe angíl Devléste.

³⁰Ne adavá Devél čhudiá tumen dro khetanypen Isusósa Xristosósa amaresa i Jov kerdiá Xristosós syr amaró godypén, čačipén; pal Léste ame jaciám Devléskire sventoné i vol'none manušénca,

³¹sob (kaj) te javél adiáke, syr isyn čhindló: “Mek odová, kon šarelape, te šarelpe Devlésa.”